Marcos 16
16
Wanunqanpita Jesús kawamunqan
Mateo 28.1-8; Lucas 24.1-12; Juan 20.1-10
1Jamay junaq päsaskiptinnam María Magdalena, Santiagupa maman María y Salomépis mushkuq jachakunata rantiyarqan Jesúspa ayanman wiñayänanpä. 2Tsaymi domingu wäray rupay yarqaykämuptin Jesús pamparanqanman aywayarqan. 3Nänita aywaykarmi niyarqan: <<¿Pirä sepultüra tsaparaq rumita kichapamäshun?>>
4Chaykurnam tariyarqan sepultüra tsaparaq jatunkaray rumi wititsishqa kaykaqta. 5Sepultüra rurinman yaykuskirnam rikayarqan juk jövin yuraq röpashqa derëcha kaq läduchö jamaraykaqta. Payta rikaykurmi pasaypa mantsakäyarqan. 6Tsay jövinnam nirqan: <<Ama mantsakäyaytsu. Musyämi crucificaypa wanutsiyanqan Jesústa rikaq shayämunqaykita. Payqa manam kaychönatsu. ¡Kawamushqanam! Maski rikayay mayman churayanqantapis.
7<<Kanan aywar Pedruta y wakin discïpulukunata willayay Galileaman puntaykanqanta. Ñöpata ninqannöllam tsaychö paykunawan tinkunqa>>.#Mat. 26.32; Mar. 14.28.
8Tsaynö niptinmi warmikuna mantsakaywan siksikyarrä empëñu aywayarqan. Mantsakashqa karmi rikayanqankunata pitapis willayarqantsu.
María Magdalenata Jesús yuripunqan
Mateo 28.9-10; Juan 20.11-18
9[Domingu wäray Jesús kawaskamurmi María Magdalenata puntata yuripurqan. Paypitam qanchis supaykunata ñöpata qarqushqa karqan. 10Yuripaskiptinmi Jesúswan puriqkunata willananpä María Magdalena aywarqan. Chänanpäqa llakikurmi waqaykäyänä. 11<<Jesústa kawaykaqtam rikarqü>> nir willaptinpis manam criyiyarqantsu.
Ishkay discïpulunkunata Jesús yuripunqan
Lucas 24.13-35
12Tsaypitanam markapita aywaykäyaptin ishkay discïpulunkunata Jesús yuripurqan. Payqa manam puntata kanqannönatsu karqan. 13Tsaypita kutiykurnam discïpulu mayinkunata Jesús yuripunqanta willayarqan. Willayaptinpis manam criyiyarqantsu.
Willakuyänanpä discïpulunkunata Jesús mandanqan
Mateo 28.16-20; Lucas 24.36-49; Juan 20.19-23; Hechos 1.6-8
14Tsaypitanam chunka juk discïpulunkuna mikuykäyaptin Jesús yuripaykur nirqan: <<Yärakuyniynaq chukru shonqu runakuna, kawamunqäta willayäshuptikipis ¿imanirtä criyiyarquykitsu?>>
15Mastam nirqan: <<Maytsaypapis aywarnin llapan runakunata alli willakuynïta willakuyanki.#Mat. 28.19-20; Hech. 1.8. 16Mayqanpis criyir bautizakuq kaqkunaqa salvakuyanqam. Peru mana criyiqkunam sïqa infiernuman qaykushqa kayanqa. 17Criyiqkunaqa milagrukunatapis rurayanqam. Jutïchömi supaykunatapis qarquyanqa y juk idiömakunatapis parlayanqam. 18Culebra kaniptinpis, venënuta qarayaptinpis manam wanuyanqatsu. Tsaynöllam qeshyaqkunata yataykur Tayta Diosta mañakuyaptinpis allïyanqa>>.
Ciëluman Jesús kutinqan
Lucas 24.50-53; Hechos 1.9-11
19Discïpulunkunata parlapayta ushaskiptinmi Señor Jesústa gloriaman Tayta Dios aparqan.#Hech. 1.9. Tsaychömi Tayta Diospa derëcha kaq lädunman jamaykurqan. 20Tsaypitanam discïpulunkuna maytsaychöpis willakuyarqan. Kikin Señornintsikmi yanaparqan milagrukunata rurayänanpä. Tsayta rikarmi runakuna tantiyayarqan tsay willakuyanqan rasunpa kanqanta. Amén.]#16.20 Ñöpa kaq griego copiakunachö versïculu 9-pita ushanqanyaqqa manam kantsu.
Currently Selected:
Marcos 16: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.