Joba 38
38
Nungungulu a ngu ninga phindrulo Joba
1Khavbo avbo, Pfhumu Nungungulu a di phindrula Joba,
nari khu ndrani nya gipupwane, khuye:
2“Khuwe mani uwe u ghohago makungo yangu
khu magana ma si phasigu gilo?
3Olu dzi hunge giwunu gyago u tiya nga mwama,
kholu nya gu hadza gu gu wudzisa, uwe, u nyi
ninga phindrulo.
4U diri hayi uwe gikhati nyi nga wumba litigo?
Nyi tshamusele, wa gu bani na wuri ni guti.
5Khu mani a vegidego mivbingano nya mipimo yaye,
mwendro sago u ngu muti!
Uye a ladzidego dzingodzi nya pimo waye?
6Khokhweni yakone, khu mani a kembidego,
mwendro uye a vegidego madingo yaye,
7avbo dzithandra nya gugye dzi nga
embelelago gumogo,
ni sanana sa Nungungulu si nga bani si gu womba
mikulungwane.
8Khu mani a nga bhiyago linene khu sigomo,
gikhati li nga phusuga gukhwatshi la gu duga
khu ndrani ga mayi waye.
9Gikhati nyi nga li girela dzingandzu khu mapfhi,
nyi li fenengedza khu gidema,
10nyi li vegede vbingano,
nyi li sega khu malimba ni sikwinyaro nya dzisimbi,
11avbo nyi nga li embela gukheni:
U na hegisa khavba,
khu na vbindra gambe uya mbeli,
mavimbi yago nya wurena ma nata vbela avba?
12Ina gukhugela u velegwa, u di nga ruma gugya
mwendro gu yeyedza Wuronga wuti wulanga wawe,
13gasi si kodza gu phara dzitshokani nya litigo,
va nya guvivbedwa khu monyo
va si mani wulanga nya gukhale umo, gani?
14Mafu ma vbindrugedza ma khala kha nga libumba
vbavbatshi nya gifungo,
satshavbo si wonega kha nga myendra;
15gu ndreyiswa guwonegela gwa
va nya guvivbedwa khu myonyo,
ma fanywa mawogo yawe nya gulaphe.
16Ina u di nga bela sifefeni sa linene
mwendro gu relela guetani nya mati, gani?
17Ina u di nga tuledwa malimba nya vafi
mwendro saye gu wona malimba nya gidema
nya guthise, gani?
18U ngu guti gwadi guanama nya litigo, gani?
Wa gu bani u guti, nyi embele.
19Khu yevbini ndzila yiyago wulangani nya guwonegele?
Ahati gidema khu wevbini wulanga waye?
20U ngu kodza gu dzi yisa wulangani wawe, gani?
Gasi u dziti dzindzila dzi yago ndrangani gwawe, gani?
21Uwe u ngu dziti, kholu u di gu velegidwe gale,
ni tengo nya matshigu yago nya guvelegwe mangi!
22Ina u di nga bela umo yi dugelago umo thondrwane
mwendro gu wona madhamu nya maralala,
23nyi si vegedzago gasi si lirela litshigu
nya gupwe wuvi,
kala litshigu nya litunga ni nyimbi, gani?
24Khu yevbini ndzila yi vbohago avbo
gu dugelago gulasa
ni avbo yi phalalegelago avbo phuvbo ya Khugadambo
yi furugedza tigoni?
25Khu mani a tuledego misele nya dzindrambi,
ni gu tula ndzila nya gulase nya mabara;
26gasi guwa ndzadzi tigoni,
umo gu si khaligo muthu,
ni mugiwulani gu si manegigo muthu;
27gasi gu thela thomwa mafu nya gihala ni giwula,
ni gu nyugisa mwasi wu rumbuga.
28Ina ndzadzi yi na ni babe, gani?
Mwendro khu mani a velegago madododo nya hunguva?
29Gasi gudzidzila gwa gu dugela rumbuni ga mani?
Khu mani a girago girame gi tago khu vbatshani,
30avbo mati ma bangago ma fanana ni giwindri
gu banga ni guetani nya mati?
31 # Wona gambe: Job 9:9; Amos 5:8. Mwendro u ngu dzi kodza gu hunga sitsatsa
nya livbandre na dzimbili dzinyeledzi
mwendro gutshula sipfhundro sa Khugadambo?
32Mwendro gu kodza gu dusa siwoniso sa damboni
gumogo ni dzinango dzaye
mwendro gu gimbidzisa giwumbelo gya ndzadzini,
ni sanana saye, gani?
33U ngu yiti milayo ya ndzadzini,
mwendro gu yi kodza gu yi thumisa mafuni momu, gani?
34Ina u ngu dzi kodza gu khusa lito kala mapfhini,
u rumele yiwa ndzadzi nya yingi,
gasi u fenengedzwa khu ndrambi nya mati, gani?
35Mwendro u ngu kodza gu embela mabara ma duga,
ma ganela khayo: Hi womo avba, gani?
36Khu mani a thedego guti ndrani nya monyo
ni wugengeli mapimoni?
37Khu mani a gu ni guti nya gu sayele mapfhi,
ni gu vbaladza milamba nya mati ya ndzadzini;
38gasi mafu ma vhuvega ma khala libumba,
ni sikidinga saye si guledzedwa.
39Ina u ngu dzi kodza gu vbwetela pfimba nghala,
mwendro gu hodzisa sanana saye si khura,
40sa gu bani si lade mavbalani gwawe;
mwendro na dzi sihade dziphagoni, gani?
41Khu mani a dongiselago guhodza vamahigonganye,
gikhati sifondro sawe si lilago ga Nungungulu,
na si gulegalega khu gu hamuga guhodza, gani?
Currently Selected:
Joba 38: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
