Marcos 8

Chusku waranqa runakuna mikuyänanpä milagruta Jesús ruranqan

Mateo 15.32-39

1Tsay junaqkunam atskaq runakuna Jesús kaqman yapay qorikäyarqan. Mikuyänanpä imapis mana kaptinmi discïpulunkunata qayaykur Jesús nirqan: 2<<Kay runakunatam pasaypa kuyapä. Kimsa junaqnam mikuytapis mana yawar noqantsikwan kaykäyan. 3Wakinqa karu markapitam shayämushqa. Mallaqllata <aywakuyay> niptïqa wayinkunamanpis manarä chäyaptinmi bäjidus tsarinqa>>.

4Discïpulunkunanam niyarqan: <<Kay jäkuqchöqa ¿maychörä mikuyta tariykushun atskaq runakunapä?>>

5Jesúsnam tapurqan: <<¿Aykatä tantaykikuna kan?>>

Niptinnam niyarqan: <<Taytay, qanchisllam>>.

6Tsaynö niyaptinmi runakuna jamakuyänanpä Jesús nirqan. Jamaskiyaptinnam qanchis tantata aptarkur Tayta Diosta mañakur agradëcikurqan. Tsaypitanam pakiskir discïpulunkunata makyarqan aypukuyänanpä. 7Tsaynöllam juk ishkay taksha pescädutapis Jesúsman apayarqan. Tsaykunatapis aptarkurmi Tayta Diosta agradëcikuskir runakunata aypuyänanpä discïpulunkunata makyarqan. 8Tsaymi pacha junta llapanpis mikuyarqan. Sobraq kaqkunatanam qanchis canasta juntata discïpulunkuna qoriyarqan. 9Tsaychö mikuqkunaqa chusku waranqanömi (4,000) kayarqan.

Mikuyta ushaskiyaptinnam runakunata aywakuyänanpä Jesús nirqan. 10Tsaypitanam büquiman yarkurkur discïpulunkunawan Dalmanuta niyanqanman aywayarqan.

Milagrutarä rikayta munayanqan

Mateo 16.1-4

11Chaykuyaptinmi fariseukuna manakaqman churayta munar Jesústa niyarqan: <<Taytay, Tayta Dios rasunpa mandamushunqaykita musyayänäpä ima milagrutapis ruramuy>>.#Mat. 12.38; Luc. 11.16.

12Tsaynö niyaptinmi Jesús llakikur nirqan: <<¿Imanirtä kanan witsan runakuna milagrutarä ruranäta munayan?#Mat. 12.39; Luc. 11.29. Rasunpam nï: Qamkuna munayanqaykinöqa manam ima milagrutapis rurashätsu>>.

13Tsaynö niskirmi runakunata jaqiskir büquiman yarkurkur discïpulunkunawan wak tsimpaman aywakuyarqan.

Fariseukuna mana criyiyanqanta levadüraman Jesús iwalatsinqan

Mateo 16.5-12

14Jesúspa discïpulunkuna millkapankuna apayta qonqashqa kaptinmi büquichö juk tantalla karqan. 15Jesúsnam nirqan: <<Cuidädu fariseukunapa y Herodespa levadüranta chaskiyankiman>>.#Luc. 12.1.

16Tsaynö niptinmi discïpulunkuna kikinkunapura niyarqan: <<Tantata mana apamunqantsikpitam tsaynö nikämantsik>>.

17Tsaynö parlaykäyanqanta tantiyaskirmi Jesús nirqan: <<¿Imanirtä parlaykäyanki tantata mana apayämunqaykita? ¿Manaku tantiyayanki imapä parlanqätapis? ¿Juiciuynaqku kayanki? 18Ñawiyuq kaykarpis ¿manaku rikayanki? Rinriyuq kaykarpis ¿manaku wiyayanki?#Jer. 5.21; Eze. 12.2; Mar. 4.12. ¿Manaku yarpäyanki? 19Pitsqa tantapita pitsqa waranqa (5,000) runakuna mikuyänanpä milagruta ruranqäpita sobraqkunata ¿ayka canasta juntatatä qoriyarqayki?>>

Paykunanam niyarqan: <<Chunka ishkaytam, taytay>>.

20<<Tsaynölla qanchis tantapita chusku waranqa (4,000) runakuna mikuyänanpä milagruta ruraptï sobraqkunata ¿ayka canasta juntatatä qoriyarqayki?>>

Paykunanam niyarqan: <<Qanchistam, taytay>>.

21Jesúsnam nirqan: <<Tsaykunata rikaykarpis ¿manaku tantiyayanki?>>

Betsaidachö qapra runata Jesús allïtsinqan

22Tsaypitanam Betsaida markaman chäyarqan. Tsaychö kaykäyaptinmi qapra runata pushaykur Jesústa rugayarqan allïtsinanpä. 23Tsaymi makinpita jancharkur markapita juk läduman Jesús jipirqan. Tsaychömi qaprapa ñawinman toqapaykurnin yataykur tapurqan: <<¿Rikankinaku?>>

24Tsaymi rikachakuskir nirqan: <<Muntikunatanömi runakunata rikaykä. Peru puriykäyanmi>>.

25Tsaymi ñawinta yapay yataykuptin llapantapis allina rikarqan. 26Alliskatsirmi Jesús nirqan: <<Markaman mana yaykur [ni pitapis mana willar] wayikiman kutiy>>.

Jesús Cristo kanqanta Pedro ninqan

Mateo 16.13-20; Lucas 9.18-21

27Tsaypitanam discïpulunkunawan Jesús aywarqan Cesarea de Filipupa caseriunkunaman. Aywaykäyanqanchömi discïpulunkunata tapurqan: <<¿Pï kanqätatä runakuna niyan?>>

28Discïpulunkunanam niyarqan: <<Wakinmi niyan Bautizaq Juan kanqaykita. Wakinnam niyan profëta Elías kanqaykita. Y wakinnam niyan mayqan profëtapis kanqaykita>>.#Mar. 6.14-15; Luc. 9.7-8.

29Jesúsnam tapurqan: <<Qamkunaqa ¿pï kanqätatä yarpäyanki?>>

Pedrunam nirqan: <<Qamqa Tayta Dios mandamunqan Cristum kanki>>.#Juan 6.68-69.

30Tsaynö niptinmi pitapis mana willayänanpä discïpulunkunata Jesús nirqan.#8.30 Tsay witsan Israel runakuna yarpäyarqan Cristuta Tayta Dios mandamuptin Roma runakunata guërrachö vincinanpä kanqantam. Tsaynö yarpäyaptinpis Jesucristo manam guërrata rurananpätsu shamurqan, sinöqa noqantsik raykur cruzchö wanunanpämi. Tsaymi discïpulunkunata Jesús nirqan pay Cristo kanqanta pitapis mana willayänanpä. Peru wanunqanpita kawaskamurmi sïqa pïmaytapis willakuyänanpä nirqan (Mat. 17.9; 28.19).

Wanunanpä kanqanta Jesús willakunqan

Mateo 16.21-28; Lucas 9.22-27

31Tsaypitanam discïpulunkunata Jesús willarqan: <<Runapa Tsurintam pasaypa ñakatsiyanqa. Mayor runakuna, mandaq sacerdötikuna y ley yachatsikuqkunam contran shärir wanutsiyanqa. Tsaypita kimsa junaqtaqa kawamunqam>>.

32Tsaytaqa Jesús cläru kaqtam nirqan. Tsaynö niptinmi jukläman qayaskir Pedro ollqutuparqan. 33Tsaymi discïpulunkunaman Jesús tumaykur Pedruta nirqan: <<¡Ñöpäpita witiy, Satanás! Qam manam munankitsu Tayta Dios munanqanta ruranäta, sinöqa runa munanqanta ruranätam munanki>>.

34Tsaypitam discïpulunkunatawan runakunata qayaykur Jesús nirqan: <<Pipis discïpulü kayta munarqa kikin munanqannö ama kawatsuntsu, sinöqa cruzninta apaqnö noqata qatimätsun.#8.34 Jesucristo kawanqan witsanqa pipis cruzninta aparqan wanutsishqa kananpämi. Tsaymi cruzninta apaqnö noqata qatimätsun nirqa jutsa ruraypä wanushqanö kar Jesucristuta qatinanpä kanqanta nin.#Mat. 10.38; 16.24; Luc. 9.23; 14.27; Juan 12.25. 35Kawayninta salvayta munaqkunaqa kawaynintam oqrayanqa. Kawayninta noqa raykur y alli willakuynï raykur oqraqkunam sïqa kawayninta salvayanqa.#8.35 Tsaynö nirmi Jesucristo nirqan: <<Kikin munanqannö mana alli kawaqkunaqa manam salvakuyanqatsu. Noqa munanqänö kawaqkunam sïqa salvakuyanqa>>.#Mat. 10.39; Luc. 17.33; Juan 12.25.

36<<Infiernuman qaykushqa kananpä kaptinqa ¿imapätä välin entëru mundupa duëñun kanqanpis? 37Pasaypa rïcu karpis manam rïcu kanqanwanqa salvacionta rantinqatsu. 38Jutsasapa runakunapa puntanchö pipis noqapita y willakuynïpita penqakuptinqa Runapa Tsurinpis Tayta Diospa poderninwan y santu angelninkunawan shamurmi paypita penqakunqa>>.

Currently Selected:

Marcos 8: qxo

Highlight

Copy

Compare