Bheni Siraki 4
4
Mithumo nya wuhindzi
1Mwanangu, u nga songi gisiwana,
gambe u nga digi maho ya sisiwana
nya sikhongolo ma khunguvanyega.
2U nga hembululi uye apwago ndzala,
u nga khuvegisi gisiwana muguhamugani gwaye.
3U nga vbisisi monyo gisiwana,
gambe u nga digi gu ninga zomola ga wule
a gu ni ndzala.
4U nga bombi gu ninga uye a lombago
khu wusiwana,
ambari gu gikha marundra
gisiwana.
5U nga khedzi phuvbo wa gu wona gisiwana,
gambe u nga ningi wulanga muthu
a gu vala.
6Kholu a gu gu vala khu guvbisega
monyoni gwaye,
Mugiri waye a na yingisa
nombelo waye.
7Wonegisa gurula
vbakari nya tshangano;
dzi nogise mbeli ga muthu
khongolo.
8Yingisa gisiwana khu
monyo nya wadi,
u gi phindrula khu gurula
ni wuwadi.
9Vbulugisa uye a tshaniswago
mandzani ga mutshanisi,
aholu, wa gu lamula,
tiya u lamula khu lisine.
10Khala babe nya sigulungu,
ni mwama wa vamayi vawe;
u na khala kha nga gyanana gya oyu
a Khusegidego Ngudzu,
uye a na gu gola ngudzu guvbindra
mayi wago a nga gu velega.
Giphaso nya guti
11Guti gu ngu khusedza sanana saye,
gu ngu vhikela vale va gu vbwetago.
12Uye a golago guti, a ngu gola
guvbanya,
ni uye a vindrugago a gu vbweta,
a na tala khu gunengela
13Uye a gu manago, a na mana thomba
nya wudhumo,
Pfhumu a na mu kategisa ni evbini
a na gu belago.
14Avo va thumelago guti, va ngu khozela
Uye a Agidego, ni vale va gu golago,
va na godwa khu Pfhumu.
15Vale va thelago kota khu guti, va na
lamula mayigo
ni vale va gu yingisago,
va na simama gu khala
na va tiyide.
16Uye a tumbago guti a na gu
hakha kha nga thomba,
ni situgulwana saye si na hodza
dzithomba dzaye.
17Guphelani, guti gu na mu gimbidzisa
khu dzindzila nya gugaradze;
gu mu thela hwanga ni rerema,
gu na mu thusedzela khu nayo waye;
uye nasi gu tumbegi, guti
gu na phela khu gu mu linga khu sileletelo saye.
18Khavbo gu natago gwaye
khu ndzila nya gululame,
gu na mu gira a nengela, ni gu mu
tugudzisa misihalo yaye.
19Aholu uye a gu tshuka a ndreya
ndzilani,
ugo gu na hambana naye,
gu mu ningela mandzani nya tshanisa.
Magana nya gutumbege
20Khala na wu gengede guvbanyani
gwago gwatshavbo,
u vhika gu manwa khu mhango,
gasi u si dzi theli dzitshoni wabune.
21Kholu dzomo dzitshoni dzi gu
yisago mu gighohoni,
ni dzitshoni dzi gu ningago wuhigo ni wudhumo.
22U nga lamuli u dzi kalavela
wabune,
gambe u nga dzi gireli mhango
khu gukanakana.
23U nga deguli,
gikhati u yelago gu ganela,
ambari gu siha guti gwago khu
matshandza.
24Kholu guti ga muthu gu tidwa
khu maganelelo yaye,
ni sihevbulo saye sa gu tidwa khu magana yaye.
25U nga ganedzi lisine,
aholu pimisa gwadi wupumbu wago,
26u nga khali dzitshoni gu dawulela
siwono sago,
gambe u nga hambeli u hambana
ni gundrindra nya mwedzi nya tsongo.
27U nga dzi digi u fumedwa khu muthu nya
guvivbedwe khu monyo,
u nga dzi rengisi ga muthu nya gughanye.
28Dwanela lisine kala ufa,
gasi Pfhumu Nungungulu a
gu dwanela nuwe.
29U nga ganeli khu dzihanyi,
u khala ngara ni gumba khathala
mithumoni gwago.
30Ndrangani gwago u nga bhongi
nga nghala,
u dzi gira mukhozisi ni muthu nya dzihanyi
ga sithumi sago.
31Mandza yago ma nga tulegi basi
gasi gu hakha,
aholu ma fumbaredza gasi gumba
ninga vakwanu.
Currently Selected:
Bheni Siraki 4: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.