Dzindzimo 14
14
Nungungulu a ngu emela va nya gululama
Ga muthangeli nya vaembeleli. Ndzimo ya Dhavhidhe
1Muthu nya giphuguphugu a gu ganela monyoni gwaye, khuye:
“Nungungulu mwalo!”
Mithumo yaye yi nyenyezide,
mwalo na moyo a girago nya sadi.
2 Pfhumu Nungungulu a di noga a khedzisa khu ndzadzini,
a wona sanana nya vathu,
khuye a na mana moyo nya wadi,
mwendro moyo a vbwetago Nungungulu.
3 # Wona gambe: Rom 3:10-12. Aholu, vatshavbo va pengide,
va lamade;
mwalo na moyo a girago nya sadi,
mwalo ni moyo basi.
4Ina va nya guvivba vatshavbo kha va pimi gilo, gani?
Va gu tsagudzela vathu vangu,
nga khwatshi va gu hodza gibaba,
nyamba rana lina la Pfhumu Nungungulu.
5Va na ndrendremela khu hwanga
kholu Pfhumu Nungungulu a gu ema
ni vale va lulamidego.
6Enu mu zamago gu sega wusingalagadzi nya sisiwana,
dzitini gukhenu Pfhumu Nungungulu
khuye wuthavelo wawe.
7Nari pwani khu Siyoni, gu nguta
guvbanyiswa ga Israyeli!
Gikhati Pfhumu Nungungulu a na wuyisago nyaluphye
sanana nya vathu vaye si vbagedwego,
Jakobe a di hadza gu womba mikulungwane,
Israyeli a di hadza gunengela ngudzu.
Currently Selected:
Dzindzimo 14: BGG2014
Highlight
Share
Compare
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
