Esiteri E
E
Lidangalila nya tsetselelo
13 Aya khu mahungu ma lovidwego umo nya lidangalila lolo:«Asuwero, mufumeli nya khongolo, ga lizana ni magumavili na livbandre na vavili (127) vathangeli nya litigo, ni ga vamwamangulo nya sipandre nya mufumo, gukhegela Indiya kala Etiopiya, ni ga vatshavbo va thangelago mithumo yathu, womi!
14 Vathu nya vangi, hwane nya gu na va hakhide wuzundzo khu wuhindzi nya wukhongolo wa vasayisi vawe, va gu vbindrugedza va tala khu matshandza, 15 va si eneledwi basi khu gu tshanisa vathu, aholu khu gumba kodza gu hunga monyo wawe nya matshandza, va gu gira gikungu nya guwugele gambe ni vasayisi vawe.
16 Kha va hegela basi gu vbedza monyo nya gubonge vbakari nya vathu, aholu va di dzi gugumugisa khu gu kutsedzedwa khu vale va si yitigo ndruda, va dzi pfhadzago khavo va na vbuluga gulamula gwa Nungungulu a wonago satshavbo, a hambanago ni guvivba. 17 Dzinyondro nya dzingi vafumeli va ngu emisa malangani nya gukhugege nya mufumu vathu va dzi wonegisago gukhwatshi dzipari, khu kharato vafumeli navo va gu manega na va gu modwa khu nandru, gikhati vathu vovo va girago gikungu nya guvivbe nya guvbwete gu songa vathu nyambana nandru, va vanga guvivba gu si kodzigo gu futwa. 18 Khu guvivba gwawe gupata ni malipha, vathu vovo va gu sagarela wuwadi ni ndruda ya vafumeli, va kodza gu gira gugola gwawe nyambasi gwadi. 19 Kha guvbwetegi gu nga dzi garadza khu gu alakanyela esi hi si pwidego khu mahungu nya silo si dugeledego ga myaga ya gale, gu vbwetega basi gu tula maho gasi gu wona esi si dugelelago olu. Wughevenga nya wungi wu girwago khu vathangeli vovo nyambana nayo va ambagisidwego wufumu nyamba yela. 20 Khu guralo, hi na dzi garadza, gukhugela olu guya mbeli, khu gukhethu mufumoni gwatshavbo vathu va vbanya mugurulani na va tangade, 21 hi na vbindrugedza magirelo, hi na lamula khu nayo ni lisine nyamba hambanisa, silo satshavbo va hi bikelago gasi gu si khedzisa gwadi khu wugengeli. 22 Wonani giwonelo khu mahungu ya Hamani wa Makedhoniya, mwamana wa Hamedhata a nga sagarela wuwadi wangu. Mwama yoyo khandri Muperesi, muthu nya gute khu mambe mayigo, a gu mwalo ambri ni wudugwana basi wuwadi wangu. Ambari ulo nyi mu hakhide khu ndruda, 23 nyi mu phara khu wuhindzi kha nga idzo nyi pharago khidzo mafumbu yatshavbo nya vathu, gu kala a gu ranwa pwani “babe nya mufumo, a dandriswa ngudzu kala a nga vboha ga giemo nya wuvili vbagikhalotunu nya wufumu. Vathu vatshavbo va di gurumedzwa gu khidzima mbeli gwaye. 24 Aholu gu dzi khusedza gwaye nya guvbindre pimo, gu mu giride a nyi wugela, a zama gu nyi tshisa vbagikhalotunu gwangu nya wufumu ni gu nyi songa. 25 Khu wundzundzwane waye ni malipha a di zama gu songa Moridhekayi, mwama a nga vbanyisa womi wangu, a nga nyi thumela ni gu nyi girela wuwadi gikhati gyatshavbo. Gu diga nya isoso, a di zama gambe gu songa Esiteri, pfhumugadzi nya wuzundzo ni mubangaladzi wangu wufumuni, ni gu songa vathu vatshavbo nya lifumbu laye. 26 A di pimisa gukhuye khu magirelo yaya, a na nyi mana na nyi pfhade, a kodza gu wuyisa va Makedhoniya vata wandra mufumo olu wu lumbago Vaperesi. 27 Aholu hi di tugula gukhethu Vajudha, avo va nga bani va lamuledwe gu songwa khu gighevenga gyogyo nya gikhongolo, khandri vathu nya gugire guvivba, aholu vathu va fumedwago khu milayo nya gululame ngudzu. 28 Avo sanana sa Uye a Khusegidego Ngudzu, Nungungulu a vbanyago, a sayisago mufumo wathu wu andra, kha nga idzo a giridego ga vakokwe vathu. 29 Khu guralo, gwadi mu si ningini ngudzu lisima malangalila ma lovidwego khu Hamani,mwamana wa Hamedhata, a nga lugago guvivba gogo gwatshavbo; 30 kholu uye gumogo ni ngamu yaye yatshavbo va songidwe khu gu hungwa tendrelani nya wukhongolo, wa dhoropani ga Suza. Nungungulu nya Tshivba Yatshavbo a mu ningide nyamba hwela tsayiso yi nga mu fanelago. 31 Namegelani malangalila nya mahungu yaya mitendrelani gwatshavbo, gasi gu dzumedziswa Vajudha gu landrisa na va tshulegide milayo nya tumbunugo wawe. 32 Va ningeni giphaso gi vbwetegago gasi va kodze gu dzi vhikela ga valala vawe vatshavbo, ngudzungudzu khu litshigu lile li vegisedwego gumbembiswa gwawe, a gu litshigu nya likhumi na mararu nya ngima nya likhumi na mivili, wu ranwago pwani ngima nya Adhari. 33 Kholu Nungungulu nya Tshivba Yatshavbo giride gukhuye litshigu lile li nga bani li vegidwe gasi gumbembiswa vathu vaye a va hathidego, li vbindrugedza li khala litshigu nya gunengele gwaye. 34 Khavbo avbo, enu, Vajudha, mu na vbanyedza litshigu lolo nya gialakanyiso khu gutsaka nya gukhongolo ngudzu, kha nga idzo mu girago ga mambe matshigu nya mibuzo yanu nya yikhongolo. 35 Gasi gukhugela olu guya mbeli, eni gumogo ni vathu nya mufumo wangu va tumbegidego, hi na dundruga guvbanyiswa gwanu, ni valala vathu navo va na dundruga guvbanyiswa gwawe. 36 Lidhoropa mwendro gipandrengulu nya litigo li na gumba landrisa guruma gogu, li na mbembiswa khu matshari ni nilo nyamba pwedwa gisiro. Gima kha na nga manega gambe muthu a na golago guya vbaha umo, ambari sirengo nya likhabi ni sinyoni si na khala hwanga guya bela umo.» 37 Limbe lidangalila nya khwepa yoyu, li di rumedwa gu tiviswa ga vathu vatshavbo nya sipandrengulu satshavbo, gasi Vajudha ga litshigu lile va khale na va dzi dongisede gu dzi vhikela ga valala vawe. 38 Khu guralo, myango nya guphalalegise mikhwepa yi diya khu givbiredza kha nga gu leletisa ga mufumeli na yi gukhugela dhoropani gwa Suza tsindza nya mufumo, khu mazambo nya makhongolo ngudzu, na va khilede dzikavalu nya mufumo. 39 Khavbo avbo, Moridhekayi, a di duga khu nyumbani nya wufumu na ambade dzingandzu nya wufumu nya livala nya nga la damboni ni guaga, na ambade gihugu nya wufumu nya ndralama ni libhadzi nya giwunguwungu nya seda; lidhoropa la Suza li di kulungela khu gutsaka. 40 Ga Vajudha gu di manega nari gutsaka, gunengela ni wuzundzo. 41 Ga gipandrengulu gyatshavbo, dhoropani gwatshavbo gu nga bani gu vboha magana ya mufumeli ni nayo waye, gu di manega gutsaka ni gunengela, va gira ni mibuzo nya gutsake; khu kharato, vathu nya mambe mafumbu nya mangi ya mafuni, va di dzi vbindrugedza va khala Vajudha, kholu Vajudha va di gu ningwa ngudzu githawo.
Currently Selected:
Esiteri E: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.