Marcos 10

Majayuqkuna mana rakikäyänanpä Jesús yachatsinqan

Mateo 19.1-12

1Capernaúmpita aywarmi Judea provinciaman Jesús charqan. Tsaypitanam Jordán mayu tsimpanman päsarqan. Tsaychöpis atskaq runakuna qorikäyaptinmi imaypis yachatsinqannölla yachatsirqan. 2Fariseukunapis tsayman aywaykurmi llutanta parlatsiyänan raykur Jesústa tapuyarqan: <<¿Warminpita runa rakikanmanku o manaku?>>

3Jesúsnam nirqan: <<Moisés qellqanqanchö ¿imatatä nin?>>

4Fariseukunanam niyarqan: <<Moisés yachatsirqan pipis warminpita rakikayta munarqa divorciu papelta firmapaskir qarqunanpämi>>.#Deut. 24.1-4; Mat. 5.31.

5Jesúsnam nirqan: <<Moisés tsaynö yachatsirqan runakuna chukru shonqu kayaptinmi. 6Tayta Diosqa kay patsata kamarmi ollquta y warmita kamarqan.#Gén. 1.27; 5.2. 7Tsaymi mamanpita y papäninpita runa yarqukun warminwan mana rakikaypa täkunanpä. 8Warminwan tärarnam jukllayllanöna kayanqa. Tsaynö kaykaptinqa mananam ishkaqnatsu kayan, sinöqa jukllayllanönam.#Gén. 2.24. 9Tsaymi Tayta Dios juntanqantaqa pipis rakinmantsu>>.

10Wayichö kaykarnam discïpulunkuna Jesústa tapuyarqan tsay yachatsinqanpita. 11Tsaymi Jesús nirqan: <<Mayqan runapis warminpita rakikaskir juk warmiwan täkurqa adulteriu jutsatam ruran. 12Tsaynöllam mayqan warmipis runanpita rakikaskir juk runawan tärarqa adulteriu jutsata ruraykan>>.#Mat. 5.32; 1Cor. 7.10-11.

Wamrakunapä Tayta Diosta Jesús mañakunqan

Mateo 19.13-15; Lucas 18.15-17

13Tsaypitanam wamrakunata Jesús kaqman apayarqan umankunata yataykur Tayta Diosta mañakunanpä. Apaqkunata discïpulunkuna michaykaqta 14rikaykurmi Jesús ollqutupar nirqan: <<Wamrakunata apayämunanta ama michäyaytsu. Wamranö kaqkunapämi Tayta Diospa mandakuyninqa. 15Rasunpam nï: Pipis Tayta Diospa mandakuyninta wamranö mana chaskirqa manam paypa mandakuyninman yaykunqatsu>>.

16Tsaynö nirmi wamrakunata marqarkur umanta yataykur Tayta Diosta mañakurqan.

Rïcu runa ajatarä salvakunanpä Jesús ninqan

Mateo 19.16-30; Lucas 18.18-30

17Tsaypita Jesús aywaykaptinmi juk jövin cörrilla aywar puntanman qonqurikuykur nirqan: <<Rabí, alli runam kanki. ¿Imatatä ruräman mana ushakaq kawayta tarinäpä?>>

18Jesúsnam nirqan: <<¿Imanirtä alli runa kanqäta nimanki? Tayta Diosllam alliqa. 19Musyankim mandamientukuna ninqanta: <Ama runa mayikita wanutsinkitsu.#Éxo. 20.13; Deut. 5.17. Ama adulteriu jutsata rurankitsu.#Éxo. 20.14; Deut. 5.18. Ama suwakunkitsu.#Éxo. 20.15; Deut. 5.19. Ama manakaqkunata pitapis tumpankitsu.#Éxo. 20.16; Deut. 5.20. Ama runa mayikita llullapankitsu. Mamaykita y papänikita alli rikanki#Éxo. 20.12; Deut. 5.16.> >>.

20Tsay runanam nirqan: <<Rabí, tsaykunataqa wamra kanqäpitam llapanta cumplirqü>>.

21Tsaymi Jesús rikaykur kuyaparnin nirqan: <<Jukrämi cumplinaykipä faltan. Llapan imaykaykikunatapis rantikuskir tsay qellayta pobrikunata qaray. Tsaynö ruraptikiqa ciëluchömi riquëzayki kanqa. Tsaypita [cruznikita umrukurkur] qatimay>>.

22Tsaynö niptin pasaypa rïcu karmi tsay jövin llakishqa aywakurqan. 23Tsaymi entërupa rikachakuskir discïpulunkunata Jesús nirqan: <<¡Alläpa ajam rïcu runakuna Tayta Diospa mandakuyninman yaykuyänanpä!>>

24Tsaynö niptinmi discïpulunkuna mantsakashqa kayarqan. Tsaymi Jesús yapay nirqan: <<Kuyay wamräkuna, ¡alläpa ajam [rïcu kayninman yärakuq runakuna] Tayta Diospa mandakuyninman yaykuyänanpä! 25Rïcu runa Tayta Diospa mandakuyninman yaykunqanpitaqa mas fäcilmi camëllupis awjapa uchkunpa päsanman>>.#Prov. 11.28.

26Tsaynö niptinmi discïpulunkuna masrä mantsakar kikinkunapura parlayarqan: <<Tsaynö kaptinqa ¿pirä salvakunqa?>>

27Paykunata rikaykurmi Jesús nirqan: <<Runakuna salvakuyänanpäqa alläpa ajam. Peru Tayta Diospämi sïqa imapis ajatsu>>.

28Pedrunam nirqan: <<Taytay, noqakunaqa llapan imaykäkunatapis jaqiskirmi qamta qatiräyä>>.

29Jesúsnam nirqan: <<Rasunpam nï: Pipis wayinta, wawqinkunata, paninkunata, mamanta, papäninta, [warminta,] tsurinkunata y chakrankunatapis noqa raykur y alli willakuynï raykur jaqiq kaqmi 30kay vïdachö pachak (100) kuti masta chaskinqa. Tsaynöpam wayinkuna, wawqinkuna, paninkuna, mamankuna, tsurinkuna y chakrankunapis paypa kayanqa. Peru criyimunqanpitam chikiyanqa. Tsaynö kaptinpis washa vïdachö mana ushakaq kawaytam tarinqa. 31Atskaqmi respitashqa kaykaqkuna manakaqman churashqa kayanqa. Manakaqman churashqa kaqkunanam respitashqa kayanqa>>.

Wanutsiyänanpä kanqanta Jesús yapay willakunqan

Mateo 20.17-19; Lucas 18.31-34

32Jerusalénpa aywar discïpulunkunapa puntantam Jesús aywarqan. Jerusalénchö wanutsiyta munayanqanta musyarmi discïpulunkuna y paywan aywaqkunapis mantsariykar aywayarqan. Tsaymi chunka ishkay discïpulunkunata jukläman qayaskir ima päsananpä kanqantapis willar Jesús nirqan: 33<<Musyayankim Jerusalénman aywanqantsikta. Tsaychömi Runapa Tsurinta prësu tsariskir mandaq sacerdötikunaman y ley yachatsikuqkunaman apayanqa. Paykunam wanutsiyänanpä condenayanqa. Mana Israel autoridäkunaman entregayaptinmi 34asipäyanqa, castigayanqa, toqapuyanqa y wanutsiyanqa. Peru kimsa junaqtaqa kawamunqam>>.

Santiago y Juan rugakuyanqan

Mateo 20.20-28

35Tsaypitanam Zebedeupa tsurinkuna Santiago y Juan Jesúsman witiykur niyarqan: <<Rabí, rugakuyälläshayki>>.

36Jesúsnam nirqan: <<¿Imallatarä?>>

37Paykunanam niyarqan: <<Mandakuq kanaykipä Tayta Dios churashuptiki juknïta derëchaykiman y juknïtana itsuqnikiman jamatsiyämanki>>.

38Jesúsnam nirqan: <<Manam imata mañakayämanqaykita musyayankitsu. ¿Noqa upunäpä kaq cöpata#10.38a Cöpapä parlarqa Tayta Dios rabyar jutsa ruraqkunata castigananpä kanqantam nirqan. Tsaypita masta musyanaykipä liyinki Sal. 75.8; Isa. 51.17; Jer. 25.15-29; Hab. 2.16. upuyankimantsurä? ¿Awantayankimantsurä bautizayämänanpä kanqannö bautizayäshuptiki?>>#10.38b Bautizayämänanpä kanqannö bautizayäshuptiki ninanqa wanutsiyämänanpä kanqannö wanutsiyäshuptiki ninanmi.

39Paykunanam niyarqan: <<Awmi, taytay>>.

Jesúsnam nirqan: <<Rasunpam noqa upunäpä kaq cöpata upuyanki y bautizayämänanpä kanqannömi bautizayäshunki. 40Peru derëchäman ni itsuqnïman jamatsinäpä manam noqapitatsu. Tsaymanqa jamayanqa Papänï munanqan kaqkunallam>>.

41Tsay rugakuyanqanta wiyaykurmi wakin discïpulunkuna Juanta y Santiaguta ajapäyarqan. 42Tsaymi discïpulunkunata qayaykur Jesús nirqan: <<Musyayanqaykinöpis nación mandaq runakunaqa runakunata munayanqantam ruratsiyan. 43Peru qamkunachöqa manam tsaynö kanmantsu. Mayqaykipis mandaq kayta munarqa sirviqnölla runa mayikikunata yanapayay.#Luc. 22.25-26. 44Alli rikashqa kayta munarqa pïmaypäpis esclävunölla kayay.#Mat. 23.11; Mar. 9.35; Luc. 22.26. 45Runapa Tsurinpis manam sirvishqa kananpätsu shamushqa, sinöqa sirvinanpä#Luc. 22.27; Juan 13.12-15. y runakuna raykur wanur atskaqta salvananpämi>>.

Bartimeuta Jesús allïtsinqan

Mateo 20.29-34; Lucas 18.35-43

46Tsaypitanam Jericó markaman chäyarqan. Jericópita discïpulunkunawan y mas atskaq runakunawan yarquykäyaptinmi Timeupa tsurin Bartimeo limushnata mañakur nänichö jamaraykarqan. Payqa qapram karqan. 47<<Nazaret runa Jesúsmi päsaykan>> niyaptinmi qayakur nirqan: <<¡Davidpa Tsurin Jesús, kuyapaykallämay!>>

48Tsaynö qayakuptinmi upälla kananpä runakuna ollqutupäyarqan. Ollqutupäyaptinpis masrämi qayakur nirqan: <<¡Davidpa Tsurin, kuyapaykallämay!>>

49Qayakunqanta wiyaskirmi Jesús ichiykur tsay qaprata qayatsirqan. Tsaymi qaprata runakuna niyarqan: <<Ama mantsariytsu. Jesúsmi qayashunki. Ras aywashun>>.

50Tsaynö niyaptinmi ras shärirkur punchunta jitaskir Jesús kaqman aywarqan. 51Jesúsnam tapurqan: <<¿Imachö yanapanätatä munanki?>>

Qapranam nirqan: <<¡Rabí, ñawï allïnantam munä!>>

52Jesúsnam nirqan: <<Kananqa aywakuyna. Yärakamunqaykipitam ñawiki allinqana>>.

Tsaynö niptinmi jinan höra ñawin alliskirqan. Tsaypitanam Jesúspa qepanta aywarqan.

Currently Selected:

Marcos 10: qxo

Highlight

Copy

Compare