Mateo 27

Pilatuman Jesústa apayanqan

Marcos 15.1; Lucas 23.1-2; Juan 18.28-32

1Patsa waraykaptinnam mandaq sacerdötikuna y Israel mayor runakuna Jesústa imanöpapis wanutsiyänanpä willanakuyarqan. 2Willanakuskirnam Jesústa wataykur gobernador Pilatuman apayarqan.

Judas Iscariote jorkakunqan

Hechos 1.18-19

3Wanutsiyänanpä kanqanta musyaskirmi Jesústa rantikuq Judas pasaypa llakikurqan. Tsaymi mandaq sacerdötikuna y Israel mayor runakuna qorikäyanqanman aywaykur chaskinqan kimsa chunka (30) qellayta kutitsir#Hech. 1.18-19. 4nirqan: <<Jutsaynaq runata wanutsiyänaykipä entregarmi jutsata rurarqü>>.

Paykunanam niyarqan: <<¡Noqakunata manam imapis importayämantsu! ¡Imanöpis kakuy!>>

5Tsaynö niyaptinmi chaskinqan qellayta templuman jitaskir aywakurqan. Tsaypitanam jorkakuskirqan.

6Mandaq sacerdötikunanam tsay qellayta qoriskir niyarqan: <<Kay qellayqa runapa yawarninpa chaninmi. Tsaynö kaykaptinqa ofrendakunaman ama takushuntsu>>.

7Tsaymi willanakuskir tsay qellaywan manka ruraq runapa chakranta rantiyarqan jäpa runakuna wanuptin tsayman pampayänanpä. 8Tsaypitam kananyaqpis tsay chakrapa jutin Yawar Pampa. 9Chakrata tsaynö rantirmi profëta Jeremías qellqanqanta cumpliyarqan. Tsay qellqanqanchömi nin:

<<Paypa chanin ayka kananpäpis Israel runakuna niyanqannöllam kimsa chunka (30) qellayta chaskiyarqan.

10Tsay qellaywanmi Tayta Dios nimanqannölla manka ruraq runapa chakranta rantiyarqan>>.#Jer. 32.6-9; Zac. 11.12-13.

Jesústa Pilato tapunqan

Marcos 15.2-5; Lucas 23.3-5; Juan 18.33-38

11Jesústa chätsiyaptinmi gobernador Pilato tapurqan: <<¿Rasunpaku Israel runakunapa mandaqnin rey kanki?>>

Jesúsnam nirqan: <<Rasun kaqtam nirquyki>>.

12Tsaychö mandaq sacerdötikuna y Israel mayor runakuna Jesúspa contran imaykata niyaptinpis Jesús manam imatapis parlakurqantsu. 13Tsaymi Pilato tapurqan: <<¿Manaku imatapis ninki imaykata contrayki niyaptin?>>

14Tsaynö niptinpis Jesús manam imatapis parlakurqantsu. Tsaymi Pilato mantsakashqa ima niytapis puëdirqantsu.

Jesústa crucificayänanpä Pilato mandanqan

Marcos 15.6-15; Lucas 23.13-25; Juan 18.39—19.16

15Cada watam Pascuachö runakuna mañakuyanqan prësuta Pilato qarquq. 16Tsay watam pïmaypitapis chikishqa Barrabás jutiyuq runa prësu wichqaraykarqan. 17Tsayman runakuna qorikäyaptinmi Pilato tapurqan: <<¿Mayqan prësutatä qarqunäta munayanki? ¿Barrabástaku? ¿O Cristo ninqan Jesústaku?>>

18Pilato musyarqanmi Jesústa chikir payman prësu apayanqanta.

19Pilato tsaychö juzgar jamaraykaptinmi warmin willakatsir nirqan: <<Tsay runaqa jutsaynaqmi. Paywan ama mëtikuytsu. Payta prësu tsariyanqanpitam kanan paqas pasaypa mana allikunata sueñurqü>>.

20Peru mandaq sacerdötikuna y Israel mayor runakunanam sïqa runakunata willapäyarqan Barrabásta qarquskir Jesústa wanutsinanpä. 21Tsaymi <<¿mayqantatä qarqushä?>> nir Pilato yapay tapuptin runakuna niyarqan: <<Barrabásta qarquy>>.

22Pilatunam nirqan: <<Tsayöraqa Cristo ninqan Jesústa ¿imatatä rurashä?>>

Tsaynö niptinmi llapan niyarqan: <<¡Crucificay!>>

23Pilatunam tapurqan: <<¿Ima jutsatatä rurashqa?>>

Tsaynö niptinpis runakuna masrä qayararmi niyarqan: <<¡Crucificay!>>

24Runakuna pasaypa qayaräyaptinmi ima ruraytapis Pilato puëdirqantsu. Tsaymi yakuta apaskatsimur runakuna rikaykaptin makinta mayllakur#Deut. 21.6-9. nirqan: <<Kay runata wanutsiyaptiki noqa manam jutsayuqtsu kä. Qamkuna imanöpis kakuyay>>.

25Tsaynö niptinmi runakuna niyarqan: <<Kay runa wanunqanpita noqakuna y wamräkunam jutsayuq kayäshä>>.

26Tsaynö niyaptinmi Barrabásta Pilato qarqurqan. Jesústanam pasaypa asutaskatsir crucificayänanpä soldädukunaman entregarqan.

Jesústa kasha corönata jatitsiyanqan

Marcos 15.16-20; Juan 19.2-3

27Tsaypitanam soldädukuna Jesústa apayarqan Pilatupa despächunman. Tsayman llapan tröpa#27.27 Tröpa complëtuqa joqta pachak (600) soldädukunam kayarqan. soldädukuna juntapaykurmi 28Jesúspa röpanta lloqtiskatsir puka cäpata jatitsiyarqan. 29Tsaynöllam kashapita awashqa corönata umanman jatitsiyarqan. Derëcha kaq makinmannam carrïzuta aptatsiyarqan. Tsaypita puntanman qonqurikuykur asiparmi niyarqan: <<¡Alabashqa katsun Israel runakunapa mandaqnin rey!>>

30Tsaynöllam toqapurnin aptaranqan carrïzuta qechuskir umachö wiruyarqan. 31Tsaynö asiparmi jatitsiyanqan cäpata lloqtiskatsir kikinpa röpantana jatitsiyarqan. Tsaypitanam crucificaq apayarqan.

Jesústa crucificayanqan

Marcos 15.21-32; Lucas 23.26-43; Juan 19.17-27

32Crucificaq apaykäyanqanchömi Cirene nacionpita Simónwan tinkuyarqan. Paytam Jesús apaykanqan cruzta umrutsiyarqan.

33Tsaypitanam Jesústa chätsiyarqan Gólgota niyanqanman. Gólgota ninanqa Calavëra Sitiu ninanmi. 34Tsaychö ayaq jachawan takushqa vïnuta uputsiyta munayaptinpis yawarkur manam upuyta munarqantsu.#27.34 Tsaynö uputsiyta munayarqan alläpa nanayta Jesús mana sientinanpämi.

35Jesústa crucificaskirnam röpanta mayqanpis apananpä suertiyayarqan. [Tsaynö rurayänanpämi Tayta Diospa profëtan qellqanqanchö nin: <<Kikinpuram röpäta rakipänakuyarqan. Röpäta apayänanpämi suertiyayarqan>>.#Sal. 22.18.]

36Tsaypitanam täpar quëdayarqan. 37Imapita wanutsiyanqantapis runakuna musyayänanpämi juk letrëruta cruzpa puntanman clävayarqan. Tsay letrëruchömi nirqan: <<Kay runam Israel runakunapa mandaqnin rey Jesús>>.

38Jesús crucificaraykanqan lädunmanmi ishkay ladronkunatapis crucificayarqan, jukninta derëcha kaq lädunman y juknin kaqtana itsuq kaq lädunman. 39Jesús crucificaraykaqta rikarmi tsaypa päsaq runakuna asipäyarqan. Umankunata awirmi#Sal. 22.7; 109.25. 40niyarqan: <<Templutapis juchuskatsir kimsa junaqllata shäritsinaykipä nikarqa#Mat. 26.61; Juan 2.19. mä salvakuy, ari. Diospa Tsurin karqa mä cruzpita yarpamuy>>.

41Tsaynöllam mandaq sacerdötikuna, ley yachatsikuqkuna, [fariseukuna] y Israel mayor runakunapis Jesústa asipar niyarqan: 42<<Wakinta salvarpis kikinqa manam salvakuyta puëdintsu. Israel runakunapa mandaqnin rey karqa mä cruzpita yarpamutsun. Yarpamuptinqa criyishunmi. 43Payqa <Tayta Diospa Tsurinmi kä> nirmi Diosman yärakushqa. Rasunpa Tsurin kaptinqa Tayta Dios kuyapar cruzpita jipitsun>>.#Sal. 22.8.

44Tsaynöllam lädunchö crucificashqa kaykaq ladronkunapis burlakuyarqan.

Jesús wanunqan

Marcos 15.33-41; Lucas 23.44-49; Juan 19.28-30

45Pullan junaqpita hasta las tresyaqmi patsa tsakaskirqan. 46Tsay höram jinchipa Jesús nirqan: <<Elí, Elí, ¿lama sabactani?>>

Tsay ninanqa <<Tayta Dios, Tayta Dios, ¿imanirtä dëjamanki?>> ninanmi.#Sal. 22.1.

47Tsaynö ninqanta wiyarmi tsaychö kaykaq wakin runakuna niyarqan: <<Profëta Elíastam qayaykan>>.

48Tsaynö niyaptinmi juk runa ras aywar pochquq vïnuman esponjata ushmaskatsir carrïzupa puntanman watarqan. Tsayta Jesústa shoqutsiyta munaptinmi#Sal. 69.21. 49runakuna niyarqan: <<Ama shoqutsiytsu. Mä rikashun cruzpita jipinanpä Elías shamunäkush>>.

50Tsaypitanam yapay jinchipa qayaraskir Jesús wanuskirqan. 51Tsay höram templu rurinchö tsaparaq cortïna#Éxo. 26.31-33; 2Crón. 3.14. janapita urayaq rachiskirqan. Patsa pasaypa kuyuptinmi qaqakunapis partikäyarqan. 52Sepultürakunapis kichakaptinmi Tayta Dios munanqannö kawaq runakunapis kawayämurqan. 53Jesús kawamuptinnam pamparäyanqanpita yarqamur sagrädu Jerusalén markaman yaykuyarqan. Atskaq runakunam tsay kawamuq runakunata rikayarqan.

54Jesústa täpaq capitán y soldädunkunam patsa kuyuqta mayar y llapan päsanqankunata rikar pasaypa mantsakar niyarqan: <<¡Rasunpam kay runaqa Diospa Tsurin kashqa!>>

55Tsaychömi atskaq warmikuna karullapita rikaraykäyarqan. Tsay warmikunam Galileapita Jesústa yanapar aywayarqan. 56Paykunawanmi kaykarqan María Magdalena, Santiagupa y Josépa maman María y Zebedeupa warminpis.#Luc. 8.2-3.

Jesústa pampayanqan

Marcos 15.42-47; Lucas 23.50-56; Juan 19.38-42

57Patsa tsakaykaptinnam Arimateapita juk rïcu runa José jutiyuq Pilato kaqman charqan. Paypis Jesúspa discïpulunmi karqan. 58Chaykurmi Pilatuta mañakur nirqan: <<Jesúspa ayanta pampanäpä dëjapaykamay>>.

Tsaynö mañakuptinmi Pilato soldädukunata nirqan Jesúspa ayanta dëjapäyänanpä. 59Dëjapaskiyaptinmi lïnupita rurashqa limpiu säbanaswan piturkur 60qaqachö tsayrä uchkushqa sepultüraman pamparqan. Tsaypitanam jatunkaray rumiwan sepultürapa punkunta tsapaykur aywakurqan. 61Tsaychömi María Magdalena y jukaq Maríapis jamaraykäyarqan.

Jesúspa sepultüranta soldädukuna täpayanqan

62Jesús wanunqanpita waraynin jamay junaqnam mandaq sacerdötikuna y fariseukuna Pilato kaqman aywaykur 63niyarqan: <<Taytay, tsay llulla runam nirqan: <Wanunqäpita kimsa junaqtam kawamushä>.#Mat. 16.21; 17.23; 20.19; Mar. 8.31; 9.31; 10.33-34; Luc. 9.22; 18.31-33. 64Tsaynö nishqa kaykaptinqa sepultürata kimsa junaqyaq soldäduykikunawan täpaykatsillay. Manatsayqa discïpulunkuna Jesúspa ayanta [paqaspa] suwaskirmi runakunata criyitsiyanqa wanunqanpita kawamunqanta. Tsaynö llullakurqa tsay runa engañanqanpita peormi runakunata engañayanqa>>.

65Pilatunam nirqan: <<Soldädukuna sepultürata täpayänanpä pushayay>>.

66Tsaynö niptin aywarmi sepultüra tsaparaq rumita sëllayarqan pipis kichaptin musyayänanpä. Tsaypitanam soldädukunata täpayänanpä churayarqan.

Currently Selected:

Mateo 27: qxo

Highlight

Compare

Copy