Mavingu 3
3
Gululeka nya guti
1Mwanangu, u nga divali nayo wangu,
aholu vega monyoni gwago sirumo sangu,
2kholu si na gu engedzela matshigu
yago nya guvbanye,
si andrisa ni gu rudzisa womi wago.
3Wuhindzi ni gutumbega u nga hambani naso!
Si hungelele thamoni gwago,
u si lova monyoni gwago!
4 # Wona gambe: Rom 12:17; 2 Kor 8:21. Khu guralo, u na mana gukatega ni mapimo nya yadi
mbeli ga Nungungulu ni ga vathu.
5Tumba Pfhumu Nungungulu khu monyo wago watshavbo,
u nga tumbi basi wugengeli wago!
6Alakanya Uye dzindzilani gwago gwatshavbo,
Uye a na lulamisa dzindzila dzago.
7U nga dzi giri gigengeli mbeli Gwaye,
thava Pfhumu Nungungulu, u hambana
ni silo nya guvivbe.
8Esi si na vbanyisa givili gyago,
si tiyisa marambo yago.
9Rungudza Pfhumu Nungungulu khu silo u gu naso,
ni mihandro nya guhegule ya mahangeni gwago.
10Sisangala sago si na tala khu mavbila,
ni miphongolo yago yi na tala khu wadwa.
11 # Wona gambe: Job 5:17; Hebh 12:5. Mwanangu, u nga bombi gu kawukwa khu
Pfhumu Nungungulu,
a gu gu tsayisa, u nga gorogi.
12 # Wona gambe: Hebh 12:6; Gutu 3:9. Kholu Pfhumu a gu kawuka uye a mu golago,
kha nga babe a vbwetago wuwadi ga
gyanana gyaye.
13Kategide muthu wule a manidego guti
ni mapimo
14kholu guti gu ngu phasa guvbindra parata,
ni mihandro yaye ya guvbindra ndralama
nya guhutwe.
15Guti gu na ni lisima guvbindra sombo nya gukhedzige,
gimwalo igyo u yelago gu gi gola nya gufanane ni ugo.
16Gulapha nya matshigu nya guvbanye;
gomo mandzani gwaye ga nyamudye;
khu mandzani gwaye ga nyambade,
yomo thomba ni wuzundzo.
17Dzindzila nya guti, dza gutsakisa basi,
ni sindzilana saye satshavbo, khya gurula.
18Guti Simbo wu ningago womi
ga vale va gu manelago,
va kategide vatshavbo va gu sayisago.
19Khu guti, Pfhumu Nungungulu a di vanga
siseketelo nya litigo,
a emisa damboni khu gupimisa.
20Khu guti gwaye ya gu tulega milondrwa nya guete,
mapfhi ma thesa thondrwane.
21Mwanangu, silo sesi si nga hambani ni maho yago;
vegedza guti nya lisine li tiyidego.
22Kholu si na khala womi nya hefemulo wago;
si mburisa gwadi thamoni gwago.
23Khu guralo, u na gimbila ndzilani gwago
u na tiyide,
nyamba tshunganiswa khu gilo.
24Wa gu lala, khu na thava gilo,
u na lala ligovbe nya gutangale.
25Khu na thurugiswa khu mhango nya
githugedza u pilega hwambo,
ambari khu mhango yi na dugelelago ga va nya guvivbedwa
khu monyo.
26Kholu Pfhumu Nungungulu a na khala uye muvhikeli wago,
a na sayisa migondro yago gasi yi si modwi khu naphwi.
27U nga bombi gu ninga giphaso ga oyu hamugago
gya gu bani giri mandzani gwago.
28U nga embeli ndriyago, khuwe:
“Wuya mindru nyi nata gu ninga gilogyo,”
nu dzi kodza gu mu phasa muhuno.
29U nga lugeli makungo nya guvivbe muakelane wago,
kholu uye a gu vbanya nago na gu tumba.
30U nga vbenyelani ni muthu mahala,
na sa gu ghohela gilo.
31U nga tsakeli muthu nya gigaha,
ambari gu dogorela mavbanyelo yaye.
32Kholu Pfhumu Nungungulu kha goli va nya
guvivbedwa khu myonyo,
aholu a gu tsakiswa khu va nya gululama.
33 Pfhumu Nungungulu a gu vala dzindranga
dza va nya guvivbedwa khu myonyo,
aholu a kategisa dzindranga dza va nya gululama.
34 # Wona gambe: Jak 4:6. Uye a na vala va tseketseli,
a ninga tshivba avo va dzi nogisago.
35Wuzundzo thomba ya va nya guti,
aholu sipumbu si na hakha tshatshazelo nya dzitshoni.
Currently Selected:
Mavingu 3: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
