Dhaniyeli 12
12
Matshigu nya guhegise
1 # Wona gambe: Gutu 12:7; Mat 24:21; Mark 13:19; Gutu 7:14; 12:7. Khu gikhati gyogyo, a na dugelela Migeli Ngilozi yi emelago vathu vago, gu na manega gikhati nya gusaniseke, nya gu gima gi si gu manegi gukhugela guhegulani nya mifumo. Aholu khu gikhati gyogyo, uye a na vbanyisa vathu vago, vatshavbo vale va na gu manegago na va lovidwe libhukuni nya womi. 2#Wona gambe: Mat 25:46; Joh 5:29. Vatshavbo va ladego umo nya kudzudzwane nya mafu va na wuga, vambe va na wugela guvbanyani nya gupindruge, vambe va wugela guya dzitshonini, gusanisekani nyamba vbela. 3Va nya gugengela, va na ngangamela gu fanana ni damboni, ni avo va ndrindrelago nya vangi guya gululamani, va na fanana ni dzinyeledzi kala gupindruga. 4#Wona gambe: Gutu 22:10. Aholu uwe Dhaniyeli sega mahungu yaya u ma lema libhukuni kala gikhati nya mahegiso. Nya vangi va na dzundrulugela eno ni eno, va vbweta guti nya guete.
5Khavbo avbo, eni Dhaniyeli, nyi di khusa maho nyi wona, mbeli gwangu gu diri ni dzimbe dzingilozi dzimbili, dzi nga bani dzi emide tsongoni, yimbe khu phuvbo ga eno, yimbe khu phuvbo ga eyi. 6Mweyo nya idzo yi di embela mwama a nga bani na ambade dzingandzu nya seda, na khade vbatshani nya tsongo, khiyo: “Gu nata lini mahegiso nya siliwugiso sesi?”
7 # Wona gambe: Gutu 10:5. Mwama wule a nga bani na ambade dzingandzu nya seda na khade vbatshani nya mati nya tsongo, avbo a nga khusedzago mandza yaye ya nyamudye ni nyambade nyi di mupwa na gu sambanya khu wule a vbanyago kala gupindruga, khuye. “Si na dzega myaga miraru ni gipandre. Avbo va na gu vbedzago gu tshanisa ni gu mbembisa vathu nya guage, silo sesi satshavbo, si na tadzisega.
8 # Wona gambe: Gutu 12:14. Mahungu yaya, nyi di mapwa aholu kha nya ma pima gilo. Khu guralo, nyi di wudzisa, kheni: “Mune wangu, si na hegisa kharini silo sesi?”
9Uye a di nyi embela, khuye: “Dhaniyeli, indra, kholu mahungu yaya ma segedwe ni gulemwa kala gikhati nya mahegiso.” 10#Wona gambe: Gutu 22:11. Va nya gutala va na handzwa va aga ni gu lingwa, aholu va nya guvivbedwa khu myonyo va na gira silo nya guvivbe, mwalo nya avo a na gu si pimago, aholu va nya guti, va na si pima. 11#Wona gambe: Dhan 9:27; 11:31; Mat 24:15; Mark 13:14. Gukhugela avbo gu na gu fuviswago phaso nya litshigu ni litshigu, gu vegwa manyala nya gunyenyeze, gu na vegwa likhumi na mavili mazana ni livbandre na mana magumi matshigu (1.290). 12Kategide wule a na gu lirelago kala guvbela likhumi na mararu mazana ni magumararu na livbandre matshigu (1.335).
13“Gasi olu uwe Dhaniyeli, simama ndzilani gwago u timisela kala gikhati nya mahegiso, kholu u na hefemula, khu litshigu nya mahegiso u hakha tshatshazelo yago.”
Currently Selected:
Dhaniyeli 12: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
