Dzindzimo 122
122
Nombelo nya gulombe gurula Jerusalema
Ndzimo ya avo va gwelago nombelotunu. Ndzimo ya Dhavhidhe.
1Nyi nengede gikhati nyi nga embedwa, gupwani:
“Hongoleni Nyumbani ga Pfhumu Nungungulu!”
2Migondro yathu yi vbohide
dzinyangwani gwago uwe Jerusalema!
3Jerusalema, lidhoropa li vbahidwego gwadi li tiya,
li vbahidwego khu gu mburisedwa.
4Khiyo ma gwelago ma ya tombana mahundzu ya Pfhumu Nungungulu,
gasi guya tadzisa dzifanelo nya nayo wa Israyeli,
dzifanelo nya nayo wa Israyeli,
gasi guya rungudza lina la Pfhumu Nungungulu.
5Si vegidwe iyo sikhalo nya gulamule mahungu,
sikhalo nya wufumu wa nyumbani ga Dhavhidhe.
6Lombelelani gasi gu manege gurula Jerusalema!
Va na vbanye na va tangade avo va gu golago.
7Gu na tale gurula mabhiyoni gwago
ni gutangala dzinyumbani gwago nya wufumu.
8Khu lihaladzo nyi lipwago khu valongo ni dzipari dzangu,
nyi na, kheni: “Gurula gu na khale ni uwe!”
9Khu kotani nya lihaladzo nya Nyumba ya Pfhumu Nungungulu wathu,
nyi na gu lombela makategwa.
Currently Selected:
Dzindzimo 122: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
