Habhakuka 1
1
Khu ginani va nya guvivbedwa khu monyo va manago gudugelela
(Isaya 1:2,4)
1Rwalo wu tuledwego gu wonwa khu muprofeti Habhakuka.
I. MABHULO YA MUPROFETI NI NUNGUNGULU
2Kala lini, Pfhumu Nungungulu
na nyi gu lila u si nyi yingisi?
Nyi laledza avbo gwago, kheni:
“Nyi ngu sasedwa!” Uwe khwa nyi vbanyisa?
3Khu ginani u nyi yeyedza guvivba,
ni gu nyi wonisa tshanisa?
Kholu gumbembiswa ni gusasedwa somo mbeli gwangu;
vomo gambe va wusago mayunga ni gu ganedzisana.
4Khu guralo, gumwalo gambe nayo,
kha gu nga gu lamudwa khu lisine,
kholu va nya guvivbedwa khu monyo,
va gu khingeledzela muthu nya gululame,
khu guralo, mahungu ma gu wegedzwa, ma si gimbidziswi khu lisine.
5 # Wona gambe: Mith 13:41. Nga khedzani mayigo mu wone, bwelo khavbo mu liwuga,
samalani; kholu khu matshigu yaya yanu,
nyi ngu gira thumo, mu na gumba
khodwani khuwo va gu mi embelani.
6 # Wona gambe: 2 Dzipf 24:2. Kholu wonani nya gukhenu nyi na mi resela Vakalidhiya,
litigo nya guleve ni dzihanyi,
li tsemakanyago gulapha gwatshavbo nya litigo,
va phanga malanga va si lumbwigo khayo.
7Vathu nya guthise va thelago hwanga,
va gu gira ni sevbini va si golago.
8Dzikavalu dzawe dzi na ni mazambo guvbindra magamba,
dzi gira gigaha guvbindra masolwa vbawutshigutunu,
vakhileli nya dzikavalu dzawe va gu phalalega malangani
yawe va vbuvba nga maghama ma tutumelago guhodza.
9Vatshavbo va guta na va dongide guta tshanisa vathu,
dzikhovbe dzawe dza gu thonona Khugadambo,
va nata wungedzela dzikhumbi nya dzingi kha nga fungu wa phwani.
10Va poyila vafumeli ni dzindruna va dzi gira nga gihegiso.
Avo va na hagana khu makhokhola yatshavbo,
kholu va na wungedzela mafu, va ma dzega.
11Avo va na vbindra va ya mbeli nga phuvbo, va va gandra,
va rwega vathu milandru,
kholu nungungulu wawe, khu tshivba yawe.
12Uwe Pfhumu Nungungulu wangu, Gihathwa gyangu,
gasi khu khugeli guhegulani kala gupindruga, gani?
Ethu gima kha hi na ngafa.
Uwe Pfhumu Nungungulu, u va vegede gulamudwa,
uwe u gu Giwindri gyathu u va emisede gutsayiswa.
13Maho yago ma agide ngudzu
ma si goligo gu wona guvivba,
ma si tsakiswigo khu gu wona dzitshanisa,
khu ginani u wonago va nya guvivbedwa khu monyo u degula,
avbo uye nya guvivbedwe khu monyo,
a midzago oyu a mu vbindrago khu gululama, na?
14Khu ginani u vbindrugedzidego vathu va khala kha nga dzindzandzi dza phwani,
va fanana ni sirengo nya gukhwirire khu lididi,
si gu mwalo muthu nya gu si fumele?
15Avo va gu ndrindra vathu vatshavbo khu gilowo,
va va mola khu ligoga lawe,
va va wungeledzela rangani gwawe,
khu guralo, uye a gu tsaka ni gunengela.
16Khu guralo, a gu girela miphaso ligoga laye,
a vbisela libani miranga yaye,
kholu khiso si mu nonisago,
mabhindzu yaye ni guhodza gwaye.
17Ina a na simama gu thesa ligoga laye,
nyamba diga gu simama gu songa vathu nyambana gisiro, gani?
Currently Selected:
Habhakuka 1: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
