Dzindzimo 9
9
Gubonga Nungungulu
Ga tsawa nya vaembeleli. Ndzimo ya Dhavhidhe
1Nyi na gu bonga, Pfhumu Nungungulu,
khu monyo wangu watshavbo,
nyi na huwelela mithumo yago yatshavbo!
2Nyi na tsaka nyi nengela khu uwe,
nyi na dhumisa lina lago khu dzindzimo,
uwe u khusegidego vbatshani ngudzu.
3Wa gu vboha uwe, valala vangu va gu bwelela hwane,
va tshunganela va mwalalega mbeli gwago.
4Kholu uwe wa gu ema gumogo ni eni;
u khade phathani u lamula khu nayo ni gululama.
5U kawukide mayigo, u fuvisa vathu nya guvivbedwe khu monyo,
u futide malina yawe kala gupindruga.
6Valala va mbembide muphelo,
madhoropa yawe ma di tshala marumbi basi,
mwalo gambe a na gu va alakanyago.
7Aholu, Pfhumu Nungungulu, a ngu fuma kala gupindruga,
khade vbagikhalotunu gwaye nya gulamule mahungu.
8Uye kamwe a ngu lamula litigo khu gululama,
a lamula mayigo khu nayo.
9 Pfhumu Nungungulu a na khala wuthavelo wa vale va saniswago,
a va hakha a va tiyisa vbakari nya sigaradzo.
10 Pfhumu Nungungulu, vatshavbo vatigo lina lago,
va gu tumba uwe,
kholu uwe gima khu digi avo va gu vbwetago.
11Embelelani ga Pfhumu Nungungulu, a vbanyago Siyoni,
tivisani sigiro saye vbakari nya mayigo.
12Nungungulu a ngu alakanya avo va sanisekago,
gima kha divaledwi khu gulila gwawe,
a ngu tsayisa vasongi.
13Nyi pwele wuhindzi, Pfhumu Nungungulu;
wona wusiwana nyi giredwago khu vale va nyi vengago!
Nyi wuse u nyi dusa kanani nya lufu.
14Nyi fela gu embelela wuzundzo
dzinyangwani ga gyagadzyana gya Siyoni,
nyi nengela kholu u nga nyi vbanyisa.
15Vathu nya mayigo va di thegela phalani va nga kembago,
mawundru yawe ma di modwa khu
mazinga va nga ma riyago vabune.
16 Pfhumu Nungungulu a dzi yeyedzide,
khu gulamula gwaye nya gululame;
oyu nya guvivbe monyo, a di konwa khu malipha yaye.
17Va nya guvivbedwa khu monyo, va na dzudzugwa phalani nya vafi,
gumogo ni vathu vatshavbo va si khathaligo khu Nungungulu.
18Kholu gisiwana kha gi na divadwa muphelo,
gutumba nya vathu nya gusolege kha gu na khala liphanga.
19 Pfhumu Nungungulu, wuga u nga digi muthu a gu yeyisa!
Mayigo yatshavbo ma nate ma ta lamudwa mbeli gwago!
20Va thele hwanga, Pfhumu Nungungulu;
va nya mayigo va na dziti gukhavo vathu basi.
Currently Selected:
Dzindzimo 9: BGG2014
Highlight
Share
Compare
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
