Josuwa 2
2
Josuwa a ngu rumela vasoli tigoni ga Jeriko
(Josuwa 6:22-25; Mitengo 13:1-20)
1 # Wona gambe: Hebh 11:31; Jak 2:25. Josuwa, mwamana wa Nuni, a di rumela khu gisihaledza tigoni ga Kitimi vasoli vavili a va embela, khuye: “Indrani mu ya holelela gwadi litigo ni lidhoropa la Jeriko.” Va di hongola vaya bela ndrangani ga nyamayi moyo nya gibhayi, lina laye a ranwago pwani Rahabhi, avbo va nga ya khalago avbo. 2Khavbo avbo, gu di embedwa mufumeli wa Jeriko, pwani: “Wona nya gukhuwe wutshigu wowu gu bede omu tigoni va na Israyeli nya gukari, gasi guta holelela litigo.” 3Mufumeli a di rumela gu embela Rahabhi, khuye: “Tutumisa vama vovo va dzudego va ta bela ndrangani gwago, kholu avo va gu tela guta holelela litigo leli.” 4Aholu, nyamayi wule a di siha vama vale, a hakha, khuye: “Lisine, va di dzude vama nya gukari ndrangani gwangu; aholu eni nyi di si guti va guta khu hayi. 5Gupfolani nya lidambo, gikhati gu nga segwago malimba nya lidhoropa va dugide; kha nyi guti va bede khu hayi. Khu guralo, va landreni khu guvbiredza mu na va mana nyamba hwela!” 6Khavbo avbo, uye a di va litisa khu vbagikolitunu nya nyumba yaye, aya va siha vbadzinyandratunu nya wughama a nga bani a wu anegede vbatshani nya langwe yaye. 7Khavbo avbo, vama va nga rumedwago khu mufumeli va di va landra khu ndzila nya gutshatuge tsongo wa Joridhani; na va dugide vama va nga bani va va landra khu hwane, gu di segwa lidimba. 8Vasoli na va si gu lali, Rahabhi a di lita a va yela vbatshani nya langwe, 9a va embela, khuye: “Nyi ngu dziti gukheni Pfhumu Nungungulu a mi ningide litigo leli; ethu ni vatshavbo vavbanyi va tigoni momu, hi tade khu hwanga ni gu vbela tshivba khu kotani yanu. 10#Wona gambe: Eks 14:21; Mit 21:21-35. Hi pwide gupwani Pfhumu Nungungulu bangiside mati nya yiphwa nya Gufuvile mbeli gwanu, gikhati mu dugidego khu tigoni ga Egipito, ni edzi a mi sayisidego khidzo khisikheyi nya tsongo wa Joridhani, ga vafumeli vavili nya Vaamori, Seyoni ni Ogi, ava mu va mbembisidego. 11Avbo hi nga pwago isoso, myonyo yathu yi di vbela tshivba, mwalo na moyo a mi tiyelago, kholu Pfhumu Nungungulu wanu, Nungungulu wa vbatshani ndzadzini, ni vbavbatshi mafuni. 12Gasi olu, nyi sambanyeleni khu lina la Pfhumu Nungungulu, kha nga olu nyi giridego wuhindzi avbo gwanu, enu nenu mu nyi girela kharato, mu vbanyisa ndranga ya babe wangu; nyi ningeni giwonegiso nya lisine 13nya gukhenu mu na vbulugisa babe wangu, mayi wangu, vandriyangu nya vanyamayi ni satshavbo si va lumbago, ni gukhenu mu na va vbulugisa va si songwi.” 14Avo va di hakha, khavo: “Khu kotani nya womi wathu, hi na vbanyisa uwo wanu wa gumba hi tugudzisa. Avbo Pfhumu Nungungulu a na gu hi ningago litigo leli, ethu nethu hi na mi sayisani khu wuwadi ni gutumbega.” 15Khavbo avbo, uye a di va tshigisa khu ngodzi khu vbagihogotunu, kholu nyumba yaye yi di vbahidwe vbandzaritunu nya libhiyo nya lidhoropa. 16Uye a di va embela, khuye: “Thavani muya gigomoni gasi mu si manwi khavo va mi lundrago. Sihalani iyoyo mu vbedza matshigu mararu, kala avo va bwelela va wuya; khu hwane mu na phara ndzila yanu.” 17Vama vale va di embela nyamayi, khavo: “Wona idzo hi na tadzisago khidzo gisambanyo hi giridego: 18Gikhati hi na guta belago tigoni gwanu, tshanganisa ndrangani gwago babe wago, mayi wago, vandriyago ni vatshavbo valongo vababe wago; u na hunga ngodzi yeyi nya gufuvile vbagihogotunu vbavba hi dugidego khavbo. 19Gani khu mani uye a na tulago lidimba a duga vbavbandze, uye novba waye wu na thegela hungoni gwaye; ethu hi na bani hiri mwalo nandru; aholu novba wa wule a na bani nari nago nyumbani momu wu na thegele mihungoni gwathu, a gu tshuka a songwa khu muthu. 20Uwe nuwe wa gu tugudzisa makungo yaya yathu, ethu nethu hi na tshulega ga gifungo gegi hi gi sambanyidego gwago.” 21Nyamayi a di hakha, khuye: “Si na girege kha nga idzo mu ganedego khidzo!” Khavbo avbo, a di va vbangana va hongola.
Khu hwane, nyamayi a di dzega ngodzi nya gufuvile a yi hunga vbagihogotunu nya nyumba yaye. 22Khavbo avbo, vasoli va di hongola mugigomoni; va di ya khala umomo matshigu mararu, kala vale va nga bani va va landra va bwelela va wuya; avo va nga bani va va landra va di va vbweta dzindzilani gwatshavbo, aholu kha va va mana. 23Khu kharati, vama vale va vavili, va di tshiga khu mugigomoni va bwelela, va tshatuga tsongo wa Joridhani; va diya vbafuvbi ga Josuwa, mwamana wa Nuni, va ya mu embeledzela satshavbo iso si nga va dugelelago. 24Avo va di mu embela, khavo: Pfhumu Nungungulu ningede mandzani gwathu latshavbo litigo leli; vavbanyi vaye vatshavbo va gu ndrendremela khu hwanga mbeli gwathu.
Currently Selected:
Josuwa 2: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
