Muhevbudzi 5
5
Milayo nya yingi yi vbwetegago
(1 Samuweli 15:22; Mavingu 15:8; Hoseya 6:6)
1Khedza ngondro wago umo wu gandrago wa gu bani
u bela Nyumbani gwa Nungungulu.
Hi dzimela gasi guya yingisa, esi si ngu phasa ngudzu
guvbindra dzimhamba dza sipumbu,
kholu sipumbu kha si dziti nya gukhiso sa gu gira silo nya guvivbe.
2U nga vbiredzeli gu tula likana lago, nyamba phela khu gu pimisa
u tutumela gu ganela malito mbeli ga Nungungulu;
kholu Uye womo vbatshani ndzadzini,
uwe u womo vbavbatshi mafuni;
khu guralo, magana yago ma na khale madugwana.
3Kha nga dzindroro dzitago khu mithumo ya yingi,
magana nya wupumbu ma gu pwala khu gu ganela ngudzu.
4 # Wona gambe: Dzind 66:13-14. Wa gu hunga gifungo ni Nungungulu, vbiredzela gu gi tadzisa, kholu Nungungulu kha tsakiswi khu vathu nya guvivbedwe khu myonyo. Khu guralo, tadzisa gisambanyo gyago. 5I tshukwana gumba dzi girela gifungo, guvbindra gu gira gifungo u si gi landrisi. 6U nga dzumeli likana lago li gu yisa gughohani, gambe u nga ganeli mbeli ga Girumwa gya Nungungulu khuwe nyi di gira khu guphazama; kholu Nungungulu a nga wugela magana yago, a ghohetela thumo u giridego khu mandza yago. 7Kha nga dzindroro nya dzingi dzi gumba phasa gilo, kharato nugo guganela nyamba khedza hwane. Khu guralo, uwe thava Nungungulu.
Guhambana nya guvbanye
8Wa gu tshuka u wona tigoni na gu tshaniswa sisiwana ni gu hambaniswa nayo, u nga samali kholu uye a gu khongolo a na ni mumbe vbatshani gwaye a mu kalavelago a gu khongolo guvbindra uye, vbatshani ga avo va vavili, womo gambe uye a khusegidego ngudzu gu va vbindra a va kalavelago nuyeavo. 9Mafu ma gu phasa vathu vatshavbo, ni mufumeli nuye a gu phasega khu sa mahangeni.
Gu dzi pfhadza khu dzithomba
(Joba 20:18; Dzindzimo 49:10; Agewu 1:6)
10Muthu a golago dzitsapawu gima kha eneledwi khidzo,
ni wule a golago dzithomba gima kha kodwi khu gughanya.
Esi niso gu dzi pfhadza, kha si phasi gilo.
11Avbo dzi engedzelanago dzithomba,
va nya gu hodza navo va gu engedzelana.
Sa gu mu phasa ginani muthu a si manago,
vbavbandze nya gu si wone basi khu maho?
12Muthumegeli, gani a gu mana nya singi mwendro nya sidugwane, uye a gu lala ligovbe nya gutenge,
aholu gukhura ga muthu nya gitetema
kha gu mu ningi ligovbe.
13Mafuni momu nyi di wona gimbe gigaradzo nya guvbindre
pimo, a gu egi:
Muthu a vegedzelago thomba yi bwelo khavbo yi mu girela mhango.
14Thomba yeyi ya gu luza khu mhango nya gukari wugwewoni gwaye,
ambari na velegide gyanana gya gu tshala nyambana gilo.
15 # Wona gambe: Job 1:21; Dzind 49:17; 1 Thim 6:7. Kha nga a dugidego khu ndrani ga mayi waye nyamba
ambala gilo,
kharato gambe a na bwelela nyambana gilo.
16Avbovbo wusiwana nya wukhongolo ngudzu ga muthu
a bwelelago nga idzo a dzudego khidzo.
Gasi gu dzi garadza gwaye gu mu phaside ginani?
17A na vbedza matshigu yaye mugidemani,
a khala khu gu vbisega a tshaniseka ni gulila!
Gukhadzisega gwadi tigoni momu
18Nyi wonide gambe gukheni; gwadi gu muthu a hodza, a sela, a tsaka a khalega gwadi khu thumo waye a giridego mafuni momu matshiguni nya guvbanye gwaye a ningidwego khu Nungungulu. Kholu, khiso esi a ningidwego iso. 19Muthu a gu ningwa khu Nungungulu sigiro nya singi, thomba ni tshivba nya gu si hodze, a bonga iso a ningidwego, a tsaka khu handro nya thumo waye, egi giningwa gya Nungungulu. 20Muthu yoyo kha na alakanyela ngudzu gukhuye matshigu yaye nya guvbanye mafuni momu ma rode, kholu Nungungulu a ngu vega monyoni gwaye gutsaka gu si vbeligo.
Currently Selected:
Muhevbudzi 5: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
