Dzindzimo 104
104
Ndzimo nya gurungudze Pfhumu Nungungulu muvangi nya satshavbo
1Uwe hefemulo wangu, bonga Pfhumu Nungungulu!
Pfhumu Nungungulu wangu, u khongolo ngudzu!
U ambade gungangamela ni wugulu!
2U ambade wenengedzo kha nga gifenengelo,
u gu ladza ndzadzini gu fanana ni lilwambi.
3U vbahide dzinyumba dzago matini ya vbatshani,
u giride kareta yago khu mapfhi,
u gimbila dzimbapini nya phuvbo.
4 # Wona gambe: Hebh 1:7. Wa gu gira dziphuvbo dzi khala dzingilozi dzago
ni malavbelavbe nya nilo ma khala sithumi sago.
5U tiyiside litigo khu madingo nya gutiye,
gima kha li na nga khuyuga gambe.
6U fenengedzide litigo khu linene khwatshi mwendra,
mati ma di gu ema vbatshani nya sigomo.
7Aholu, khu gu ma kawuka gwago, ma di tutuma,
ma di thuruga ma thava khu gupwa gudzuma nya lito lago.
8Sigomo si di khugega, gu kembega mikova,
kala malangani, u si emisedego gu khala avbo.
9U vegide vbingano gukhuwe mati ma nga wu vbindri,
ayo gima kha ma na wuya ma fenengedza gambe litigo.
10U pode sifefe nya mati mikovani,
gu khulunga mitsongo vbakari nya sigomo.
11Sirengo satshavbo nya likhabi sa gu sela umo;
ni dziburu nya likhabi dza gu tshima umo lidora.
12Bambe nya mitsongo, sinyoni sa ndzadzini sa gu vbaha sihaga sawe,
si embelela matamoni nya misimbo yakone.
13Khu nyumbani gwago, u ngu rumela dzindzadzi dzi naganisa sigomo,
u khurisa litigo khu mihandro nya makategwa yago.
14U ngu dandrisa mwasi nya guhodzwe khu sirengo,
ni mitongwe nya guhodzisele vathu,
gasi va kodza gu mana guhodza marembweni gwawe.
15Mafu ma ngu ninga vbinyu yi tsakisago myonyoni nya vathu,
mafura ma nyelugisago dzikhovbe,
ni guhodza gu wusedzago tshivba.
16Misimbo ya Pfhumu Nungungulu yi khuride,
misimbo nya sedhari ya Libhanoni
a nga yalago Pfhumu Nungungulu,
17sinyoni sa ndzadzini sa gu gira umo sihaga sawe,
va nya mangondrongondrwane va gu vbaha dzinyumba dzawe mindzirini.
18Sigomo nya gulaphe, wuthavelo nya dziphongo nya likhabi,
sihulo sa gu thavela dziphagoni nya siwindri.
19U giride ngima gasi gu kabanisa dzinango,
lidambo li ngu giti gikhati li pfolago khigyo.
20Gwa gu gira wutshigu gwa gu khala gidema,
sirengo satshavbo nya likhabi sa gu duga si handra.
21Singhalana sa gu ngurangura si sota sirengo nya pfimba,
sa gu lomba gu hodziswa khu Nungungulu.
22Aholu, gikhati li dugago lidambo iso sa gu bwelela,
si ya lala mavbalani gwawe.
23Khavbo a dugago muthu a hongola mithumoni gwaye,
aya thuma mihani yatshavbo kala silambo.
24Uwe Pfhumu Nungungulu sigiro sago si tade!
U si giride satshavbo khu guti ni mapimo,
litigo li tade khu sigiro sago.
25Nga wona linene nya likhongolo nya guaname,
gu vbanyago umo sivangwa nya singi nyambana tengo;
sirengo nya sikhongolo nesi nya sidugwane.
26 # Wona gambe: Dzind 74:14. Gwa gu gimbila umo mataro,
ni nyoga nya yikhongolo levhiyatani u yi giridego yi khala umo.
27Sivangwa satshavbo sa gu virela uwe,
gu si ninga guhodza khu gikhati gi fanedego.
28Khuwe u si ningago guhodza iso si rolela;
wa gu tula mandza yago, iso sa gu hodza si khura.
29Wa gu si sihela khovbe yago, iso sa gu vbela tshivba;
wa gu si dzegela hefemulo, iso sa gufa,
si bwelela si khala gambe kudzudzwane.
30Wa gu rumela liphuvbo lago, sa gu wuya si vbanya,
u wusedza kharati khovbe nya litigo yi khala yiphya.
31Wudhumo wa Pfhumu Nungungulu,
khwa gu kala gupindruga!
Pfhumu a na nengele khu mithumo yaye.
32A gu khedza litigo ilo la gu ndrendremela;
a gu kuha sigomo, iso sa gu tuviga wutshi.
33Nyi na embelela ga Pfhumu Nungungulu na nyi nga gu vbanya,
nyi dhumisa Pfhumu Nungungulu wangu na nyi ngari mafuni.
34Gupimisa gwangu gu na tsakise Uye,
eni nyi na nengela ga Pfhumu Nungungulu.
35Sighohi si na fuviswe mafuni momu,
ni va nya guvivba va nga manegi gambe,
Uwe hefemulo wangu bonga Pfhumu Nungungulu.
Bongani Pfhumu Nungungulu.
Currently Selected:
Dzindzimo 104: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
