Dhewuteronome 16
16
Mibuzo miraru nya Vajudha
Phasika
(Ekisodha 23:14-15; 34:18; Levhi 23:4-8)
1Vegedza ngima nya Abhibhi#16:1 Abibe: lito nya gupwani Abhibhi khu Gikhanani gu thula gupwani “makonva” kholu ngima wowo khuwo nya guphele guvbwera tirigu. u gira buzo nya Phasika ya Pfhumu Nungungulu wago; kholu khu ngima nya Abhibhi khuye ngima Pfhumu Nungungulu wago, a gu dusidego ni wutshigu, khu tigoni ga Egipito. 2Khavbo avbo, u na dusa gifuyo gya tshambini gwago u gira khigyo ningelo nya phaso nya Phasika ga Pfhumu Nungungulu wago, wulangani wu na gu hathwago khu Pfhumu Nungungulu gasi gu khala avbo lina laye. 3Nyama yakone u nga hodzi ni gibaba nya guthedwe mela; u na vbedza livbandre na mavili matshigu na wu gu hodza sibaba nyambana mela, gibaba nyamba thedwa mela, gibaba nya wuvi kholu, u dugide khu guvbiredza khu tigoni ga Egipito, gasi u alakanye matshigu yatshavbo nya guvbanye gwago, litshigu u dugidego khilo khu tigoni ga Egipito. 4Tigoni gwago gwatshavbo, gu nga manegi mela kala guvbela livbandre na mavili matshigu; nyama u na girago khiyo miphaso vbasilambotunu nya litshigu nya guhegule, yi nga tshali kala dzimindrudzile. 5U nga tshuki u gira phaso nya Phasika ndrani nya madhoropa yale Pfhumu Nungungulu wago, a gu ningago, 6vbavbandze basi ga wulanga Pfhumu Nungungulu wago a na gu wu hathago gasi gu khala avbo lina laye, khavbo u na gu girago avbo mhamba nya Phasika vbasilambotunu, gupfolani nya lidambo, a gu igyo gikhati u dugidego khigyo khu tigoni ga Egipito. 7Khavbo avbo, mu na yi phula ni gu yi hodza wulangani wu hathidwego khu Pfhumu Nungungulu wago; vbadzimindrutunu, moyo ni moyo nya enu a na bwelela mitshatshani gwaye. 8#Wona gambe: Eks 34:22; Levh 23:15-21; Mit 28:26-31. Ndrani nya livbandre na limwedo matshigu, u na hodza sibaba nyambana mela, gasi khu litshigu nya livbandre na mavili, tshangano nya gudhumise Pfhumu Nungungulu wago; u nga thumi gilo khu litshigu lolo.
Pentekosta
(Ekisodha 12:1-28; 23:16; 34:22; Levhi 23:15-21; Mitengo 28:16-25)
9Gukhugela litshigu u phelago gu vbwera tirigu; u na saya livbandre na dzimbili dzisemana. 10U na gira Buzo nya Dzisemana,#16:10 Gutshamusela buzo nya Pentekosta. u rungudza Pfhumu Nungungulu wago, u phara mandzani gwago miningelo nya guningele khu gugola nya monyo wago, gukhedza khedzi Pfhumu Nungungulu wago a gu kategisidego khidzo. 11U na tsaka mbeli ga Pfhumu Nungungulu wago, uwe, gyanana gyago nya gikhwathana ni nyamahegyane wago, githumi gyago nya mwama, egi nya nyamayi ni Mulevhi a guromo dhoropani gwago, ni muluveli, dzikhulungu, ni vamalile va guromo vbakari gwago, wulangani owu Pfhumu Nungungulu wago a na gu wu hathago gu khala avbo lina laye. 12#Wona gambe: Mit 28:26-31. Dundruga gukhuwe uwe u diri khumbi tigoni ga Egipito, u na vegedza sileletelo sesi u si landrisa.
Buzo nya Mitshatsha
(Levhi 23:33-43)
13U na gira buzo nya Mitshatsha ndrani nya livbandre na mavili matshigu, hwane nya gu bani na wu hengeledzede dzimbewu dzago githalani ni gikhwatini gwago. 14U na nengela khu buzo wago, uwe ni gyanana gyago nya gikhwathana, nya nyamahegyane, githumi gyago nya mwama, nya nyamayi, Mulevhi, muluveli, khulungu ni malile, va guromo ndrani nya madhoropa yago. 15U na gira buzo ga Pfhumu Nungungulu wago, khu livbandre na mavili matshigu, wulangani owu Pfhumu Nungungulu a na wu hathago, kholu Pfhumu Nungungulu wago, a na gu kategisa ga mithumo yatshavbo nya guvbwere gwago, ni mithumo yatshavbo nya mandza yago, a gu nengedzisa khu satshavbo. 16Vama vatshavbo va na gyanu, va fanede guya dzi wonegisa mbeli ga Pfhumu Nungungulu wago, nyondro tharu khu mwaga wulangani a na wu hathago, khu Buzo nya Sibaba nyambana Mela, ni ga Buzo nya Dzisemana, ni ga Buzo nya Mitshatsha; aholu u nga hongoli nyamba phara gilo mandzani gwago mbeli ga Pfhumu Nungungulu; 17muthu ni muthu a na dusa khavbo a dzi kodzago khavbo gukhedza khidzo a kategisidwego khidzo khu Pfhumu Nungungulu wago.
Dzifanelo dza valamuli
(Ekisodha 23:6-9)
18U na vega valamuli ni dzindruna ga madhoropa yago yatshavbo aya Pfhumu Nungungulu wago, a na gu ningago vbakari nya mahundzu yago, gasi va lamule vathu khu gululama. 19U nga hambanisi wulamuli, u nga hatheli vathu, ambari gu rengeledwa; kholu wurengeleli wu ngu sega maho ya va nya guti, gambe wu ngu ndreyisa mahungu ya va nya gululama. 20U na landra basi gululama, gasi u kodza guvbanya ni gu hakha kha nga thomba litigo lile Pfhumu Nungungulu wago, a na gu ningago. 21#Wona gambe: Eks 34:13. Gambe u nga tshuki u yala simbo nya guphasele avbo nungungulu nya gifananiso vbafuvbi ni giluvelo mu nga vbahela Pfhumu Nungungulu wago. 22#Wona gambe: Levh 26:1. U nga tsitsi lidingo nya gifananiso, kholu khiso a si nyenyego Pfhumu Nungungulu wago.
Currently Selected:
Dhewuteronome 16: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
