LUKAS 7
7
Mawu Yesus napaapian allangngu sangkatou tembonannu tantaran Roma
(Mat. 8:5-13)
1Napawe suete nabbati'u al᷊aṛṛa'a udde su taumata nambo, Mawu Yesus inaite su Kapernaum. 2Isudde pia tembonannu tantaran Roma pia allangnge apan arangnguanne. Allangnga udde marada'a wuṛṛu maranite mate. 3Napawe tembonannu tantara udde naaringikka ola'u Mawu Yesus, i tou nandolokku manga pira tembonannu taumatan Yahudi inai ringannu Mawu Yesus madorongnga tadea'u i Tou rumanta wuṛṛu mapaapian allangnge. 4Napawe na'omate ringannu Mawu Yesus, i mangitou mangke sussal᷊ande tadea'u i Tou mantul᷊ungngu tembonanne udde. “Tembonanne udde ṛinone itul᷊ungngi Iamangnga,” unni mangitou su Mawu Yesus, 5“ana waugu i tou marangngu walahanni ite wuṛṛu suete napararisikku wal᷊em pattataṛṛamawuanni yami.”
6Ne Mawu Yesus inaite su sampunna ringanni mangitou. Napawe Mawu Yesus maranite ma'oma su wal᷊e udde, tembonannu tantara udde nandolokku manga hawene iapaawal᷊o, “Ariete Iamangnga matingkasahadda madumatingngu wal᷊e'u. I Ya'u tawe ṛinone manarimmattu Iamangnga su wal᷊e'u. 7Ana waugu udde i ya'u sassane tawe waṛṛani sumaruanna su Iamangnga. Nariaddi pangagilem parenta tadea'u mangangimbe'u mapia. 8Ana waugu i ya'u lai tuttuṛṛutta parentan tembonangku wuṛṛu wuassia'u lai pia tantara pangkanne mabbawoanna apan tuttuṛṛutta parenta'u. Amungkangngu ya'u mandolokku sangkatou, ‘Inaite!’ i tou sarun inai; wuṛṛu amungkangngu ya'u mamago lai waine, ‘Wette isindi!’ i tou lai sarun rumanta. Wuṛṛu amungkangngu i ya'u mamarenta allangku, ‘Ola'a indi!’ i tou sarun tumuṛṛutta ma'ola'a udde.”
9Mawu Yesus naherangnga naaringikka aroddi. I Tou nanaile wuṛṛu nabbisara taumata nambo apan tantal᷊anna ual᷊aṛṛenggenna si Tou, “Wal᷊ine hampa taumata indi. Su wallattu taumatan Israel, i Ya'u taambe saran paassa naasomba pangangimanna ahewalle ereindi!”
10Napawe manga taumata apan nirolokka udde nabelengke su wal᷊en tembonanne udde, allangnge napiate.
Mawu Yesus napaawiakka apia ana'u sangkatou wawine wal᷊u
11Tawe nal᷊annu wua'udde, Mawu Yesus inaite su soa Nain. Mallal᷊aṛṛenggen-Ne wuṛṛu taumata nambo inaite lai su sampunna ringanni Tou. 12Su tempo Mawu Yesus na'omate marani ngara pasallungannu su soa udde, pia taumata manambo uapasanna asuangnga watukku liuddu soa. Taumata nate udde ana'a esakka man sambau wuassu sangkatou wawine wal᷊u. Manambo taumata lal᷊oṛṛon soa uaṛṛundingannu inangnge. 13Napawe Mawu Yesus naasilo wawine wal᷊u udde, i Tou inumakkannu wawine udde see nabbisara, “Arie palluai Inangnga!” 14Wua'udde Mawu Yesus nangundaniten tampan asuangnga udde wuṛṛu namita. Ne manga mamamasanna nattaalle. Mawu Yesus nabbisara, “Ei umbasanna, i Ya'u mabbisara si'o pabbangunna!” 15Umbasanna apan natete udde, nabangunna inuma'ianna wuṛṛu nanattakke uahahatto. Ne tinantille Mawu Yesus su inangnge.
16Anambon taumata nata'utta wuṛṛu nanattakke maddalo Ruata. I mangitou mabbisara, “Sangkatou nabi apan wahewa suete nirumanta su wallatti ite! Ruata nirumantate manal᷊amatta pabbawalage!”
17Watti'a su ola'u Mawu Yesus indi nadingikke su ahewallu leta'u Yudea wuṛṛu su wanua maranine.
Darol᷊oṛṛanni Yohanes Mananaṛṛani
(Mat. 11:2-19)
18Mallal᷊aṛṛenggenni Yohanes namasingkatta si Yohanes anambon arariaddianna udde. Ne Yohanes namagote ruang katou mallal᷊aṛṛenggenne, 19see nandoloke mangitou inai ringannu Mawu Yesus wuṛṛu niapaiwal᷊o, “Ete Iamangnga taumata apan sarun rumanta tumuṛṛuttu pa'aire Ruata, ara'e i yami maṛṛado sangkatou waine lai?”
20Ruang katou mallal᷊aṛṛenggenni Yohanes inaite ringannu Mawu Yesus wuṛṛu nabbisara, “I Yohanes Mananaṛṛani nandolokki yami iapaiwal᷊o su Iamangnga, tanne ete Iamangnga taumata apan sarun rumanta tumuṛṛuttu pa'aire Ruata, ara'e ṛinone i yami maṛṛado taumata waine?”
21Su tempo udde, Mawu Yesus napaapian taumata nambo, wuṛṛu nallimbuakka anambon ghaṛṛaho lal᷊eo see na'ola'a taumata wuta naasilo. 22Nariaddi Mawu Yesus sinumimbakka, “Pabelengke ringanni Yohanes wuṛṛu wal᷊oa'a apa apan suete niaringiṛṛanna wuṛṛu niasiloanni yamiu: taumata wuta naasilo, taumata lome inumamatta, taumata radangnge paro napia, taumata wengella naaringikka, taumata nate nabbiakka apia, wuṛṛu Watti'u Al᷊al᷊uassa wuassu Ruata niapaasingkatta su taumata asiangnga. 23Lal᷊umanna'a su taumata apan tawe pinangiananne ipanol᷊a-U.”
24Napawe ralol᷊oṛṛanni Yohanes udde napul᷊ete, Mawu Yesus nanattakke nabbisara su taumata nambo udde su ola'i Yohanes, wisara-Ne, “I yamiu inai su wadda'a ma'ellega apa? Sangkul᷊appa nannal᷊o itattalla'u anginna? 25I yamiu inai ma'ellega apa? Sangkatou apan uapedetta maṛṛamaga? Manga taumata apan uapedetta aroddi wuṛṛu wiakke lembo mapia uatana'a su tampan araratuanna! 26Nariaddi, yamiu sumabangnga ma'ellega apa? Ma'ellega sangkatou nabi? Atonna, ewe'e nangillembo lai wuassu sangkatou nabi. 27Ana waugu i Yohanes udde niapaasingkatta su wageangngu Wuke Susi ereindi,
‘Ete indi ralol᷊oṛṛang-Ku,’ wisara Ruata,
‘I Ya'u sarun mandolokki tou malliu ṛoro wuas-Si'o,
tadea'u i tou mamu'a lal᷊anna amatan-Nu!’ ”
28“Paanaunge,” unnu Mawu Yesus, “su runia indi taambe saran sangkatou taumata maggewal᷊anna wuassi Yohanes Mananaṛṛani. Arawe taumata apan adio'anne su wallattu al᷊aṛṛana'u Ruata, magewal᷊anna wuassi Yohanes Mananaṛṛani.”
29Anambon taumata – nasutta madarorongnga wose – naaringikka Mawu Yesus mabatti'u olangnge udde; ete i mangitou manga taumata apan suete tinumuṛṛutta al᷊awo'u apulun Ruata wuṛṛu maapulu saṛṛanianni Yohanes. 30Arawe manga taumatan Farisi wuṛṛu manga hurun agama maddiri manengkamma ṛiinnu Ruata su wadangngi mangitou. I mangitou maddiri saṛṛanianni Yohanes.
31See Mawu Yesus nabbisarate apia, wisara-Ne, “Ringannu apa i Ya'u manumandingngu taumata su tempo indi? Massul᷊ungngu apa i mangitou? 32I mangitou ere al᷊aṛṛana'a ua'ianna su pasakka; ammul᷊anna sambau mabbisara ammul᷊anna waine. ‘I yami mangngantarin aantarin lal᷊uassa si yamiu, arawe i yamiu maddiri massal᷊aingnga! I yami mangantari aantarin tatampungnga, arawe i yamiu maddiri lumuai!’ 33I Yohanes Mananaṛṛani nirumanta – i tou mappuasa wuṛṛu tawe ma'inumma anggore – wuṛṛu i yamiu mabbisara, ‘I tou niasuttannu setanna!’ 34Ana'u Taumata nirumanta – i Tou u'anna wuṛṛu ma'inumma – see i yamiu mabbisara, ‘Pa'ellega taumata udde! Wal᷊iu, taṛṛa wu'anna, hawe madarorongnga wose wuṛṛu hawen taumata marosa.’ 35Salaiwe aroddi, apapanden Ruata niatialanna su tangngan taumata nambo apan nanarimmatti Tou.”
Mawu Yesus su wal᷊en Simon
36Sangkatou taumatan Farisi, aranne i Simon, nangahe Mawu Yesus umanna. Mawu Yesus inaite su wal᷊ene wuṛṛu inuma'ianna see inumante. 37Su soa udde pia lai sangkatou wawine apan mabbiakka sulal᷊ummu paddarosa. Napawe i tou naaringikka manungku Mawu Yesus tantal᷊anna u'anna su wal᷊e taumatan Farisi udde, i tou nirumanta uaapiddu sambau wotolla wuassu pualam lal᷊oṛṛoannu lana mawangngi. 38I tou dirumarisikka su liuddu Mawu Yesus maranin leddane wuṛṛu nilumuai lapiddu naṛṛolo ledda Mawu Yesus ringannu allo matane. Wua'udde ledda Mawu Yesus pineddan utangnge see niari'i tou wuṛṛu niwokkannu lana mawangngi. 39Napawe taumatan Farisi apan nangahe Mawu Yesus naasilo olangnge udde, i tou nabbisara sulal᷊ummu naungnga, “Iraṛṛangngo taumata indi sangkatou nabi, i Tou masingkatta isai wawine apan nangindingnga si Tou, wuṛṛu manungku wawine udde mabbiakka sulal᷊ummu paddarosa!”
40See Mawu Yesus nabbisara si Simon, “Simon, pia sambau Ta'u iwal᷊o si'o.”
“Ore, Iamangnga Huru,” sasimbakki Simon, “Wal᷊oa'e.”
41Mawu Yesus nabbisara, “Pia ruang katou apan pia utangnge su taumata apan mappawallassu roitta. Sangkatou pia utangnge lima ṛasutta roitta sal᷊a'a, wuṛṛu sangkatou lai limam pul᷊o roitta sal᷊a'a. 42Itarua tawe maawaekka utangnga udde, ana waugu udde utangngi tarua tate niapawaekka. Ne, isai su wallatti tarua lembo marangngu taumata apan napawallassu roitta udde?”
43“I ya'u maṛṛangngo taumata apan utangnge anamboanne apan tawe niapawaekka!” sasimbakki Simon.
“Asingkannu naṛṛino,” sasimbakku Mawu Yesus. 44See Mawu Yesus na'ellega wawine udde wuṛṛu nabbisara si Simon, “I'o naasilo wawine indi? I Ya'u nirumanta su wal᷊enu, arawe i'o tawe nanaddia ua'e ipangukkassa ledda-U; arawe wawine indi suete nangukkassa ledda-U ringannu allo matane, wuṛṛu nipeddan utangnge. 45I'o tawe nanal᷊oho si Ya'u ringannu aari'a, arawe wawine indi tawe illol᷊one mangngari'a ledda-U nanattakka i Ya'u naranta isindi. 46I'o tawe nandal᷊innu lana su pua-U, arawe wawine indi suete nandal᷊innu lana mawangngi su ledda-U. 47Atonna: darangngune apan wahewa udde napaal᷊iatta'a manungku rosane apan manambo udde suete niampunganna! Amungkangngu taumata onggol᷊annu aampungnga matul᷊ungnga, matul᷊ungnga lai i tou mandangngu.”
48See Mawu Yesus nabbisara wawine udde, “Manga rosanu suete niampunganna.”
49Manga taumata waine apan ua'ianna u'anna su sampunna ringannu Mawu Yesus mannattakke uahahatto sangkatou ringannu waine, “Isai taumata indi na'oman sara i Tou wotongnge mangampungnga rosa?”
50Arawe Mawu Yesus nabbisara wawine udde, “Ana waugu i'o mangngimanna si Ya'u, i'o sarun masal᷊amatta. Roote ringannu padarame!”
Currently Selected:
LUKAS 7: LAITLD
Highlight
Share
Copy
Want to have your highlights saved across all your devices? Sign up or sign in