Dhewuteronome 25
25
Tsayiso nya gisephu
1Vathu vavili va gu dwana, vata dzi bikela phathani nya madhota gasi guta lamudwa, valamuli va na tshule oyu a lulamidego, va tsayisa uye a ghohidego. 2Uye a ghohidego a gu bani a gu yela gu kwamudwa, mulamuli a na mu ladzisa vbavbatshi a kwamudwa nari mbeli gwaye, gu khedza khu tengo nya dzimboma nya nandru waye. 3A nga kwamudwi guvbindra magumana dzimboma, kholu a gu kwamudwa guvbindra tengo yoyo nya dzimboma, ndriyago a na thedwa dzitshoni mahoni gwago.
4 # Wona gambe: 1 Kor 9:9; 1 Thim 5:18. U nga hungi likana nya mombe yi vbulago dzimbewu.
Nayo nya guhambele
(Genesi 38; Rute 4:1-12; Marko 12:19-23)
5Koma ni nandra va gu vbanya dangamwedo, moyo wawe a gufa na sa tshiya gyanana, khavbo avbo, mwangadzi wa oyu a fudego, kha yeli gu dzegwa gambe khu nombo, vbavbandze ga nongo wa mwama waye; a na hambedwa khu namu waye a mu hakha kha nga mwangadzi waye, gasi gu tadzisa fanelo yaye nya wulamu. 6#Wona gambe: Mat 22:24; Mark 12:19; Luk 20:28. Gyanana nya matiwula a na velegago naye, gi na tshikhedza lina la ndriyaye a fudego, gasi lina laye li si fuvi tigoni vbakari ga Israyeli.
7Aholu, mwama a gu bomba gudzegana ni namu waye, nyamayi a na hongola hudzwetunu nya madhota aya ganela, khuye: “Namu wangu a ngu bomba gu wusedza lina la ndriyaye vbakari ga Israyeli, kha vbweti gu landrisa nayo nya guhambele a gu fanelo nya wulamu. 8Khavbo avbo, madhota ya dhoropani gwaye ma na ni fanelo nya gu mu rane va ta ganela naye; aholu uye a gu simama a bomba, khuye: Kha nyi mu vbweti, 9#Wona gambe: Rut 4:7-8. avbovbo namu waye nya nyamayi a na mu hidzimelela a mu tshula gilato ngondroni na gu wonwa khu madhota, a mu hetshela khovbeni, a ganela, khuye: Gu na girwe kharato ga muthu a bombago gu wusa ndranga ya ndriyaye; 10tigoni ga Israyeli, ndranga ya mwama yoyu, yi na ranwa gupwani: Ndranga nya gutshudwe gilato.
11Vama vavili va gu dwana khu gyawe, mwangadzi wa moyo nya avo, a hidzimela guya emela mwama waye, gasi gu mu vbulugisa mandzani ga oyu a mu bayisago, a thawuludza mandza yaye a mola wama waye, 12uwe mu pile mandza yaye, u nga mu pweli gisiro.
Sikalo ni mipimo nya gululame
13Kha gu vbwetegi gu dzega kwamani gwago mipimo mivili nya guhambanelane gasi gu pima gilo gya gimwegyo, moyo nya khongolo ni mumbe nya wudugwana. 14Ni nyumbani gwago gu nga manegi mipimo mivili nya guhambanelane nya efa, moyo nya khongolo ni moyo nya dugwana. 15U fanede gu manega ni pimo moyo nya guvbelele; gasi u kodze gu engedzedwa matshigu khu Pfhumu Nungungulu wago, ga litigo a na gu ningago. 16#Wona gambe: Levh 19:35-36. Kholu muthu watshavbo a girago wu kanganyisi, a gu gira manyala mbeli ga Pfhumu Nungungulu wago.
Amaleki a nga mbembiswa
17 # Wona gambe: 1 Sam 15:2-9. Alakanya esi Amaleki a gu giredego ndzilani, gikhati u nga bani u duga khu Egipito; 18edzi a nga gu khingago khidzo ndzilani a ta gu dhumela khu hwane gwago, a sasela vatshavbo va nga bani va tshade khu hwane gwago, avbo u nga bani nu garade ni gu vbela tshivba; uye kha ninga githawo Nungungulu. 19#Wona gambe: Eks 17:8-14. Khu guralo, avbo Pfhumu Nungungulu wago a na gu hefemudzago ga valala vago va gu randredego, ga litigo eli Pfhumu Nungungulu wago a na gu ningago gasi gu khala thomba yago, u fanede gu fuvisa lina la Amaleki vbavbatshi nya lidambo; u nga divali esi nyi gu embelago.
Currently Selected:
Dhewuteronome 25: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
