Isaya 19

Giprofeto khu Egipito

(Ekisodha 29:1-32; Jeremiya 46:2-26)

1Gitiviso khu litigo la Egipito:

Wonani gukhenu, Pfhumu Nungungulu, a nguta na khilede vbatshani

nya lipfhi nya mazambo, ata tigoni ga Egipito.

Sifananiso nya vanungungulu va Egipito,

si na ndrendremela mbeli gwaye,

ni myonyo ya Vagipiti yi na ghavata ndrani gwawe.

2Kholu Eni nyi na gira gu Vagipiti va dwana

ni Vagipiti vakwawe;

muthu ni muthu a na wugela ndriyaye,

ni mumbe a na wugela muakelane waye,

lidhoropa li na wugela limbe lidhoropa,

mufumo wu wugela wumbe mufumo.

3Hefemulo wa Vagipiti wu na titivala ndrani gwawe,

nyi na phalalegisa makungo yawe,

va na ya wudzisa wusingalagadzi ga sifananiso sawe,

ni ga vale va khozelago va nya gufa ni valoli nya dzisolo.

4Va Egipito nyi na va ningela mandzani ga mukhozisi,

va na fumedwa khu mufumeli nya dzihanyi;

a ngu ganela Mune,

Pfhumu Nungungulu nya Tshivba Yatshavbo.

5Mati nya tsongo wa Nilo ma navbwa,

ni tsongo wu na banga wu khala gihala.

6Milonga nya mati yi na nunga,

ni mati nya tsongo wa Nilo, ma na vbunguga, mavbwa,

dzitshava ni madadanga si na wu na.

7Mwasi wa bambe nya tsongo wa Nilo,

ni umo wu vbaladzago umo,

ni satshavbo si yadwego bambe nya tsongo wa Nilo,

si na banga, si vbuvbiswa khu phuvbo si mwalalega.

8Vagogi nya dzindzandzi va na lila,

ambari vale va lovago khu silowo tsongoni;

ni vale va gogago matini, va na vbela tshivba.

9Vale va lugago khu dzikhindra nya seda,

ni vale va lugago myendra nya guage, va na khala dzitshoni.

10Vathu nya guthavisege va na vbwasamiswa,

ni sithumi sawe satshavbo si na vbela tshivba.

11Vathangeli va Zowani va vbungugide mapimo;

ni madhota nya gugengele ma ningago wusingalagadzi Faro,

va gu mu ninga wusingalagadzi nya wuphuguphugu;

gu na phasa ginani gu embelani Faro, khenu:

“Nyi gyanana gya vagengeli,

gitugulwana gya vafumeli va gale?”

12Olu vomo hayi vagengeli vago?

Va na gu embele va gu bani va siti esi Pfhumu Nungungulu

nya Tshivba Yatshavbo,

a hungidego gu gira tigoni ga Egipito.

13Vathangeli va Zowa va vbungugide mapimo,

vathangeli nya lidhoropa la Menifisi va kanganyisidwe;

va pengiside Egipito a bela gughohani,

avo gu vathangeli nya dzinyumba dzawe.

14 Pfhumu Nungungulu thede vbakari gwawe

liphuvbo nya guvivbe;

va dhedherekisa Egipito ga mithumo yaye yatshavbo

kha nga muthu nya guleve

a puluwundrago vbatshani nya magose yaye.

15Tigoni ga Egipito wu mwalo thumo wu na girwago gambe,#19:15 Vambe vari, khavo: (Hungo) gitetema, (Ngila) gisiwana, mwendro muthu nya guthavisege.

khu mufumeli, mwendro khu khumbi,

khu litamo nya ngindru mwendro mbosi.

16Khu litshigu lolo, Vagipiti va na fanana ni vanyamayi, va na ndrendremela va thava gu vetwa khu gyandza gya Pfhumu Nungungulu nya Tshivba Yatshavbo, a gi khusedzidego gasi gu va wugela.

17Litigo la Judha li na thisa ga Egipito; watshavbo wule a na gu li dundrugago a na ndrendremela, khu kotani nya esi si emisidwego khu Pfhumu Nungungulu nya Tshivba Yatshavbo, khu iso a si emisidego khu kotani yawe.

18Ga litshigu lolo, gu na manega livbandre madhoropa ya Egipito, aya ma na gu ganelago khu lidimi nya gikhanani ni gu sambanya ga Pfhumu Nungungulu nya Tshivba Yatshavbo, limwedo nya ayo, li na ranwa Lidhoropa nya Gumbembise.#19:18 Lidhoropa nya Gumbembise, vambe vari khavo lidhoropa nya Lidambo, Heliyopoles, la gu manegela vbafuvbi ni avbo wu vbaladzago tsongo wa Nilo phwani ga Meditarani. Valovi nya vangi nya Gihebheru va gale va gu tala gukhavo Lidhoropa nya Lidambo, aholu malovelo hi malandrisago ma gu ganela khu lidhoropa nya Gumbembisi.

19Khu litshigu lolo, gu na manega giluvelo nya gulumbe Pfhumu Nungungulu, tigoni ga Egipito, vbinganoni gwaye, gu na emiswa lidingo la Pfhumu Nungungulu; lidingo leli gasi gu khala gialakanyiso gyaye.

20Esi si na khala giyeyedzo ni wufakazi wa Pfhumu Nungungulu nya Tshivba Yatshavbo tigoni ga Egipito, kholu va gu lila ga Pfhumu Nungungulu khu kotani nya avo va va tshanisago, Uye a na va rumela muvbanyisi ni muvhikeli nya gute va tshudzisa.

21 Pfhumu Nungungulu a na tidwa tigoni ga Egipito, Vagipiti va na muti Pfhumu Nungungulu litshigu lolo; avo va na mu khozela va mu girela dzimhamba nya miphaso ni miningelo nya dzimbewu, va na gira sisambanyo ga Pfhumu Nungungulu, va bwelo khavbo va si landrisa.

22 Pfhumu Nungungulu a na bayisa Vagipiti. A na va bayisa bwelo khavbo a va hawulugisa; avo va na vbindrugedza va wuya ga Pfhumu Nungungulu, Uye a na hakha milombelo yawe, a va vbanyisa.

23Khu litshigu lolo, gu na manega ndzila nya gutshanganise litigo la Egipito ni la Asiriya, Vaasiriya va na hongola Egipito, Vagipiti navo, va na hongola Asiriya, Vagipiti ni Vaasiriya, vatshavbo va na khozela Pfhumu.

24 # Wona gambe: Gen 12:3. Ga litshigu lolo, Israyeli a na khala nya wuraru gumogo ni Egipito ni Asiriya, gasi a khala gikategiso vbakari nya mafu;

25 # Wona gambe: Jer 46:2-26; Ezek 29:1—32:32. Kholu Pfhumu Nungungulu nya Tshivba Yatshavbo, a na va kategisa, a ganela, khuye: “Kategide Egipito, litigo langu, ni Asiriya, thumo nya mandza yangu, ni Israyeli, thomba yangu.”

Currently Selected:

Isaya 19: BGG2014

Highlight

Copy