Bheni Siraki 2
2
Gutiya musilingoni
1Mwanangu, wa gu bela thumoni
ga Nungungulu,
dongisela hefemulo wago gu dwana
ni silingo.
2Lulamedza monyo u tiya,
wa gu wona mhango, u nga garadzegi.
3Dzi vegedze u namarela avbo Gwaye,
u nga hambani naye,
gasi u mane gudugelela guhegisani nya
guvbanye gwago.
4Dzumela satshavbo si na gu gudugelelago
u timisela gutshaniswa khu silingo nya gugupoyile,
5kholu ndralama ya gu lingwa niloni,
aholu sihathwa sa Nungungulu sa gu lingwa
khalini nya sigaradzo.
Madwalini ni wusiwanani, tumba Uye.
6Tumba Nungungulu, Uye a na gu vbanyisa,
lulamedza dzindzila dzago u tumba Uye.
Tumba Pfhumu Nungungulu.
7Enu mu ningago githawo Pfhumu Nungungulu,
tumbani wuhindzi waye,
mu nga ndreyi, gasi mu si thegi.
8Enu mu ningago githawo Pfhumu,
tumbani uye,
kha mu na hamuga tshatshazelo yanu.
9Enu mu ningago githawo Pfhumu,
lindrelani dzithomba dzaye, gunengela nya gupindruge,
ni gu giredwa wuhindzi,
kholu tshatshazelo yaye giningwa
ni gunengela nyamba vbela.
10Alakanyani mimela ya gale, mu
wonani gukhenu:
Khu mani a nga tumbago Pfhumu Nungungulu,
a wuya khavbo a gu kanganyisega?
Khu mani a simamidego guthava Pfhumu
Nungungulu, a nga digwago?
Mwendro khu mani a lombidego gwaye,
a dzipwa na si thedwi kota?
11Kholu Pfhumu rude, gambe a na
ni wuhindzi,
a ngu tsetselela sighoho, a vbanyisa
gikhatini nya wuvi.
12Libango ga oyu a gu ni monyo
nya wudambane,
ni mandza ma vbedego tshivba,
ni gighohi gi gimbilago khu dzindzila
dzimbili!
13Libango ga wule a gu ni monyo wu
vbedego tshivba,
kholu, kha khodwi;
khu guralo, kha na mana guvhikedwa!
14Libango ga enu mu gumba timisela,
mu na gira ginani avbo Pfhumu Nungungulu
a na gu mi hengulago mithumo yanu?
15Avo va ningago githawo Pfhumu Nungungulu,
kha va kanyisi magana yaye;
avo va mu golago, va gu simama
ndzilani gwaye.
16Avo va ningago githawo Pfhumu Nungungulu,
va gu zama ndzila nya gu mu nengedzise,
ni avo va mu golago, va ngu khuriswa khu
Nayo waye.
17Avo va ningago githawo Pfhumu Nungungulu,
va gu dongisela myonyo yawe,
va dzi nogisa mbeli gwaye, khavo:
18“Hi na dzi these mandzani ga Pfhumu
nasiri mandzani nya vathu,
Kholu wuhindzi waye wa gu fanana ni
wugulu waye.”
Currently Selected:
Bheni Siraki 2: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.