Mitengo 32
32
Gukavedwa nya litigo la Gileyadhi ga va na Rubheni ni va na Gadhi
(Dhewuteronome 3:12-29; Josuwa 13:8-28; 1 Vakorinto 5:1-13)
1Sanana sa Rubheni ni esi sa Gadhi, si di fumide mitshambi nya gutale ngudzu. Va di wona litigo la Jazeri ni la Gileyadhi na ma khalegide wulangani nya wadi ngudzu nya gufanele gu havisa umo mitshambi yawe. 2Va dita ga Mosi ni ga muphasi nya mhamba Eleyazari ni ga vathangeli nya tshangano vata ganela, khavo: 3“Mayigo ya Ataroti, ya Dhibhoni, Jazeri, Nimera, Hesibhoni, Eleyali, Sebami, Nebhu ni Bheyoni 4mayigo yale Pfhumu Nungungulu a ma sasedego mbeli ga tshangano wa na Israyeli, mayigo nya yadi gasi gu havisa umo mitshambi. Ethu sithumi sago hi na ni mitshambi.” 5Va di engedza gambe, khavo: “Ha gu bani hi manide wuhigo mahoni gwago, litigo leli li ningele ga sithumi sago, li khala thomba yathu; u nga hi gurumedzi gu tshatuga tsongo wa Joridhani!”
6Khu guralo, Mosi a di embela va na Gadhi ni va na Rubheni, khuye: “Gasi mwa gu vbweta gu tshalani avba, mu diga vandriyanu va hongola nyimbitunu, gani? 7Khu ginani enu mu vbedzago tshivba va na Israyeli, gasi va si beli ga litigo eli Pfhumu Nungungulu a va ningidego? 8Khidzo va giridego vababe vanu, gikhati nyi va rumedego khu Kadhesi-Bharineya gasi guta sola litigo leli. 9#Wona gambe: Mit 13:17-33. Na va vbohide kovani wa Esikoli, gasi guya sola litigo, va dita vbedza tshivba va na Israyeli, gasi va si beli ga litigo lile va ningidwego khu Pfhumu Nungungulu. 10Khavbo avbo, likhulo la Pfhumu Nungungulu li di khondra litshigu lolo, gukala a sambanya, khuye: 11Khu lisine, vathu vatshavbo va dugidego khu tigoni ga Egipito, gukhugela avo va gu ni tanga nya magumavili myaga guya mbeli, gima kha va na li wona litigo leli nyi sambanyidego gu ninga Abrahama, Isaki ni Jakobe; kholu kha va tumbega va nyi landrela. 12Vbavbandze basi ga Kalebi, mwamana wa Jefoni, Mukenasi, ni Josuwa, mwamana wa Nuni, khavo basi va na li wonago, kholu va di simama gu landrela Pfhumu Nungungulu. 13#Wona gambe: Mit 14:26-35. Khu guralo, Pfhumu Nungungulu a di goroga, a wugela va na Israyeli, a va gira va legalega giwulani gipimo nya magumana myaga, kala gu vbela melana watshavbo nya vale va nga gira guvivba mbeli ga Pfhumu Nungungulu.
14Olu enu nenu mwa gu vbweta gu dzega wulanga wa vababe vanu mu khala gitugulwana nya sighohi, mu engedzela likhulo la Pfhumu Nungungulu vbakari ga va na Israyeli. 15Mwa gu bani mu si dzini gu landrela Pfhumu Nungungulu, Uye nuye a na mi diga giwulani momu, khu guralo, mu na mbembisa vatshavbo vathu vava.”
16Khavbo avbo, avo va diya ga Mosi vaya ganela, khavo: “Hi na vbaha avba mavbandro nya guvege umo mitshambi yathu, hi vbaha gambe ni madhoropa nya guvbanye umo sanana sathu. 17Gasi ethu, hi na soma matshari, hi vbiredzela guthanga mbeli ga va na Israyeli, kala hi va vbohisa wulanga wawe; aholu, sanana sathu si na tshala, si vbanya madhoropani nya makhokhola, va kodza guvbuluga ga vale va vbahidego tigoni momu. 18Ethu kha hi na wuya gambe magaya gwathu, moyo ni moyo wa na Israyeli na si gu hakhi thomba yaye. 19Kholu ethu kha hi na kabana navo thomba ya tshatugo ga eyi nya tsongo wa Joridhani, ambari guya mbeli, kholu thomba yathu yomo eno, Khugadambo wa Joridhani.”
20Khavbo avbo, Mosi a di va hakha, khuye: “Mwa gu girani kharato, mu soma nenu guya dwana mbeli ga Pfhumu Nungungulu, 21moyo ni moyo nya enu a gu phara litshari a tshatuga tsongo wa Joridhani mbeli ga Pfhumu Nungungulu, kala uye a tutumisa valala vaye mbeli gwaye, 22litigo latshavbo na li rude mandzani ga Pfhumu Nungungulu, avbovbo mu na dzi kodzani gu wuya magaya gwanu na mu tshulegide mahoni ga Pfhumu Nungungulu ni ga vathu va na Israyeli; litigo leli li na bani liri thomba yanu mahoni ga Pfhumu Nungungulu.
23Aholu, mwa gumba girani kharalo, mu na bani mu ghohede Pfhumu Nungungulu, gambe dzitini nya gukhenu gighoho gyanu gi na mi resela tsayiso. 24Vbahelani madhoropa sanana sanu, ni mavbandro nya guvege dzinvuta dzanu; mu landrisa iso mu tumbisidego khu maganani gwanu.”
25Khavbo avbo, va na Gadhi ni va na Rubheni, va di ganela ga Mosi, khavo: “Kha nga idzo u rumago khidzo uwe, mune wangu, sithumi sago si na gira kharato. 26Sanana sathu, vagadzi vathu, mitshambi yathu ni sifuyo sathu satshavbo, si na tshala madhoropani ya Gileyadhi, 27aholu sithumi sago, moyo ni moyo, a na soma matshari guya nyimbitunu, mbeli ga Pfhumu Nungungulu, kha nga idzo u ganedego khidzo uwe, mune wangu.”
28Khavbo avbo, Mosi a di dzega mahungu yaya a gu leletela ga muphasi nya mhamba Eleyazari, ni ga Josuwa, mwamana wa Nuni, ni ga vathangeli nya dzinyumba dza vababe nya mahundzu nya sanana sa Israyeli; 29a va embela, khuye: “Va na Gadhi ni va na Rubheni, va gu tshatuga nanu Joridhani, moyo ni moyo wawe na somide matshari guya dwana mbeli ga Pfhumu Nungungulu, litigo li manega na li rude mbeli gwanu, enu mu na ningela gwawe litigo la Gileyadhi li khala thomba yawe. 30Aholu va gumba tshatuga nanu na va somide matshari, avo thomba yawe va na yi mana gumogo nanu tigoni ga Khanani.”
31Va na Gadhi ni va na Rubheni va di hakha, khavo: “Iso Pfhumu Nungungulu a ganedego ga sithumi sago, ethu hi na gira. 32#Wona gambe: Jos 1:12-15. Ethu hi na tshatuga na hi somide matshari guya dwana mbeli ga Pfhumu Nungungulu, hi hongola tigoni ga Khanani, aholu giavelo nya thomba yathu gi na manegela eno tshatugo wa Joridhani.”
Gukavedzedwa nya litigo la tshatugo gwa Joridhani
(Dhewuteronome 3:12-17)
33Mosi a di ningela ga va na Gadhi ni va na Rubheni ni ga gipandre nya lihundzu la na Manasi, mwamana wa Josefe, mufumo wa Seyoni, mufumeli wa Vaamori, ni mufumo wa Oge, mufumeli wa Bhasani, litigo ni madhoropa yakone ni mahange yatshavbo ya madhoropani nya litigo latshavbo.
34Va na Gadhi va di vbaha madhoropa ya Dhibhoni, Ataroti ni Aroweri; 35Ataroti-Sofani, Jazeri ni Jogibheya; 36Bheti-Ninira ni Bheti-Harani, madhoropa nya makhokhola ni mavbandro nya dzinvuta. 37Va na Rubheni va di vbaha madhoropa ya Hesibhoni, Eleyali ni Kiriyatiyimi; 38Nebho, Bhahali-Meyomi, va li vbindrugedza lina; ni Sibima; mambe madhoropa va nga ma vbahago va di ma riya mambe malina.
39Va na Makiri ni va na Manasi, va di pwanana ni va na Gileyadhi va lundra Vaamori va nga bani na vari umomo, va dzega litigo lawe. 40Khu guralo, Mosi a di ningela ga Makiri, mwamana wa Manasi, litigo la Gileyadhi, a khala umo. 41Jayiri, mwamana wa Manasi, a diya dzega mitalala yawe a yi ninga lina la Havoti-Jayiri. 42Nobha, a diya dzega litigo la Kenati gumogo ni mitalala yaye, a li riya lina laye khuye khu Nobha.
Currently Selected:
Mitengo 32: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
