Muhevbudzi 2
2
Gu dzi pfhadza khu gu dzi tsakisa
1Nyi di ganela khu monyoni gwangu, kheni: “Delu! Nya gu vbweta gu gu pwisa gutsaka; dzi buze khu gunengela.” Aholu nyi di si wona gambe nari gu dzi pfhadza. 2Nyi di, kheni: Mahego guhandruga; ni gutsaka kha gu phasi gilo. 3Nyi di pimisa khu monyoni gwangu gu dzi tsakisa khu gu sela wadwa nya vbinyu, mapimo yangu na ma nga gu thumisa guti, eni nyi di dzi gira gipumbu na nyi zama gu dzi pengisa kala nyi wona sanana sa vathu esi si va tshambelago gu si gira omu mafuni khu matshigu madugwana nya guvbanye gwawe. 4Nyi dzi girede silo sikhongolo, nyi dzi vbahela dzinyumba, nyi dzi limela marembwe nya vhinya. 5Nyi limide marembwe, nyi yala misimbo nya mihandro nya mafumbu yatshavbo. 6Nyi pode milambo nya mati gasi gu theledzela khayo misimbo yangu yi kodza gu dandra khu tshivba. 7#Wona gambe: 1 Dzipf 4:23. Nyi rengide dzikhumbi nya vama ni vanyamayi; simbe sithumi si velegedwe ndrangani gwangu, nyi na ni mitshambi nya yingi, nya dzimombe ni dzinvuta, nya guvbindre vatshavbo va vbanyidego Jerusalema na nyi si gu velegwi. 8#Wona gambe: 1 Dzipf 10:23-27; 2 Dzik 9:22-25. Nyi hengeledzede gambe ndralama ni parata, ni thomba ya vafumeli nya sipandrengulu; nyi dzi hathede vaembeleli nya vama ni vanyamayi, ni iso si tsakisago vathu, a gu vagadzi nya vangi. 9#Wona gambe: 1 Dzik 29:25. Nyi khusegide guvbindra vatshavbo va fumidego Jerusalema nyi si gu velegwi, kholu nyi nga simamago ni wugengeli. 10Satshavbo si nga bani si godwa khu maho yangu kha nya si bomba, ni satshavbo si nga bani si godwa khu monyo wangu, gi mwalo nyi nga wu himbedzela, kholu nyi di gu tsaka khu thumo wangu watshavbo. Egi khigyo giavelo nya satshavbo soso. 11Nyi di khedzisa gwadi mithumo yangu yatshavbo nyi giridego khu mandza yangu, ni idzo nyi dzi garadzidego khidzo; nyi di wona gukheni gu diri gu dzi pfhadza ni gu tutuma hwane nya phuvbo vbindrago, gi mwalo nyi phasegidego khigyo mafuni momu. 12Khu guralo, nyi di wuya nyi khedzisa gambe gwadi guti, lihure ni wupumbu; kholu muthu a landrelago mufumeli a nga gira ginani, guvbindra esi si giridwego khu gale. 13Nyi khodwe gukheni guti gu ngu vbindra wupumbu; kha nga wenengedzo wu palago gidema.
Muthu nya guti ni gipumbu
14Muthu nya guti a ngu wona umo a hongolago, aholu gipumbu gya gu gimbila mugidemani. Ambari ulo nyi ngu pima gukheni vatshavbo mahegiso yawe mamowo. 15Nyi di dzi wudzisa nyabune, gukheni: “Kha nga olu mahegiso yangu ma fananago ni ya gipumbu, gasi wugengeli wangu wa gu phasa ginani?” Khu guralo, nyi wonide gukheni ogu gambe gu dzi pfhadza. 16Kholu khu matshigu matago muthu nya guti ni gipumbu, vatshavbo va nafa; mwalo a na gu alakanywago kala lini, vatshavbo va na divadwa. 17Khu guralo, nyi di venga guvbanya, khu gu wona gukheni satshavbo si girwago mafuni kha si phasi gilo gututuma hwane nya phuvbo yi vbindrago basi.
Gu dzi pfhadza khu guthuma
18Nyi di venga thumo wangu watshavbo, nyi dzi garadzidego khu gu thuma mafuni momu; kholu bhindzu yakone yi nata manwa khu vale va na tago khu hwane gwangu. 19Khu mani a dzitigo gukhuye muthu yoyu a na bani ari gigengeli mwendro gipumbu? Khuye a na fumelago thumo wangu watshavbo owu nyi dzi garadzidego khuwo, nyi yeyedza guti gwangu mafuni momu. Isoso niso gu dzi pfhadza. 20Khu guralo, monyo wangu wu di vbela tshivba, khu thumo watshavbo nyi dzi garadzidego khu gu wu gira mafuni momu. 21Kholu muthu a dzi garadzago khu gu thuma khu wugengeli ni guti, a guta wona handro nya thumo waye na wu tshiyedwa uye a ngamba dzi garadza khu gu thuma; satshavbo sesi gu dzi pfhadza, kha si phasi gilo. 22Olu lithonga latshavbo nya muthu ni gu dzi garadza gwaye mithumoni ya mafuni, ina yi phaside ginani? 23#Wona gambe: Job 5:7; 14:1. Matshigu yaye yatshavbo khya gu garadzega, ni gu dzi garadza gwaye khwa wuvi, ni vbawutshigutunu kha mani guhefemula nya gwadi. Satshavbo sesi kha si phasi gilo, gu dzi pfhadza basi.
Magana nya guhegise
24 # Wona gambe: Muh 3:13; 5:18; 9:7; Isa 56:12; Luk 12:19; 1 Kor 15:31. Gimwalo gi gu gyadi ga muthu guvbindra guhodza, gusela, gutsaka ni gukhalega khu handro nya thumo waye.
Aholu esi niso nyi si wone gukheni sa guta khu mandzani ga Nungungulu. 25Khu mani a hodzago ni gu sela nyamba ningwa khu tshivba Yaye? 26#Wona gambe: Job 32:8; Mav 2:6. Wule a Mu golago, Nungungulu a ngu mu ninga wugengeli, guti ni gunengela; aholu, gighohi, a gu gi rwega thumo nya guwungedzele silo, gasi khu hwane a si tshiya ni wule Nungungulu a na golago gu mu ninga. Esi gambe nyi si wone gukheni gu dzi pfhadza, ni gututuma hwane nya phuvbo yi vbindrago.
Currently Selected:
Muhevbudzi 2: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
