Bheni Siraki 18
18
Wugulu wa Nungungulu
1Uye a vbanyago kala gupindruga,
khuye a giridego silo satshavbo, khu magirelo ya mamowo.
2Pfhumu basi khuye a lulamidego,
mwalo mumbe vbavbandze gwaye.
3Khuye a fumelago litigo khu guruma
nya gyandza gyaye,
satshavbo sa gu yingisa gugola gwaye;
kholu Uye khuye mufumeli nya silo satshavbo
gambe khu tshivba yaye a ngu
hambanisa silo nya guagiswe niso nya nyalidede.
4Mwalo a ningidwego gu huwelela sigiro saye,
khu mani a dzi kodzago gu tugula wugulu waye?
5Khu mani a na dzi kodzago gu pimisa
tshivba yatshavbo nya wugulu waye?
Khu mani a dzi kodzago gu sasamedzela
wuhindzi waye?
6Gimwalo gi kodzwago gu vbungudwa
mwendro gu engedzedwa,
ambari gu tugula sisamadziso sa Pfhumu.
7Avbo muthu a na gu manegago na vbede
uye a na bani nari guhegulani;
a gu hegisa, uye a na simama.#18:7 Mulovi a gu hi embela gukhuye, muthu a ngu dzi kodza gu muti Nungungulu (Rom 1:19-32), aholu, wugulu wa Nungungulu womo vbatshani ngudzu nyamba manedwa khu mapimo yathu. Ambari hi dzi kodza gu Muti, gikhati gyatshavbo ga gu manega kha nga sanana si phelago gu khafula (Siraki 43:27-32). Gukenelela gogu nya muthu gwa gu wonegisa wugulu wa Nungungulu.
Muthu khandri gilo
8Gasi ginani muthu,
a gu phasa ginani?
Khu wevbini wuwadi waye, khu wevbini
wuvivbi waye?
9Gulapha nya matshigu nya guvbanye nya muthu,
khu gutala gakone, lizana myaga basi,
ga mwaga moyo ni moyo, kha dzi kodzi gu pima
gikhati nya gufe gwaye.
10Aholu kha nga lidodoto nya mati ya phwani,
mwendro tsheta nya mafu,
kharato niyo myaga yaye, ya gu dinganiswa ni litshigu
nya gupindruge.
11Khidzo kharato Pfhumu Nungungulu a gu
mutimiseli ga vathu,
a guhula wuhindzi waye vbakari gwawe.
12Uye a ngu wona ni gu dziti nya gukhuye
mahegiso yawe khya dzitshoni.
Khidzo kharato uye a engedzelago avbo gwawe
divalelo waye.
13 # Wona gambe: Dzind 145:9. Gisiro gya muthu, gya gu kongoma
gu girela muthu kwawe,
aholu wuhindzi wa Nungungulu wa gu thaphela
ga sivangwa satshavbo si vbanyago#18:13 Wuhindzi wa Pfhumu Nungungulu ga vathu nya mayigo yatshavbo, ambari vbavbandze ga Israyeli, mahungu maphya umo nya Testamenta ya Gale. Ha guphela gu ma mana umo nya Ndzimo 145:9 ni Guti 11:13-16; Jona 4,11. Avba, Mulovi a gu ganela khu wuhindzi wa Nungungulu ga vathu vatshavbo, kha nga ndzila nya guhevbudze gwa Nungungulu.
a ngu kawuka, a tsayisa, a hevbudza ni gu
mu hetedza, kha nga muhavisi, ni tshambi waye.
14Uye a ngu pwela wuhindzi vale va hakhago
sihevbudzo saye,
ni vale va vbiredzelago gu landrisa sileletelo saye.
Wuwadi, wugengeli ni makhalelo nya gurule
15Mwanangu, u nga patedzeli gukawuka ni
gupwela wuhindzi,
ambari gu engedzela magana nya gulemele
ga ningelo wago.
16Ina thondrwane kha yi dzidzidzi guvbisa
nya gukhongolo, gani?
Kharato nugo, lito limwedo li ngu dzi kodza
gu phasa ngudzu guvbindra ningelo.
17Ina lito limwedo kha li dzi kodzi guphasa
guvbindra muthu nya gitetema, gani?
Satshavbo sa sivili somo ga muthu
nya wuhindzi.
18Muthu nya gipumbu
a gu kawuka khu dzihanyi;
ningelo wa muthu nya lidiwo wa gu
vbisisa maho.
19Nu si gu ganeli, phela khu gu dzi hevbudza;
nu si gu mani madwali, dzi sayise.
20Nu si gu lamudwi dzi wudzise wabune
u na kodza gutsetseledwa gikhatini nya thethiso.
21Nu si gu mani madwali, dzi sodzise,
wa gu bani u ghohide, dzi yeyedze gu dzi laya ni
guvbindrugedza mavbanyelo.
22Gi nga manegi nya gu gu thindrekise
gikhatini nya gulandrise gisambanyo gyago,
u nga huniseli kala gufa nyamba tadzisa
fanelo yago.
23Nu si gu giri gisambanyo, dzi dongisele,
gasi u si khali muthu nya gulinge Pfhumu.
24Dundruga likhulo nya litshigu nya guhegise,
gikhati Nungungulu a na gu tsayisago
a gu sihela khovbe yaye.
25Gikhatini nya gumane nya singi, alakanya
gambe gikhati nya ndzala,
litshigu nya gughanye, dundruga gambe
gikhati nya wusiwana ni wumbwa.
26Kha nga damboni gu vbindrugedzelago,
gukhugela dzimindrudzile kala silambo,
kharato gambe satshavbo si ngu vbindra
mahoni ga Pfhumu.
27Muthu nya guti, gu khala na lirede
gikhati gyatshavbo,
litshigu nya gulingwe a na dwana ni giwono.
28Muthu watshavbo a gu ni mapimo
a ngu tugula guti,
a ngu zundza wule a gu manego.
29Vathu nya maganelelo nya ndruda,
va gu vbanya khu guti,
va guhula kha nga ndzadzi mavingu nya misihalo.
I tshukhwana gutumba Pfhumu mweyo basi
guvbindra gu namarela ga mufi
khu monyo nya gufe
30U nga dzumeli gu pengiswa khu
gunavela gwago nya guvivbe,
dzi phare ga wudogodogo wago.
31Wa gu tsakisa lidora nya monyo wago,
esi si na gira valala vago va ghiya.
32U nga tsakiswi khu gu mana wurendra ni gukhalega
nya gwadi,
ambari gu dzi gurumedza gu livbela
mitengo yakone.
33U nga dzi theli wumbwa khu mibuzo,
nya dzitsapawu nya gufuyari,
borisani gwago nuri mwalo.
Khidzo saye ni gu dzi dembela
naphwi wabune.
Currently Selected:
Bheni Siraki 18: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.