Dzindzimo 65
65
Nungungulu fanede gu dhumiswa
Ga muthangeli nya tsawa nya vaembeleli. Ndzimo ya Dhavhidhe
1Uwe Nungungulu u fanede gu dhumiswa Siyoni!
Esi vathu va sambanyidego,
va fanede gu gu ninga.
2Uwe u yingisago milombelo,
vathu vatshavbo va nata avbo gwago.
3Mithumo yathu nya guvivbe
yi ngu hi lemela guvbindra pimo,
aholu uwe u ngu hi tsetselela siwono sathu.
4Kategide muthu u mu hathago
a hidzimela vbafuvbi gwago,
gasi guta vbanya nyumbani gwago,
ethu nethu hi ngu nengela khu esi nya sadi
sa Nyumbani gwago nya guage.
5Nungungulu muvbanyisi wathu,
Uwe u ngu hi hakha ni gu hi vbanyisa
khu gu gira silo nya gusamadzise;
litigo latshavbo la gutumba uwe,
ni avo va guromo linene ga hwindzo.
6Uwe u ngu tiyisa sigomo,
khu wugulu nya tshivba yago.
7Uwe u ngu degudza ligwaha nya linene,
ni mavimbi yaye,
u vbedza ligwaha la vathu va tigoni.
8Ni ava va vbanyago mayigoni ya mahegiso nya mafu,
va ngu samala siliwugiso nya mithumo yago;
gukhugela Khugadambo kala Muhwadambo,
gu pwala mikulungwane nya gutsake.
9U ngu khatalela litigo u li sayisa;
u li rumela ndzadzi ni gu li velegisa mihandro;
u ngu tadza mitsongo khu mati ni gu dandrisa sivbila,
u ngu dongisela kharati wulime.
10Wa gu naganisela gwadi mikova nya litigo,
u lulamisela gwadi mafu nya wulime
u wisa ndzadzi u nonisa litigo,
u gu kategisa mihandro yaye.
11U tshambiside mwaga watshavbo
khu makategwa yago,
wulanga ni wulanga u vbindrago,
vathu va gu fuma va hodza va khura.
12Giwula gya gu fenengedzwa khu mwasi nya gunyuge,
sigomo sa gu ambala gungangamela.
13Mapani ma gu tala khu mitshambi,
mikova yi fenengedzwa khu sivbila;
vatshavbo va gu emba va kulungela khu gunengela.
Currently Selected:
Dzindzimo 65: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
