Muhevbudzi 3
3
Silo satshavbo si na ni gikhati gyaye
1Satshavbo si dongisedwe gikhati gyaye, gyomo gikhati nya satshavbo si guromo mafuni: 2Gyomo gikhati nya guvelegwe, ni gikhati nya gufe; gikhati nya guyale, ni gikhati nya guvbwere esi si yadwego; 3gikhati nya gusonge, ni gikhati nya guvbanyise; gikhati nya gupfhungumule, ni gikhati nya guvbahe; 4gikhati nya gulile, ni gikhati nya guhege; gikhati nya wuvi, ni gikhati nya gughiye khu gutsaka; 5gikhati nya gurinye siwindri, ni gikhati nya gu si wungedzele; gikhati nya gupharane mandza, ni gikhati nya guhambane; 6gikhati nya gu si mane, ni gikhati nya guhamuge; gikhati nya guvege, ni gikhati nya gudzudzuge; 7gikhati nya gupferule, ni gikhati nya gusonedzele; gikhati nya gudegule, ni gikhati nya guganele; 8gikhati nya guhaladze, ni gikhati nya guvenge; gikhati nya nyimbi, ni gikhati nya gurule.
Muthu kha giti gikhati gyaye a vegedwego
9Giphaso muni a gi manago muthu khu gu dzi garadza gwaye? 10Nyi wonide mithumo eyi Nungungulu a ningidego vathu gu va yi thuma. 11Silo satshavbo Nungungulu a si vegede gikhati gyaye; na vegide gambe myonyoni gwawe gu alakanya dzinango nyamba vbela; ambari kharato, mwalo muthu a wutigo thumo wu giridwego khu Nungungulu gukhugela guphela kala mahegiso. 12Nyi hegiside khu gu wona gukheni, gi mwalo gi gu gyadi guvbindra gu muthu a dzi tsakela ni gu vbweta makhalelo nya yadi guvbanyani gwaye. 13Muthu watshavbo a hodzago ni gu sela a gu hakha handro nya thumo waye, a na pime gukhuye giningwa gya Nungungulu. 14Nyi ngu dziti gukheni, satshavbo a girago Nungungulu, si na simama kala gupindruga nyamba engedzedwa ambari gu vbungudwa gilo.
Nungungulu giride esi gasi vathu va mu ninge githawo. 15Sile si nga bani si romo khu gale niso si guromo olu, niso si na giregago, si manegide khu gale; Nungungulu a gu wuyisa nyaluphye iso si nga bani si vbindride.
Guhamugega githawo
16Hwane nya isoso, nyi wonide gambe esi mafuni momu; guvivba gu di fuma wulangani nya wulamuli, ni gighoho gi fuma wulangani nya gululame. 17Khu guralo, nyi di pimisa nyabune, kheni: “Nungungulu a na lamula muthu nya gululame gumogo ni gighohi, kholu vegide gikhati gimwegyo nya gilo ni gilo, ni gikhati nya thumo watshavbo.” 18Nyi di engedza nyi ganela gambe, kheni: “Nungungulu a na va linga gasi va dziti gukhavo avo va ngu fanana ni sirengo. 19Kholu mahegiso nya tshatshazelo nya vathu wu ngu fanana ni mahegiso nya tshatshazelo nya sirengo, kholu vatshavbo va ngufa gambe vatshavbo va na ni liphuvbo nya guvbanye, muthu kha pali girengo, khu guralo, satshavbo gu dzi pfhadza basi. 20Vatshavbo va na hegisa khu guya dangamwedo. Va giridwe khu kudzudzwane nya mafu, khu guralo, vatshavbo va na bwelela mafuni. 21Khu mani a dzitigo nya gukhuye hefemulo nya muthu wu na gwela vbatshani ndzadzini, gasi hefemulo nya sirengo wu na relela vbavbatshi mafuni, na? 22Khu guralo, nyi wonide gukheni gu mwalo gunengela nya gukhongolo ga muthu guvbindra gu uye a dzi tsakela khu mithumo yaye, owu khuwo tshatshazelo waye. Kholu khu mani a na gu mu wuyisago gasi guta wona iso si na gu dugelelago khu hwane?”
Currently Selected:
Muhevbudzi 3: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
