Mavingu 28
28
1Sighohi sa gu thava ambari sa gumba tutumiswa khu muthu,
aholu, avo va lulamidego va gu tiya nga nghala.
2Ya gu manega pfilupfilu tigoni,
gutala guvbindrugedzwa vafumeli,
aholu gwa gu manega vathangeli nya gugengele ni mapimo,
litigo la gu khala gurulani.
3Muthu nya gisiwana a dzi girago gitetema,
a tshanisa sisiwana sikwawe,
a gu fanana ni ndzadzi nya ndrambi yi kukulutago
mavbila yatshavbo gu si tshali gilo.
4Avo va hambanago ni Nayo,
va gu zundza sighohi,
aholu avo va sayisago Nayo,
va gu dwana naso.
5Vathu nya guvivbedwe khu myonyo kha va siti
iso nya gululame,
aholu avo va vbwetago Pfhumu Nungungulu,
va nguti silo satshavbo.
6Gisiwana gi dzi vbanyelago khu mavbanyelo nya gululame,
gi nguvbindra uye a fumidego, aholu gimbilago khu ndzila
nya guwegele.
7Uye a sayisago Nayo, gyanana nya mapimo,
aholu oyu a hengelago ni va nya limidzo, a
gu poyila babe waye.
8Uye a andrisago thomba yaye khu guvelegisa dzitsapawu
nya gufiyarise,
a gu yi hengeledzela uye a pwelago wuhindzi sisiwana.
9Uye a dzi girago givbwiri a si vbweti gu yingisa nayo,
nombelo waye nuwo, wu na nyenyeziswa.
10Uye a ndreyisago va nya gululama a va
yisa ndzilani nya guwegele,
a na thegela phalani a li kembidego abune,
aholu uye a si dzumeligo gu sengwa,
a na mana tshatshazelo nya wadi.
11Muthu nya gitetema a gu pimisa gukhuye gengede,
aholu, gisiwana nya gugengele gi ngu mu wona na si
pimi gilo.
12Va gu fumiswa va nya gululama,
gomo gunengela nya gungi ngudzu;
aholu va gu fuma va nya guvivbedwa khu myonyo,
vathu va guya sihala.
13Uye a sihago sighoho saye gima kha na katega,
aholu uye a si dawulelago a si ghohi gambe,
a na giredwa wuhindzi.
14Kategide muthu wule a thavago Pfhumu Nungungulu
gikhati gyatshavbo,
aholu uye a bangisago monyo waye,
a na thegedwa khu mhango.
15Mufumeli nya guvivbedwe khu monyo a gu fuma
litigo nya sisiwana,
a gu fanana ni nghala yi bhongago ni
gikankanka gya gupwa ndzala.
16Muthangeli nyambana mapimo,
a gu engedzela sitshaniso nya singi,
aholu uye a gumba dzumela gu rengeledwa,
a na laphisa matshigu yaye nya gufume.
17Muthu a dzi rwegidego nandru khu gu songa muthu,
a na khala mulegalegi kala gufa,
nyamba vhikedwa khu muthu.
18Muthu a gimbilago khu ndzila nya gululame,
a na vbuluga,
aholu uye a gimbilago khu ndzila nya guwegele, a na
thega khu githugedza.
19Uye a dzi limelago lithembwe laye a na mana guhodza nya gutale,
aholu uye a landriselago iso nyamba phasa gilo,
a na khala gisiwana nya gikhongolo.
20Muthu a tumbegidego a na tala khu makategwa,
aholu uye a vbwetago gufuma khu givbiredza,
gima kha na hamuga tsayiso.
21Khandri gwadi gukhedza khu khovbe nya muthu,
kholu khu gipandrenyana nya guhodza, muthu a ngu dzi
kodza gu hambanisa nayo.
22Muthu nya ligungo a gu tutumela gufuma,
aholu kha dziti gukhuye a na khala gisiwana.
23Uye a kawukago muthu kwawe a ngu zundzwa,
guvbindra uye a tshambiselago khu gu ganela basi.
24Uye a belago babe waye mwendro mayi waye, na
gukhuye: “Khandri gighoho,”
a na khala pari nya dzimbafa.
25Muthu nya makolo a ngu wusa mayunga,
gasi uye tumbago a Pfhumu Nungungulu a na dugelela.
26Muthu a dzi tumbago uye mune wurumba, gipumbu;
gasi uye a gimbilago khu wugengeli,
a na vbanya.
27Uye a ningago gisiwana gima kha na hamuga gilo,
aholu uye a gi segelago maho, a na vadwa khu vathu.
28Va nya guvivbedwa khu myonyo va gu vegwa gu khala
vafumeli,
vathu vatshavbo va gu phalalega vaya sihala,
aholu va gufa,
va nya gululama, va gu engedzelana.
Currently Selected:
Mavingu 28: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
