Mateo 28

Wanunqanpita Jesús kawamunqan

Marcos 16.1-8; Lucas 24.1-12; Juan 20.1-10

1Jamay junaq päsaskiptinnam domingu wäray tsaka tsakalla María Magdalenawan juknin María Jesús pamparanqan sepultüra rikaq aywayarqan. 2Aywaykäyaptinmi Tayta Dios mandamunqan ángel ciëlupita urämuptin patsa pasaypa kuyurqan. Jesús pamparanqan sepultüraman chaykurmi tsaparaq rumita witiskatsir jananman jamaykurqan. 3Tsay ángel illaqukuynörämi atsikyarqan. Röpanpis rashtanö yuraqmi karqan. 4Angelta rikaykurmi soldädukuna pasaypa mantsakaywan siksikyar chiyaskiyarqan.

5Warmikuna chaykuyaptinmi ángel nirqan: <<Ama mantsakäyaytsu. Musyämi crucificayanqan Jesúspa ayanta rikaq shayämunqaykita. 6Manam kaychönatsu. Kawamunanpä ninqannöllam kawamushqa. Mayman churayanqantapis rikayänaykipä shayämuy. 7Kananqa ras aywar discïpulunkunata willayay Jesús kawamunqanta. Tsaynölla willayay Galileaman puntaykanqanta y tsaychö paywan tinkuyänanpä kanqanta. Tsaytam qamkunata willä>>.

8Ángel tsaynö niptinmi warmikunaqa mantsakashqa kaykäyanqanpita pasaypa kushikur Jesúspa discïpulunkunaman willaq cörrilla aywayarqan. [Tsaynö aywaykäyaptinmi] 9Jesús yuripuskir saludarqan. Tsaymi tsay warmikuna Jesúspa chakinta makallakurkur adorayarqan. 10Jesúsnam nirqan: <<Ama mantsayämaytsu. Aywar wawqïkunata#28.10 Wawqïkunata willayay nirqa discïpulunkunata willananpämi Jesús nirqan. willayay Galileaman aywayänanpä. Tsaychönam paykunawan tinkushä>>.

Soldädukuna llullakuyänanpä pägayanqan

11Warmikuna kutiskiyaptinmi sepultürata täpaq wakin soldädukunapis Jerusalénman aywar ima päsanqantapis mandaq sacerdötikunata willayarqan. 12Willayaptinmi mandaq sacerdötikuna Israel mayor runakunawan qorikaykur imata rurayänanpäpis willanakuyarqan. Tsaynö willanakuskirmi soldädukunata atska qellayta pägar 13niyarqan: <<Runakunata niyanki Jesúspa discïpulunkuna paqaspa aywar ayanta suwar apakuyanqanta. Tsaynölla niyanki punukashqa kar imatapis mana mayayanqaykita. 14Pilato musyaptinqa noqakunam paywan parlayäshä mana castigayäshunaykipä>>.

15Tsaymi päguta chaskiskir soldädukuna aywarnin mandaq sacerdötikuna niyanqannölla runakunata willayarqan. Tsaynö willayanqantam Israel runakuna hasta kananyaqpis criyiyan.

Willakuyänanpä discïpulunkunata Jesús mandanqan

Marcos 16.14-18; Lucas 24.36-49; Juan 20.19-23; Hechos 1.6-8

16Jesúspa chunka juk discïpulunkunanam Galileaman chaykur aywayarqan#Mat. 26.32; Mar. 14.28. mayninchöpis tinkuyänanpä Jesús ninqan jirkaman. 17Tsaychömi Jesúswan tinkuskir adorayarqan. Peru wakinqa rikaykarpis manam Jesús kanqanta criyiyarqanrätsu.

18Discïpulunkunaman witiykurmi Jesús nirqan: <<Kay patsachö y ciëluchöpis llapanpä poderyuq kanäpämi Tayta Dios churamashqa. 19Tsaymi maytsay markakunapapis aywar discïpulü kayänanpä runakunata yachatsiyanki.#Hech. 1.8. Paykunata bautizayanki Tayta Diospa jutinchö, Tsurinpa jutinchö y Espíritu Santupa jutinchö. 20Tsaynölla llapan ninqäkunata cäsuyänanpä yachatsiyanki. Noqaqa qamkunawanmi imaypis kaykäshä kay patsa ushakanqanyaq>>.

[Amén.]

Currently Selected:

Mateo 28: qxo

Highlight

Compare

Copy