Ezekiyeli 44
44
Guwusedzwa nya mithumo ya nyumbani nya miphaso
1Khavbo avbo, mwama a di nyi dzega a nyi bweledza khu ndzila nya mwanya wa vbavbandze nya wulanga nya miphaso, wu nga bani wu khedzide phuvbo ga Khugadambo, na wu segidwe. 2Pfhumu Nungungulu a di nyi embela, khuye: “Lidimba leli gu vbwetega li khala na li segidwe, li nga tudwi; mwalo muthu a yelago gu bela khilo, kholu Pfhumu Nungungulu wa Israyeli, bede khilo; khu kotani nya isoso, gu vbwetega li khala na li segidwe. 3Muthangeli khuye basi a yelago gu bela ni gu khala vbale, gasi a hodza gibaba mbeli ga Pfhumu Nungungulu. Uye a na bela ni gu duga khu mwanya wa wumowo.”
4Khu hwane, mwama a di nyi dzega kala mbeli nya Nyumba ya Nungungulu, khu mwanya wa phuvbo ga Wuronga, nyi di khedza nyi wona gukheni wudhumo wa Pfhumu Nungungulu wu tadzide Nyumbani gwa Pfhumu Nungungulu; khavbo avbo, nyi di thega khu khovbe vbavbatshi.
5 Pfhumu Nungungulu a di nyi embela, khuye: “Mwamana wa muthu, tula maho yago, u yingisa khu dzindzeve dzago ni githawo satshavbo nyi vbwetago gu gu embela khu sileletelo mayelano khu Nyumba ya Pfhumu Nungungulu. Tula ndzeve uti gwadi mabelelo muni u yelago gubela khayo Nyumbani ga Nungungulu ni madugelo yakone u yelago gu duga khayo khu Wulangani nya Guage. 6Embela vathu vava nya guyeyise, va na Israyeli, khuwe: Mune Pfhumu Nungungulu, a ngu ganela kharati, khuye: Enu va na Israyeli, nga hegisani mithumo yanu yatshavbo nya manyala. 7Gu diga nya yimbe mithumo yago nya wuyeyisi, u reside va nya mayigo nyamba hana wugwera, va si khathaligo khu Eni, va ta bela wulangani gwangu nya miphaso, gasi va nyenyezisa nyumbani gwangu, gikhati mu ningelago guhodza, mafura ni novba; khu kharato enu mu di fanyani gidzumeledzwano gyangu khu guvivba gwanu gwatshavbo. 8Kha mwa landrisani siguruvedzo sanu mayelano khu silo sangu nya guage; wulangani gwanu mu thede va nya mayigo gasi guta thuma Nyumbani gwangu nya miphaso.
9Mune Pfhumu Nungungulu, a ngu ganela kharati, khuye: Ni moyo muluveli, nyamba hana wugwera, ni gumba khathala khu Eni, a nga beli Wulangani gwangu nya Guage, ambari ni valuveli vatshavbo va vbanyago vbakari ga va na Israyeli.”
Mithumo ya va na Levhi
(Mitengo 4:19; Hoseya 4:6)
10Khu guralo, va na Levhi va nga dzi pambulago ni Eni va hongola hwindzo, gikhati Israyeli a nga dzi ndreyisago a legalega aya hwindzo ni Eni, va landrisela sifananiso sawe, va di rwala vabune guvivba gwawe. 11Khu guralo, avo va na thuma nyumbani gwangu nya guage kha nga dzighadhi nya myanya nya Nyumba ya Nungungulu ni vathumegeli vaye; avo va na paya sirengo nya miphaso nya guvbiswe gumogo ni dzimhamba khu lina nya vathu ni gu va thumela. 12Kholu va thumide na vari ni sifananiso sawe, va wuya va thumela va na Israyeli, va va tshunganisa va thega guvivbani; khu kotani nya isoso, Pfhumu Nungungulu a ngu ganela kharati, khuye: Nyi di sambanya na nyi khusedzide mandza gukheni, avo va na rwala nandru nya wuvivbi wawe. 13Va nga hidzimeli vbafuvbi gwangu gasi gu nyi thumela kha nga vaphasi nya mhamba, gambe va nga hidzimeli ga gimwegyo nya sombo sangu nya guage, ni ga miphaso yangu yi agidego ngudzu, va na rwale dzitshoni nya mithumo yawe nya gunyenyeze. 14Khu guralo, eni nyi na va rwega thumo nya gughadhe Nyumbani ga Nungungulu, ni thumo watshavbo wu yelago gu girwa umo.
Siguruvedzo sa vaphasi nya mhamba
(Ekisodha 28:39; Levhi 21:7,18; Dhewuteronome 17:8; Malakiya 2:7)
15Aholu, vaphasi nya mhamba va na Levhi, a gu sanana sa Sadhoki, va nga sayisa wulanga wangu nya guage, gikhati va na Israyeli va nga bani va si theli kota khu eni, avo va di hidzimela gwangu va ta nyi thumela, va na ema mbeli gwangu, gasi gu nyi girela miphaso nya mafura ni novba; a ngu ganela Mune Pfhumu Nungungulu. 16Avo basi khavo va na belago nyumbani gwangu nya guage, va hidzimela vbamezatunu gwangu, gasi gu nyi thumela, va landrisa sileletelo sangu.
17Va gubela khu myanya nya likupakupa la ndrani, va na ambala guambala nya seda; va nga ambali guambala nya mawoya, gikhati va na thumago vbamwanyatunu nya likupakupa la ndrani, Nyumbani ga Nungungulu. 18#Wona gambe: Eks 28:39-43; Levh 16:4. Va na ambala sihugu nya seda hungoni gwawe, va ambala sikhunyula nya seda siwununi gwawe; va nga ambali sombo nya gu va lutugise. 19#Wona gambe: Levh 16:23. Va gu duga va hongola ga likupakupa la vbavbandze, avbo va guromo vathu, va na tshula guambala va nga bani va thuma khugo, va gu vega makhuvini nya guage, va ambala gumbe guambala, gasi va si agisi vathu khu guambala gwawe nya wuphasi nya mhamba. 20#Wona gambe: Levh 21:5. Vaphasi nya mhamba va nga vbaluli ndzudzu hungoni, gambe va nga digi ndzudzu wu dandra; aholu va na wu gaya wu khala idzosaye. 21#Wona gambe: Levh 10:9. Mwalo ni moyo muphasi nya mhamba a yelago gu sela vbinyu gikhati a belago likupakupani la ndrani. 22#Wona gambe: Levh 21:7,13-14. Va nga dzegani ni noni, mwendro uye a hudwego khu mwama, aholu, va na dzege makendzi nya linyangwa la va na Israyeli mwendro noni yi nga tshidwago khu muphasi nya mhamba. 23#Wona gambe: Levh 10:10. Avo va na hevbudza vathu vangu gu tugula igyo gi agidego ni igyo gi nyenyezidego, ni gu va nonedza guhambanisa vbakari nya igyo nya gunyenyeze ni igyo gi agidego. 24Gikhati gu manegago guganedzisana, avo va na khala kha nga valamuli; va na lamula gukhedza khu gululama gwangu; avo va na landrisa milayo ni sileletelo sangu mayelano khu mibuzo yangu yatshavbo ni gu agisa dzisabhadho dzangu.
25 # Wona gambe: Levh 21:1-4. “Vaphasi nya mhamba va nga tshuki va hidzimela ga moyo nya muthu nya gufe, kholu va ga nyenyeziswa; va na dzi nyenyezise basi a gu bani nari babe waye, mwendro mayi waye, gyanana gyaye nya gikhwathana mwendro nya gyagadzyana, ndriyaye nya mwama mwendro nya nyamayi, a gu mwalo mwama. 26Hwane nya gu na dzi agiside, a na lirela livbandre na mavili matshigu. 27Litshigu uye a na belago Wulangani nya Guage, likupakupani la ndrani, gasi guya thuma umo, muphasi nya mhamba, a na ningela phaso waye nya guditshedzwe sighoho; a ngu ganela Mune Pfhumu Nungungulu.”
Gukabaniswa nya mayigo
28 # Wona gambe: Mit 18:20. “Vaphasi nya mhamba va na bani vari ni thomba; Eni kheni thomba yawe. Enu kha mu na nga va ninga thomba tigoni ga Israyeli; Eni kheni thomba yawe. 29Va na hodza ningelo nya mibuzo, ni ningelo khu sighoho gumogo ni ningelo nya gu divaledwe milandru; ni silo satshavbo si na gu phasedwago Pfhumu Nungungulu sa tigoni ga Israyeli, si na lumba avo. 30#Wona gambe: Mit 18:8-19. Gilo nya gyadi nya miningelo yatshavbo nya guhegule nya mihandro nya mafumbo yatshavbo, mu na ningelago, si na lumba vaphasi nya mhamba; enu mu na va ninga gipandre nya guphele nya dzimbewu nya gutshindrwe, gasi gi kodze gu manega gikategiso dzindrangani gwanu. 31#Wona gambe: Levh 22:8. Vaphasi nya mhamba va nga tshuki va hodza nyama nya sinyoni ni sirengo nya gufe sabune mwendro nya guvbadzuledwe khu sirengo sa khabini.”
Currently Selected:
Ezekiyeli 44: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
