Isaya 35
35
Gunengela ga Siyoni ga matshigu ma nga gutago
(Johane 14:6; 16:22; Gutuledwa 21:27)
1Giwula ni mafu nya gihala si na tsaka khu isoso;
marumbi ma na kulungela,
ma na buga senge nya gumbure nya nga makhonwa.#35:1 Likhonwa makhonwa gu thudwa lidema mwendro madema, a gu simbo wu rumbugago genge.
2Khu kharato si na rumbuga senge,
si kulungela khu gunengela,
si embelela khu gutsaka;
va na ningwa wudhumo wa Libhanoni, ni wa Saromi,
ni gungangamela nya gigomo Karameli;
vathu va na wona wudhumo wa Pfhumu Nungungulu,
ni gungangamela ga Nungungulu wathu.
3 # Wona gambe: Hebh 12:12. Tiyisani mawogo ma garadego,
mu tiyisedza dzikhungumudzi dzi rerekidego.
4Embelani avo va vbedego tshivba, khenu:
“Tiyani, mu nga thavi!
Kha mu mu woni oyu Nungungulu wanu,
a tago guta mi phodzela,
gasi gu bweledzela valala vanu, guvivba va mi giredego.
Uye a nguta khu wurumba waye, gasi guta mi vbanyisa.”
5Khavbo avbo, maho nya sikhumu ma na tulega
ni sivbwiri si na tulega dzindzeve sipwa.
6Silima si na ndragandraga kha nga dzimangwa,#35:6 Mangwa; gu thudwa phongo nya likhabi. Wona gambe: Mat 11:5; Luk 7:22.
ni malimi nya sidudu ma na kulungela khu gutsaka,
kholu mati ma na goga giwulani
ni gu buga mitsongo mafuni nya gihala.
7Mafu ma vbisidwego ma na vbindrugedza ma khala litsiva,
ni aya nya gihala, ma na vbindrugedza ma khala
sifefe nya mati;
phalani gu khalago masolwa, gu na buga mwasi,
dzitshava ni madadanga.
8Gu na manega avbovbo ndzila
nya yikhongolo nya likondro,
yi na ranwago pwani Ndzila nya Guage;
va nya gunyenyeza, kha va na vbindra khiyo.
Yi emisedwe basi vathu va Nungungulu,
khavo va na gimbilago khiyo,
ambari nari sipumbu, kha va na dzimela.
9Umomo kha gu na manega dzinghala,
ambari ni girengo gimwegyo nya wurena
kha gi na vbindra khu ndzila yoyo;
aholu gu na gimbila khiyo basi vale va tshudzisidwego.
10 # Wona gambe: Isa 51:11. Avo va na tshudziswago khu Pfhumu Nungungulu, va na bwelela
va wuya Siyoni, na va gu kulungela khu gutsaka;
Va na fenengedzwa mihungoni gwawe,
khu litsako nyamba vbela.
Va na taledwa khu gutsaka ni gunengela;
gulila ni wuvi si na bani si vbindride gwawe.
Currently Selected:
Isaya 35: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
