Dzindzimo 138
138
Ndzimo nya gubonge Nungungulu khu gutumbega gwaye
Ndzimo ya Dhavhidhe
1 Pfhumu Nungungulu, nyi na gu bonga khu monyo wangu watshavbo,
nyi na embelela dzindzimo nya gubonge uwe mbeli ga vanungungulu.
2Nyi na khidzima nyumbani gwago nya guage
nyi rungudza lina lago khu wuwadi ni lisine lago;
kholu u dandriside situmbiso sago vbatshani nya sigiro satshavbo.
3Litshigu nyi nga lila gwago, u nyi hakhide;
u engedzela tshivba nya hefemulo wangu.
4Vafumeli vatshavbo va mafuni va na dhumisa uwe Pfhumu Nungungulu,
avbo va na pwago mahungu ya kanani gwago.
5Va na embelela va dhumisa sigiro saye,
kholu wudhumo wa Pfhumu Nungungulu wukhongolo.
6Ambari ulo Pfhumu Nungungulu a guromo vbatshani ngudzu,
Uye a ngu yingisa avo va dzi sodzisago;
va nya matshandza, a gu vati nari khu hwindzo.
7Nya gu bani nyiri vbakari nya dzimhango, uwe u ngu nyi vbanyisa,
wa gu thawuludza libogo lago la nyamudye
u nyi vhikela ga valala vangu;
u nyi vbanyisa khu tshivba yago.
8 Pfhumu Nungungulu a na vbohisa mahegiso,
thumo waye nya wadi a wu phedego gu wu gira avbo gwangu,
Pfhumu Nungungulu, lihaladzo lago li ngu simama kala gupindruga,
uwe Pfhumu Nungungulu, u nga digi ndzilani thumo nya mandza yago.
Currently Selected:
Dzindzimo 138: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
