Dhewuteronome 4
4
Mosi a ngu laya va na Israyeli
(Ekisodha 19—20)
1Gasi olu, uwe Israyeli, yingisa milayo ni sileletelo, esi nyi mi hevbudzago, gasi mu si landrisa, mu kodza guvbanya ni gu bela, gumogo ni gu dzega litigo eli Pfhumu Nungungulu wa vababe vanu, a mi ningago. 2#Wona gambe: Gutu 22:18-19. Mu nga engedzeli gilo ga magana nyi mi rumago, gambe mu nga vbunguli gilo, gasi mu vegedze sirumo sa Pfhumu Nungungulu wanu, kha nga edzi nyi mi ningago khidzo.
3 # Wona gambe: Mit 25:1-9. Maho yanu ma wonide esi Pfhumu Nungungulu a giridego khu kotani ya Bhahali-Peyori; khu guralo, vathu vatshavbo vale va nga landrisela Bhahali-Peyori, Pfhumu Nungungulu wanu, a va mbembiside vbakari gwanu. 4Khu guralo, enu mu simamide gutumbega ga Pfhumu Nungungulu wanu, muhuno, enu mwatshavbo mu nga gu vbanya.
5Wonani nya gukhenu nyi hevbudzide milayo ni sileletelo kha nga edzi nyi rumidwego khidzo khu Pfhumu Nungungulu wangu, gasi mu girani kharato vbakari nya litigo mu na li dzegago li khala thomba yanu. 6Khu guralo, si vegedzeni ni gu si landrisa, kholu esi a na bani ari wugengeli wanu ni gupima gwanu mahoni ga vathu avo va na pwago milayo yatshavbo yeyi, va na ganela, khavo: Khu lisine litigo leli nya likhongolo li na ni vathu nya guti ni wugengeli. 7Kholu, khu levbini limbe litigo li gu na ni vanungungulu va guromo vbafuvbi gwawe nya gufanane ni Pfhumu Nungungulu wathu, ga dzinyondro dzatshavbo hi mu lombelelago? 8Ni gu gambe, khu levbini litigo nya likhongolo li gu na ni milayo ni sileletelo nya gululame kha nga nayo yoyu watshavbo nyi mu ningago muhuno?
9Dzi vegedze uwe mune basi, u vegedza gambe gwadi hefemulo wago, u nga divali silo sile u si wonidego khu maho yago, si nga hidzimeli hwindzo ni monyo wago matshigu yatshavbo nya guvbanye gwago, u na si hevbudza ga sanana sago ni ga situgulwana sago. 10U nga divaledwi khu litshigu u nga bani uri mbeli ga Pfhumu Nungungulu wago, gigomoni ga Horebhi, gikhati Pfhumu Nungungulu a nyi embedego, khuye: Tombanisa vathu vatshavbo, gasi va tapwa magana yangu, gasi va hevbule gu nyi ninga githawo matshigu yatshavbo va na vbanyago mafuni, ni gu ma hevbudza ga sanana sawe. 11Khu guralo, enu mu hidzimede mu vboha vbafuvbi ni gigomo; gigomo gi di bani gi gu khondra nilo kala ndzadzini, vbakari nya gidema, ni mapfhi ni guphuma. 12#Wona gambe: Eks 19:16-18; Hebh 12:18-19. Khavbo avbo, Pfhumu Nungungulu a di ganela gwanu nari khu vbakari nya nilo; mu dipwa magana a nga ganelago basi; aholu kha mwa wona giemo gyaye. 13#Wona gambe: Eks 31:18; 34:28; Dhet 9:10. Khavbo avbo, Uye a di mi tivisani gidzumeledzwano gyaye, a mi ruma gu landrisa milayo yaye nya likhumi, a yi lova nya sileti sivili nya siwindri. 14#Wona gambe: Eks 21:1. Khu gikhati gya gimwegyo, Pfhumu Nungungulu a mi rumide, gukhuye mu hevbudza milayo ni sileletelo, gasi mu ya si landrisa ga litigo eli mu yago umo gasi guya li fuma.
15Dzi woneleni gwadi enu va mune, kholu gimwalo ni gimwegyo gifananiso mu gi wonidego litshigu lile Pfhumu Nungungulu wanu a ganedego nanu gigomoni ga Horebhi, nari vbakari nya nilo; 16#Wona gambe: Eks 20:4; Levh 26:1; Dhet 5:8; 27:15. gasi mu si dzi vivbisi khu gu dzi girela gifananiso nya guvatwe nya vambe vanungungulu, nya gufanane ni muthu nya mwama mwendro nya nyamayi; 17nya gufanane ni girengo nya gukari gya mafuni, mwendro nya gufanane ni ginyoni gevbi ni gevbi gi vbuvbago damboni; 18#Wona gambe: Rom 1:23. nya gufanane ni girengo gi khwirirago khu lididi mafuni; nya gufanane ni ndzandzi yi guromo matini vbavbatshi nya mafu. 19Wa gu khusa maho u khedzisa ndzadzini wa gu wona lidambo, ngima ni dzinyeledzi, ni mabutho yatshavbo ya ndzadzini u nga tshuki u dzi nyenyezisa khu gu si khidzimela u si khozela ni gu si thumela. U thumela silo esi Pfhumu Nungungulu wago a si kabanisedego vathu nya mayigo yatshavbo ma guromo vbavbatshi nya mafu gasi si khala thomba yawe. 20#Wona gambe: Eks 19:5; Dhet 7:6; 14:2; 26:18; Tit 2:14; 1 Ped 2:9. Aholu Pfhumu Nungungulu a mi dzegide a mi dusa niloni nya guvbise wa Egipito, uwo wu nyiviligisago ni simbi gasi mu khala vathu nya thomba yaye, kha nga mu si wonago kala na muhuno.
21 # Wona gambe: Mit 20:12. A nuye Pfhumu Nungungulu a di nyi gorogela, khu kotani yanu, a sambanyide gukhuye kha nyi na tshatuga tsongo wa Joridhani, gambe kha nyi na bela ga litigo nya ladi eli Pfhumu Nungungulu wago, a na gu ningago gu khala thomba yago. 22Kholu eni nyi nafa ga wulanga wowu, kha nyi na tshatuga tsongo wa Joridhani; Aholu enu mu na tshatuga gambe mu naya dzega litigo lile nya ladi. 23Dzi vegedzeni mu nga divali gidzumeledzwano gya Pfhumu Nungungulu wanu, a giridego nanu, mu nga tshuki mu dzi girela gifananiso nya guwumbwe, gi fananago ni gilo gile Pfhumu Nungungulu wanu, a mu himbedzedego. 24#Wona gambe: Hebh 12:29. Kholu Pfhumu Nungungulu wago, nilo wu dagaredzisago, Nungungulu nya wufu.
25Khu guralo, gikhati mu na gu velegago sanana ni vatugulu, mu gumba mafuni momu, mwa gu dzi nyenyezisa, mu girani gifananiso nya gukari nya guwumbwe, gi fananago ni gilo nya gukari, mu girani guvivba mahoni ga Pfhumu Nungungulu wanu, gasi gu mu gorogisa, 26muhuno, ndzadzi ni mafu si na khala dzifakazi dzangu, mwa gu khozela sifananiso nya nga isoso, mu na vbiredza gumbembiswa tigoni momo mu na guya li dzega na mu tshatugide tsongo wa Joridhani; kha mu na ya vbedza matshigu yanu umo; mwatshavbo mu na mbembiswa. 27Pfhumu Nungungulu a na mi phalalegisa vbakari nya mayigo, mu na tshala na muri tengo nya wudugwana vbakari nya vathu nya mayigo Pfhumu Nungungulu a na mi yisago umo. 28#Wona gambe: Dhet 28:36. Iyoyo, mu naya thumela vanungungulu nya gugirwe khu mandza nya vathu, nya mapulango ni siwindri, si si wonigo, mwendro gupwa, si si hodzigo ambari gupwa gununga. 29#Wona gambe: Jer 29:13. Khu iyoyo, u naya vbweta Pfhumu Nungungulu wago, gambe u na mu mana, wa gu mu vbweta khu monyo wago watshavbo, ni hefemulo wago watshavbo. 30Gikhati u na manago sigaradzo, ni silo satshavbo soso si na gu vbohelago khu matshigu nya guhegise, u wuya ga Pfhumu Nungungulu wago, u yingisa lito laye, 31khu guralo, Pfhumu Nungungulu wago, a gu Nungungulu nya wuhindzi, kha na diga gu gu tangadzisa, kha na gu mbembisa, gambe Uye kha na divala gidzumeledzwano a sambanyidego ga vababe vago.
Pfhumu khuye Nungungulu
32Khu guralo, olu wudzisa ga gikhati gi vbindridego, gile gi gu thangedego, gukhugela litshigu Nungungulu a vangidego muthu mafuni, gukhugela mahegiso nya ndzadzi kala mambe mahegiso, ina gu di nga manega gilo nya gufanane mwendro muthu a nga pwago gilo nya nga egi, gani? 33Mwendro ga litigo nya gukari gu di nga pwala na gu ganela lito la mumbe nungungulu vbakari nya nilo, kha nga edzi uwe u li pwidego, u wuya u vbanya; 34mwendro womo mumbe nungungulu a lingidego guya dzi dzegela litigo vbakari nya limbe litigo, khu silingo ni siyeyedzo, khu siliwugiso ni gu dwana, khu gyandza nya tshivba, ni libogo li khusedzidwego, ni mithumo ya yikhongolo nya guthise, gukhedza khu satshavbo esi Pfhumu Nungungulu wanu, a giridego mahoni gwanu tigoni ga Egipito, gani?
35 # Wona gambe: Mark 12:32. Uwe u yeyedzidwe gasi u dziti nya gukhuwe Pfhumu, khuye Nungungulu; ni gukhuwe mwalo mumbe vbavbandze Gwaye. 36Khu ndzadzini a gu giride upwa lito laye, gasi gu gu hevbudza, mafuni a gu yeyedzide nilo waye nya wukhongolo, gambe khu vbakari nya nilo u pwide magana yaye. 37Khu guralo, khu kotani nya lihaladzo ga vababe vago, hathide uwe livelego lawe, a gu dusa khu tigoni ga Egipito, uye mune wurumba khu tshivba yaye nya yikhongolo, 38gasi gu tutumisa hwindzo gwago mayigo nya makhongolo ni tshivba nya yikhongolo guvbindra uwe, gasi gu gu bedza ga litigo lawe a gu ninga li khala thomba yago, kha nga si wonegago muhuno.
39Khu guralo, muhuno, u na dziti ni gupimisa monyoni gwago gukhuwe Pfhumu khuye basi Nungungulu a guromo ndzadzini ni mafuni; mwalo mumbe. 40Khu guralo, vegedza milayo yaye ni sileletelo saye nyi gu leletelago muhuno, gasi si kodza gu gu dugela gwadi uwe gumogo ni sanana sago hwane gwago, ni gasi u engedzedwa matshigu yago tigoni mule Pfhumu Nungungulu wago, a na gu ningago kala gupindruga.”
Madhoropa mararu nya wuthavelo
(Mitengo 35:9-34; Dhewuteronome 19:1-13)
41Khavbo avbo, Mosi a di hatha madhoropa mararu ya khisikheyi nya tsongo wa Joridhani, khu phuvbo ga Khugadambo, 42gasi gu khala wuthavelo wa musongi, a na songago muakelane waye khu guphazama, uye khu gale a nga bani a si nyenyani naye, a na thavela ga lidhoropa limwedo nya aya: 43#Wona gambe: Dhet 19:1-3; Jos 20:7-9. Bhezeri a manegelago kovani nya giwula, gu lumbago va na Rubheni; Ramoti, tigoni ga Gileyadhi, gu lumbago va na Gadhi; ni Golani, tigoni ga Bhasani, gu lumbago va na Manasi.
II. HUWELELO NYA WUVILI WA MOSI
Mosi a ngu sawutela matimo nya guwumbwe nya milayo
44Owu khuwo nayo Mosi a nga wu huwelela ga sanana sa Israyeli. 45Khuwo owu wufakazi, ni milayo, ni sileletelo esi Mosi a nga embela sanana sa Israyeli, gikhati va dugidego khu Egipito, 46khisikheyi nya tsongo wa Joridhani, kovani gu khedzanidego ni Bheti-Peyori, tigoni ga Seyoni, mufumeli wa Vaamori, va nga bani va vbanyela Hesibhoni, ava Mosi ni sanana sa Israyeli va nga va pala gudugani gwawe khu Egipito, 47va wandra litigo lawe li khala thomba yawe, gumogo gambe ni litigo la Ogi, mufumeli wa Bhasani, vafumeli vavili va Vaamori, va nga bani varomo khisikheyi nya tsongo wa Joridhani, khu phuvbo ga Khugadambo; 48gukhugela Aroweri, gu manegelago bambe nya kova wa Arinoni, kala gigomoni gya Seyoni, gu ranwago pwani Herimoni, 49ni Arabha watshavbo, wu manegelago khisikheyi nya tsongo wa Joridhani, khu phuvbo ga Muhwadambo, kala ga yiphwa ya Arabha, bambe nya sigomo sa Pisiga.
Currently Selected:
Dhewuteronome 4: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
