Josuwa 1
1
I. GUWANDRWA NYA LITIGO LA KHANANI
Nungungulu a ngu ganela ni Josuwa a mu tiyisa
(Mitengo 27:12-23; Dhewuteronome 34:1-9)
1Avbo a ngafago Mosi, githumi gya Pfhumu Nungungulu, Pfhumu Nungungulu a di ganela ga Josuwa, mwamana wa Nuni, githumi gya Mosi, khuye: 2“Githumi gyangu Mosi gi fude; khu guralo, khuga uwe u tshatuga tsongo wa Joridhani, uwe gumogo ni vathu vatshavbo vava, mu ya bela tigoni nyi ningidego sanana sa Israyeli. 3Malangani yatshavbo gu gu gandredzedwago khu migondro yanu, nyi mi ningideni, kha nga idzo nyi tumbisidego ga Mosi. 4Gukhugela giwulani ni Libhanoni kala tsongoni nya wukhongolo wa Ewufrate, litigo latshavbo la Vahiti kala yiphwa nya Yikhongolo ya Pfoladambo, wu na bani wuri uwo vbingano wanu. 5#Wona gambe: Dhet 11:24-25; 31:6,8; Hebh 13:5. Matshigu yatshavbo nya guvbanye gwago mwalo a na tiyago gu ema mbeli gwago; kha nga idzo nyi giridego ga Mosi, nyi na gira gambe kharato avbo gwago; gima kha nyi na gu diga, ambari gu gu tshiya hwane. 6#Wona gambe: Dhet 31:7,23. Tiya longo u manega ni tshivba ni gutimisela, kholu khuwe u na thangelago vathu vava kala va bela ga litigo nyi sambanyidego gu ninga vababe vago. 7U nga khali basi muthu nya tshivba ni gutimisela, gu vbwetega u dzi wonele u gira kha nga idzo wu rumago nayo watshavbo owu githumi gyangu Mosi gi gu leletedego; u nga tshuki u wu diga u ndreya, uya nyamudye mwendro nyambade, gasi sigiro sago si gu dugela gwadi ni evbini umo u na gimbilago khumo. 8U nga garali khu gu ganela khu libhuku nya Nayo; aholu gu vbwetega wutshigu ni mihani u alakanyela, gasi u landrisa satshavbo iso si lovidwego umo; khavbo avbo, u na andra ndzilani gwago bwelo khavbo u dugelela. 9Gasi kha nya gu ruma, gani? Gukheni tiya longo ni gutimisela; u si thavi ambari guthuruga kholu Pfhumu Nungungulu wago, a na bani ari nago gwatshavbo umo u na gimbilago khumo.”
Gudongisela gu tshatuga tsongo wa Joridhani
(Mitengo 32:6-27; Dhewuteronome 16:18; 29:10; Josuwa 8:13-22)
10Khavbo avbo, Josuwa a di leletela vathangeli nya vathu, a va embela, khuye: 11“Vbindrani khu vbakari nya lizumbo mu leletela vathu, khenu: Dongiselani dzimbuva, kholu hwane nya matshigu mararu mu na tshatuga tsongo wa Joridhani, mu ya khozisa litigo eli Pfhumu Nungungulu wanu, a mi ningidego gu li fumela.” 12#Wona gambe: Mit 32:28-32; Dhet 3:18-20; Jos 22:1-6. Josuwa a di embela lihundzu la va na Rubheni, va na Gadhi ni gipandre nya linyumba la na Manasi, khuye: 13“Dundrugani esi Mosi, githumi gya Pfhumu Nungungulu, a mi leletedego, gukhuye: Pfhumu Nungungulu wanu a mi ningide guhefemula vbakari nya litigo latshavbo leli; 14vagadzi vanu ni sanana sanu, ni sifuyo sanu si na tshala tigoni momu Mosi a mi ningidego khisikheno nya tsongo wa Joridhani; gasi enu vama nya dzindrena ni mitiyedwa mu na thanga mbeli gumogo ni vandriyanu gasi mu va phasedzela, 15kala Pfhumu Nungungulu a ninga vandriyanu guhefemula gumogo ni enu, gasi avo navo va ya bela va fumela litigo eli Pfhumu Nungungulu a na va ningago. Khu hwane, enu mu na bwelela tigoni li mi lumbago, eli Mosi githumi gya Pfhumu Nungungulu, a mi ningidego khu Khugadambo wa khisikheyi nya tsongo wa Joridhani.” 16Avo va di hakha, khavo: “Hi na gira satshavbo esi u hi leletedego, ni gu hongola gwatshavbo umo u na gu hi rumelago. 17Hi na gu yingisa ga silo satshavbo, kha nga idzo hi giridego khidzo ga Mosi. Igyo hi gi vbwetago basi khu gukhethu Pfhumu Nungungulu wago a na khale ni uwe, kha nga idzo a khadego khidzo ni Mosi. 18Uye a na gu wugelago a yeyisa milayo yago, a na songwa. Khu guralo, tiya u si thavi gilo.”
Currently Selected:
Josuwa 1: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
