Dzindzimo 66
66
Ndzimo nya gubonge
Ga muthangeli nya tsawa nya vaembeleli. Ndzimo ni gizimba
1Wombani mikulungwane nya gutsake
mu dhumisa Nungungulu,
enu vathu nya mayigo yatshavbo.
2Embani dzindzimo nya gukhusedze lina laye,
yeyedzani githawo khu gu mu dhumisa!
3Embelani esi Nungungulu, khenu: “Sigiro sago si ngu samadzisa ngudzu!
Valala vago va gu ndrendremela mbeli gwago,
kholu tshivba yago yikhongolo.
4Vathu vatshavbo va tigoni va ngu gu khozela,
va emba dzindzimo nya gurungudze lina lago.”
5Deluni muta wona mithumo ya Nungungulu;
wonani silo nya gusamadzise a giredego vathu.
6 # Wona gambe: Eks 14:21; Jos 3:14-17. Vbindrugedzide yiphwa yi khala litigo nya gubange,
va di tshatuga tsongo khu mawundru.
Hi na nengele avbo gwaye.
7A gu fuma khu tshivba yaye kala gupindruga,
gikhati gyatshavbo a gu khedzisela vathu va tigoni,
gasi avo nyambana githawo va si dzi khusedzi.
8Enu va nya mayigo, bongani Nungungulu wathu;
gu na pwale lito la avo va mu dhumisago;
9uye a vbanyisago mihefemulo yathu;
kha dzumela gukhuye migondro yathu yi tshunganela.
10Kholu uwe Nungungulu u hi lingide,
u hi agisa kha nga idzo yi agiswago khidzo parata.
11U hi digide hi modwa khu naphwi;
u hi rwegide rwalo nya gulemele ngudzu;
12u hi ningede hi gandredzedwa khu valala vathu;
u hi vbindrisa khu niloni ni matini,
olu, khu guhegisa u hi duside, u hi vbohisa tigoni nya ladi,
nya gukhadzisege.
13Nyi na bela Nyumbani gwago nyi gu ninga
mhamba nya phaso nya guvbiswe;
nyi na tadzisa kharati gisambanyo nyi giridego.
14Situmbiso nyi giridego khu likana langu,
avbo nyi nga bani nyiri sigaradzoni.
15Nyi na hatha sifuyo nya gunone,
dzimombe, dzinvuta, dziphongo;
nyi ta gu girela mhamba nya miphaso nya guvbiswe,
nya mahema nya gunungele.
16Deluni enu mwatshavbo mu gu ni githawo ga Nungungulu,
deluni mu ta nyi yingisa nyi na mi embeledzela mithumo a nyi giredego.
17Eni nyi di mu rungudza khu dzindzimo
nyi mu rana nyi lomba guphaswa.
18Naripwani nyi di alakanya guvivba monyoni gwangu,
Pfhumu gima na sa nyi yingisa.
19Aholu, Nungungulu a nyi yingiside
ni gu hakha lito nya nombelo wangu.
20A na bongwe Nungungulu,
kholu a ngamba bomba gu hakha nombelo wangu,
gambe kha bomba gu nyi ninga wuhigo waye.
Currently Selected:
Dzindzimo 66: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
