Mavingu 23
23
1Wa guvbweta gu hodza ni mufumeli,
guhegula vbweta gu wona khu mani a guromo
mbeli gwago;
2u nga hodzi khu makolo, ambari nu gupwa
ngudzu ndzala.
3U nga dogoreli gu hodza silo nya gutshambe,
kholu a gu dzina saye guhodza gu kanganyisago.
4U nga dzi garadzi khu gu vbweta gu ghanya,
mapimo yago, ma nga dzi vegiseli ngudzu umomo.
5U nga vegi maho yago ga thomba u si yeligo
gu yi mana,
kholu iyo yi na mana mambapi kha nga lighama,
yi vbuvba yiya damboni.
6U nga hodzi guhodza ga muthu nya ligungo,
ambari gu dogorela manonwa yaye;
7kholu uye a gu pimisa basi guluza.
Khu monyoni gwaye a gu ganela, khuye: “Hodza u sele!”
Aholu kha ganeli khu gutiyisa.
8U na gosa iso u hodzidego,
u haganisela kharato magana yago nya yadi.
9U nga dzi garadzi khu gubhula ni gipumbu,
kholu igyo kha gi na khathala khu magana yago
nya wugengeli.
10U nga tshuki u vbindrugedza mivbingano
yi pandridwego gale,
ambari gu dzegela dzikhulungu wulime wawe;
11kholu muphodzeli wawe a na ni tshivba,
a na dzi emela a dzi vhikela.
12Dzi garadze khu gu yingisa sileletelo,
demba ndzeve u yingisa magana nya guti.
13U nga digi gutsayisa gyanana gyago,
kholu wa gu gi pitsa khu lipitso, kha gi na nga fa.
14Wa gu gi tsayisa khu lipitso,
u na bani u vbulugiside hefemulo waye
gu bela phalani nya vafi.
15Mwanangu, wa gu bani nuri ni monyo nya mapimo,
monyo wangu neni wu na nengela.
16Wa gu dusa magana nya yadi khu kanani gwago,
monyo wangu wu na nengela ngudzu.
17Monyo wago wu nga dogoreli sighohi,
aholu uwe thava Nungungulu gikhati gyatshavbo.
18Khu guralo khu matshigu matago,
u na mana mavbanyelo nya yadi,
gitumbo gyago kha gi na vbela.
19Mwanangu, yingisa, gasi u kodze gu mana guti,
zama gulandra ndzila nya gululame.
20U nga hengeli gumogo ni dzibewudzi,
ambari ni va nya limidzo nya nyama.
21Kholu bewudzi ni muthu nya limidzo,
va na thega wusiwanani,
ligovbe lawe li na va ambagisa siziva.
22Yingisa babe wago a nga gu velegago;
u nga kanyisi mayi wago
a gu gumba.
23Renga lisine, u nga li rengisi;
renga guti, sihevbulo ni mapimo.
24Uye a velegidego gyanana nya mapimo
a na nengela ngudzu,
ni uye a velegidego gyanana nya guti,
a na tsaka khigyo.
25Va ninge gutsaka gogo vavelegi vago,
a na ghiye uye a gu worisidego lihani.
26Nyivbe monyo wago, mwanangu,
maho yago ma na landrise dzindzila
nyi gu yeyedzago.
27Wona gukhuwe gibhayi ni liphuphulu
sa gu fanana ni liphala nya guete ni nambo
wu hongidego.
28Va gu varamela kha nga mbafa,
va gira vama nya vangi va si tumbegi.
29Khu mani a gu ni libango? Khu mani a gu ni
mhango? Khu mani a gu ni gutshaniseka?
Khu mani a guromo mayungani? Khu mani
a gu ni wuvi? Khu mani a gu ni dzimbanga
vbavbandze nya nandru? Gasi khu mani a
fuvidego maho?
30Khavo avovo va pfhalago khu gusela wadwa,
va golago gudhivanisela wadwa nya guvave.
31U nga khedzi gufuvila nya wadwa,
idzo wu ngangamelago khidzo gikombeni,
wa gu wu sela wu tshamba, wu relela wabune.
32Guhegisani wa gu hodza kha nga nyoga,
wu paya kha nga mamba.
33Maho yago ma na wona silo nya guvivbe,
ni mapimo yago ma na pimisa silo nyamba yela.
34U na dzipwa gukhwatshi vbakari nya mati u ladego,
mwendro gukhwatshi u di lala vbatshani
dzitshokhani nya ningwati.
35Gambe u na ganela, khuwe: Va nyi vetide
aholu kha nyapwa guvbisa!
Va nyi vetide aholu kha ga pwala;
Nyi na wuga lini gasi nyi dusa bhabhalaza.
Currently Selected:
Mavingu 23: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
