Esiteri 9
9
Vajudha va ngu sasela valala vawe
1Khu litshigu nya likhumi na mararu nya ngima nya likhumi na mivili, a gu ngima nya Adhari, a gu litshigu si vbohidego khilo sileletelo ni nayo wa mufumeli, gu di fanede gu tadzisega khu litshigu leli, kholu valala va Vajudha va di gu lirela gu va sasela, aholu Vajudha va di li vbindrugedza li khala nari litshigu nya gu sasele khilo valala vawe. 2Kholu Vajudha vatshavbo, va di tombana madhoropani gwawe ga satshavbo sipandrengulu nya mufumo wa mufumeli Asuwero, gasi gu songa vatshavbo avo va nga vbweta gu va wugela. Mwalo ni moyo a nga bani na gu tiyela Vajudha, kholu mafumbu yatshavbo ma di gu va thava. 3Manganagana yatshavbo nya sipandrengulu, vamwamangulu, ni vathangeli vatshavbo va nga bani va gu thumela mufumeli, va di ema gumogo ni Vajudha khu kotani nya guthave Moridhekayi. 4Kholu Moridhekayi a diri ni gikhalo nya gukhugege vbawufumutunu, ni ndruma yaye, yi di phalalegide ni mayigo yatshavbo ya mufumeli; Moridhekayi a diya na gu engedzelana gu dandriswa a mana wugulu nya wukhongolo. 5Khu guralo, Vajudha, va di sasela khu matshari valala vawe vatshavbo. Va va mbembisela muphelo, va thuma guhaladza vbatshani ga valala vawe. 6Likhokholani ga Suza, Vajudha va sasede ni gu mbembisa livbandre mazana (500) vama, 7vafa gumogo ni likhumi sanana sa Hamani, mwamana wa Hamedhati, nala wa Vajudha a gu esi: Parisandrata ni Dhalifone, ni Asipata, 8ni Porata, ni Adhaliya, ni Aridhata, 9ni Farimasita, ni Arisayi, ni Aridhayi ni Vhayizata. 10Avo nya likhumi nya sanana sa Hamani, mwamana wa Hamedhati, nala wa va na Judha, va di songetedwa; aholu kha va nga phanga thomba yawe. 11Khu litshigu lolo, va di ta tivisa ga mufumeli, tengo nya vathu va fudego dhoropani ga Suza. 12Khavbo avbo, mufumeli a di embela pfhumugadzi Esiteri, khuye: “Likhokholani la Suza, Vajudha va songide livbandre mazana (500) vama ni likhumi sanana sa Hamani; va gu bani va giride kharato Suza, tsindza ahati ga simbe sipandrengulu nya mufumo wangu va na bani va giride kharini? Gasi olu nyi embele, iso u si vbwetago u na si mana, niso u lombago, u na ningwa.” 13Esiteri a di hakha, khuye: “Mufumeli wangu, wa gu dzumela nyi ngu lomba gukheni Vajudha va vbanyago omu dhoropani ga Suza, mindru avba gugyago gu girwa kha nga idzo wu rumedwego khidzo nayo wa muhuno, va ya vbayega vbasivbandratunu likhumi sirumbi sa sanana sa Hamani.” 14Khu guralo, mufumeli a di ganela khuye gu na girege kharato, gu duswa nayo dhoropani ga Suza; khavbo avbo, sirumbi sa sanana sa Hamani si di vbayegwa vbasivbandratunu. 15Khu hwane, Vajudha va dhoropani ga Suza va di tshangana khu litshigu nya likhumi na mana nya ngima nya Adhari, va songa dhoropani ga Suza, mazana mararu (300) vathu, aholu kha va nga phanga gilo. 16Vambe Vajudha va nga bani vari ga mambe mayigo ya mufumeli va di tshangana va dzi vhikela womi wawe, va dugelela ga valala vawe: Va songa livbandre na mavili ni livbandre magumi mazana (75.000) ya valala, aholu kha va nga va phanga gilo. 17Esi si giregide khu litshigu nya likhumi na mararu nya ngima nya Adhari, khu litshigu nya likhumi na mana va di khala va hefemula, litshigu lolo va li vega nari litshigu nya buzo ni gutsaka. 18Vajudha navo va nga bani vari Suza, va tombanide khu litshigu nya likhumi na mararu ni likhumi na mana; khu litshigu nya likhumi na livbandre va hefemula, va li gira litshigu nya buzo ni gutsaka. 19Gu giregide gambe kharato ga Vajudha va omu nya sidhoropana ni mitalalani, va giride navo litshigu nya likhumi na mana nya ngima nya Adhari nari litshigu nya gutsake ni mibuzo nya gurumelane dzisagwati khu gyawe.
Buzo nya Purimi
20Moridhekayi a di lova mahungu yaya, a rumela malangalila ga Vajudha vatshavbo va manegelago ga sipandrengulu satshavbo sa mufumeli Asuwero, sa vbafuvbi ni sa hwindzo. 21A va dundrugisa gukhuye gukhugela olu kala ga matshigu matago, matshigu nya likhumi na mana ni likhumi na livbandre nya ngima nya Adhari, gu vbwetega ma alakanywe matshigu yaya, ma giredwa mibuzo nya gutsake. 22Khayo matshigu yaya Vajudha va nga dzi tshudzisago khayo ga valala vawe, khuye ngima, gutshaniseka gwawe ni gulila gu vbindrugedzidego gu khala matshigu nya mibuzo ni gutsaka; va leletiswa gupwani matshigu yaya va ma gira mari ya mibuzo nya gunengele ni gutsaka, ni gu rumelana dzisagwati khu gyawe, ni gu ninga giphaso sisiwana. 23Khavbo avbo, Vajudha va di dzumela giolovedzo gegi va nga bani va phede gu gi landrisa, egi Moridhekayi a nga bani na va lovede, gi phede gu girega ga gikhati gile. 24#Wona gambe: Est 3:1; Est 3:7. Hamani, mwamana wa Hamedhati, Muagagi, nala wa Vajudha vatshavbo, a di hungide gikungo nya gumbembise Vajudha. A va lolela solo nya Purimi gasi a va mbembisela muphelo. 25Aholu gikhati Esiteri a nga hongola ga mufumeli, uye a di dusa sileletelo si lovidwego, nya gukhuye, gikungo nya guvivbe gi giridwego khu Hamani, a girela Vajudha, gi na thegele gwaye, uye mune. Khavbo avbo, Hamani gumogo ni sanana saye a di tshwedziswa vbasivbandratunu. 26Khigyo givangelo gi nga girago gu matshigu yoyo ma ranwa khu lina nya gupwani “Purimi” na si gukhugela khavbo ga “Puri.”#9:26 Puri, gu tshamusela makategwa, kala ni muhuno buzo yoyo nya Gijudha wa gu ranwa pwani Purimi. Khu kotani nya iso si nga bani si lovidwe vbakhwepatunu, ni mihimbo va yi wonidego khu mahungu yoyo. 27Vajudha va di tiyisa matshigu yaya ma khala giolovedzo ga avo ni livelego lawe, gumogo ni ga avo va na gu dzi vbindrugedza va khala Vajudha, va na vegedza matshigu yaya ya mavili ma khala matshigu nya gu ma alakanye khu mwaga ni mwaga kha nga idzo gu lovidwego khidzo ni gikhati gyakone. 28Va di hunga gu ma alakanya ni gu ma sayisa matshigu yaya gikhati gyatshavbo, mapangoni gwawe gwatshavbo, ni sipandrengulu sawe satshavbo, ni madhoropani gwatshavbo. Matshigu yaya nya Purimi, gima kha ma na fuva vbakari nya Vajudha, ambari ni vatugulu vawe gima kha va na divala gu ma alakanya.
29Khu guralo, pfhumugadzi Esiteri, nyamahegyane wa Abhiyayili, ni Mujudha Moridhekayi, va di ningwa fanelo nya gulove va tivisa nayo yoyo nya lidangalila nya wuvili nya Purimi. 30A rumela gu poswa malangalila ga vatshavbo Vajudha va vbanyago umo nya lizana ni magumavili na livbandre na sivili (127) sipandrengulu sa mufumeli Asuwero, ni magana nya gurule ni gutumbega. 31A va tivisa gu alakanya matshigu yaya nya Purimi ni gu dundruga dzinango dzakone, kha nga idzo Moridhekayi yoyu nya Mujudha, ni pfhumugadzi Esiteri va nga leletisago khidzo Vajudha, va ma vegisa kha nga idzo va vegisago khidzo matshigu nya guhale naya nya gililo, avo gumogo ni vatugulu vawe. 32Khu guralo, sileletelo sa Esiteri si tiyiside nayo nya Purimi bwelo khavbo si lowa gambe libhukuni.
Currently Selected:
Esiteri 9: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.