Hoseya 10
10
Gipimaniso nya vhinya
(Isaya 5:1-7; Ezekiyeli 15; Joba 15:1-8; Dzindzimo 80)
1Israyeli a diri lithembwe nya gunone nya miuvha,
li nga bani li ninga mihandro.
Avbo gu nga andra mihandro yaye,
a di andrisa gambe ni sihuru saye nya miphaso,
avbo litigo laye li nga bani li gu engedzelana gunona,
khu guralo, va di gira sithombe nya wumburi.
2Myonyo yawe khya wudambane;
khu guralo, va na rwala nandru wawe;
Pfhumu Nungungulu a na kokelela sihuru sawe nya miphaso,
a pandrelela sithombe sakone.
3Khu guralo, va na ganela, khavo:
“Hi mwalo gambe mufumeli,
kholu kha hi ningi githawo Pfhumu Nungungulu.
Ambari na hiri ni mufumeli,
a di hadza gu hi phasa khu ginani?”
4Va ganela magana nyamba phasa gilo,
va sambanya malipha, va gu gira gidzumeledzwano;
khu kotani nya isoso, malamulelo yawe,
ma na buga nga mwasi nya kholowe
wu hodzago dzimbewu dza mahangeni.
5Vathu va vbanyago Samariya va na thuswa
khu githombe nya gimombyana
gya Bheti-Avheni,
kholu vathu vaye, va na lila khu kotani yaye,
gumogo gambe ni tsawa waye nya vaphaseli
nya sifananiso
va nga bani va tsaka khu wudhumo waye,
kholu thomba yawe yi dusidwego,
vbakari gwawe.
6Gimombyana nigyo gi na dzegwa gi yiswa Asiriya,
kha nga ndruwo ga mufumeli khongolo;
gu na manega Pfilupfilu Efrayimi,
aholu Israyeli a na khala dzitshoni
khu kotani nya wusingalagadzi waye.
7Mufumeli wa Samariya a na songwa,
a fanana ni liguvi la vbatshani nya mati.
8Malangani nya gukhugege ya Bheti-Avheni,#10:8 Bheti-Avheni khu Gihebheru gutshamusela gupwani “guvivba mwendro gupwani” sithombe.
a gu tsindza nya giwono gya Israyeli,
gu na pfhungumudwa;
miba ni sirangalabwa,
si buga vbatshani nya siluvelo sawe.
Khavbo avbo, va na embela sigomo, khavo:
“Hi fenengedzeni!”
Ga sigomwana, khavo:
“Hi futeleni!”
9 # Wona gambe: Val 19:1-30. Gukhugela matshiguni ya Gibheya,
uwe Israyeli u di gira sighoho,
u simama gu gira kharato.
Ina nyimbi kha mwa manwa khiyo
tigoni ga Gibheya,
khu guta vbweta va nya guvivbedwa khu monyo, gani?
10Nyi na va tsayisa gukhedza khidzo nyi golago khidzo;
mayigo yatshavbo, ma na tombana ma va wugela
vata va mola khu kotani va ghohidego guvili.
11Kholu Efrayimi, a diri gimombyana nya ngadzi
nya gurule gi hevbudzidwego,
gi nga bani gi tsakela guvbula tirigu;
khu guralo, nyi mu thede kanga
thamoni gwaye nya wumburi.
Efrayimi a na ndrindra kareta,
Judha a na lima,
va na Jakobe va na hagula.
12 # Wona gambe: Jer 4:3. Dzi yaleleni gululama mwabune,
mu vbwera mihandro nya wuwadi
limani wulime nya mahange yanu,
kholu egi khu gikhati nya guvbwete Pfhumu Nungungulu,
kala a wuya, ata vbaladza gululama vbakari gwanu.
13Mu yade manyala, mu ngu vbwera guvivba,
mu hodza handro nya malipha,
kholu enu mu di tumba tshivba yanu mwabune,
ni talo nya dzindrena dzanu.
14Khu guralo, vbakari nya vathu vago,
gu na duga ghudzeghudze nya nyimbi,
makhokhola yago yatshavbo
ma na khungumudwa,
kha nga Salamani a nga pfhungumula Bheti-Aribheli
khu litshigu nya nyimbi,
avbo mayime a nga vbadzuledwa
gumogo ni sanana saye.
15Si na girega kharato avbo gwago, uwe Bheteli,
khu kotani nya sighoho sago nya sikhongolo.
Na gu nga gu duga wuronga,
mufumeli wa Israyeli a na mbembisedwa muphelo.
Currently Selected:
Hoseya 10: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
