Dzindzimo 86
86
Nombelo nya gulombe guphaswa khu Nungungulu
Nombelo wa Dhavhidhe
1Uwe Pfhumu Nungungulu, neredza ndzeve u nyi yingisa
u nyi ninga phindrulo,
kholu nyi musaniseki ni muhamugi.
2Vhikela womi wangu, kholu
eni nyi mukhodwa wago nya gutumbege;
uwe khuwe Nungungulu wangu,
vbanyisa githumi gyago gi gu tumbago.
3Nyi pwele wuhindzi Pfhumu,
kholu gikhati gyatshavbo nyi ngu lila mbeli gwago.
4Pfhumu tsakisa hefemulo wa githumi gyago,
kholu nombelo wangu nyi ngu wu khusedzela iyo gwago.
5Kholu uwe Pfhumu, u wadi u ngu tsetselela;
u ngu hakha khu mandza mavili
vatshavbo va gu khozelago.
6Yingisa Pfhumu Nungungulu, nombelo wangu
yingisa lito nya milombelo yangu.
7Musigaradzoni, nya gu lila avbo gwago,
kholu uwe u ngu nyi hakha.
8Vbakari nya vanungungulu vatshavbo
mwalo a fananago ni uwe, Pfhumu;
mwalo a kodzago gu gira mithumo uwe u yi girago.
9 # Wona gambe: Gutu 15:4. Mifumo yatshavbo u yi giridego
yi nata khidzima mbeli gwago uwe Pfhumu,
yi na dhumisa lina lago.
10Kholu khuwe basi u gu Nungungulu,
u gu khongolo, u girago siliwugiso!
11Nyi hevbudze Pfhumu ndzila yago,
gasi nyi kodza gu gimbila lisineni.
12Nyi na gu bonga Pfhumu Nungungulu wangu,
khu monyo wangu watshavbo,
nyi na dhumisa lina lago kala gupindruga,
13kholu wuhindzi wago wungi avbo gwangu,
u vbanyiside womi wangu phalani nya lufu.
14Oh, Nungungulu, nyi ngu wugedwa khu va nya matshandza,
tsawa nya sighevenga va ngu vbweta gu nyi songa;
avo kha va khathali khu uwe.
15Aholu uwe Pfhumu, u Nungungulu u pwelago gisiro u tade khu wuhindzi,
u ngu timisela, u tade khu wuhindzi ni lisine.
16Thendregedza eno gwangu, u nyi pwela wusiwana;
ninga tshivba yago githumi gyago
vbanyisa gyanana gya githumi gyago nya nyamayi.
17Nyi ninge giyeyedzo nya wuwadi wago,
gasi va gi wone avo va nyi vengago
va khale dzitshoni,
kholu uwe Pfhumu Nungungulu u ngu nyi phasa ni gu nyi tangadzisa.
Currently Selected:
Dzindzimo 86: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
