LUKAS 6
6
Aiwal᷊o su ola'u allon Sabatta
(Mat. 12:1-8; Mrk. 2:23-28)
1Su sambau allon Sabatta, su tempo Mawu Yesus sinumabbi sambau waillu gandumma, mallal᷊aṛṛenggen-Ne nangitingnga gandumma. I mangitou nangusu gandumma udde ringannu limane, see nianna. 2Sire pira taumatan Farisi nabbisara, “Anio i yamiu lullawangnga manga Titan agamang kite ringannu ma'ola'a apa isassingadda su allon Sabatta?”
3Mawu Yesus sinumimbakka, “I yamiu taambe naawasa su ola'u apa a'olaanni Daud, su tempo i tou wuṛṛu manga taumatane mal᷊unussa? 4I tou sinumutta sulal᷊ummu Wal᷊e Mawu wuṛṛu nanganu roti apan suete tinantilla su Ruata, see nianna. Wua'udde roti nianggilla lai su manga taumatane. Sumbal᷊i tumuṛṛuttu Titan agaman kite, tumba'u manga imam sassane wotongnge umanna roti udde.”
5See Mawu Yesus nabbisara, “Ana'u Taumata uataṛṛino allon Sabatta!”
Taumata limane lome samba'a
(Mat. 12:9-14; Mrk. 3:1-6)
6Su sambau allon Sabatta apan baine, Mawu Yesus inaite nangaṛṛa'a su wal᷊em pattataṛṛamawuanna. Isudde pia taumata limane lome samba'a. 7Sire pira hurun agama wuṛṛu taumatan Farisi maddea'a pasasal᷊a Mawu Yesus tadea'u wotongnge i Tou ialae. Nariaddi i mangitou sidutu mannutukka tanne i Tou mapaapian taumata su allon Sabatta. 8Arawe Mawu Yesus naasingkatta ṛingiṛṛanni mangitou. Ne i Tou nabbisarate su taumata limane lome samba'a udde, “Wette darisikke isindi su saruanne!” Taumata udde nabangunte, see dirumarisikke isudde. 9Wua'udde Mawu Yesus naiwal᷊o su manga taumata isudde, “Tumuṛṛuttu agama, i ite wotongnge mammanara apa su allon Sabatta? Ma'ola'a apapia ara'e ma'ola'a al᷊al᷊eo? Mandalukka taumata ara'e manilaka?” 10Mawu Yesus na'ellega uapal᷊iwutta si mangitou sarangkanambone, see nabbisara taumata udde, “Ul᷊uṛṛa'e limanu.” Taumata udde nangul᷊ukken limane, see limane udde napiate.
11Arawe manga hurun agama wuṛṛu manga taumatan Farisi udde nasa'u atonna, wuṛṛu nanattakke ma'ire su ola'u apa apan wotongnge olaanni mangitou su Mawu Yesus.
Mawu Yesus namile sire mapul᷊o dua rasul
(Mat. 10:1-4; Mrk. 3:13-19)
12Su tempo udde Mawu Yesus sinuma'ate su sambau wuidda ana see inumal᷊iomanna. Isudde i Tou inumal᷊iomanna su Ruata su al᷊o'engngu ṛabbi. 13Napawe allote, i Tou namagote mallal᷊aṛṛenggen-Ne, see namilete sire mapul᷊o dua su atoune wuassu wallatti mangitou. I Tou nanagon sire mapul᷊o dua su atoune udde rasul. I mangitou eteudde: 14I Simon (isassago lai i Petrus), wuṛṛu i Andreas tuṛṛangngi Simon; i Yakobus wuṛṛu i Yohanes, i Filipus wuṛṛu i Bartolomeus, 15i Matius wuṛṛu i Tomas, i Yakobus ana'i Alfeus, wuṛṛu i Simon (isassago lai i Patriot). 16I Yudas ana'i Yakobus wuṛṛu i Yudas Iskariot apan sal᷊immurine naola'a mandal᷊al᷊eo.
Mawu Yesus mangngaṛṛa'a wuṛṛu mappaapian taumata
(Mat. 4:23-25)
17Wua'udde Mawu Yesus sinumossokke wuassu wuidda su sampunna ringannu manga rasul udde, see natta'alla wuṛṛu dirumarisikka su sambau tampa ratakke. Isudde pia lai sambau ammul᷊annu manga mallal᷊aṛṛenggenna waine wuṛṛu manambo lai taumata rudanta wuassu anambon tampa su ahewallu leta'u Yudea, Yerusalem, wuṛṛu manga soan Tirus wuṛṛu Sidon su winggin tahal᷊oangnga. 18I mangitou nirumanta madaringikka Mawu Yesus, wuṛṛu see iapa'apia wuassu manga rada'i mangitou. I mangitou apan niasuttannu ghaṛṛaho lal᷊eo nirumanta lai see niapa'apia. 19Anambon taumata maddea'a suapan wotongnge maaggassa Mawu Yesus, ana waugu pia taṛṛino sussabangnga wuassu wadangnge apan maapia si mangitou sarangkanambone.
Al᷊al᷊uassa wuṛṛu asasusa
(Mat. 5:1-12)
20Mawu Yesus nanutudda mallal᷊aṛṛenggen-Ne see nabbisara,
“Lal᷊umanna'a i yamiu manga taumata asiangnga,
ana waugu ete i yamiu udde lal᷊oṛṛon araratuannu Ruata!
21Lal᷊umanna'a i yamiu apan mal᷊unussa orassa indi;
i yamiu sarun iapaal᷊aidda!
Lal᷊umanna'a i yamiu apan lulluai orassa indi;
i yamiu sarun lumagge!
22Lal᷊umanna'a i yamiu amungkangngu ia'arantinna, ia'adiri, a'adio'anna wuṛṛu hagal᷊usaanna ana waugu Ana'u Taumata! 23Manga nabi su tempo rorone a'olaanna lai aroddi. Amungkangngu olangnge udde mariaddi, ṛinone yamiu lulluassa wuṛṛu massal᷊aingnga ringannu lullala'a ana waugu wahewa lal᷊antakke si yamiu apan suete nissaddia su surga.
24Arawe nasilakate i yamiu taumata ala su orassa indi;
ana waugu i yamiu naapendampe al᷊al᷊uassa!
25Nasilakate i yamiu apan mal᷊aida orassa indi;
ana waugu i yamiu sarun amal᷊unusanna!
Nasilakate i yamiu apan lullage orassa indi;
ana waugu i yamiu sarun masusa wuṛṛu lumuai!
26Nasilakate i yamiu, amungkangngu anambon taumata maddalo si yamiu; ana waugu aroddi lai iupungnga al᷊amona mangitou maddalo manga nabi awusu su tempo rorone.”
Aakkanna su seetta
(Mat. 5:38-48, 7:12a)
27“Arawe i yamiu apan madaringikka si Ya'u orassa indi, i Ya'u mannanata ereindi: akkana'a manga seennu, wuṛṛu pa'ola'a pallal᷊agu mapia su taumata apan maddantinnu. 28Al᷊amate taumata apan mammontoga si yamiu, wuṛṛu al᷊iomana'a taumata apan lal᷊eo si yamiu. 29Amungkangngu taumata mamero wambalanu samba'a, wala'a lai i tou mamero wambalanu samba'a. Amungkangngu jubahnu aṛṛoanna, anggil᷊a'a lai laungngu. 30Amungkangngu taumata madorongnga sarannapa si yamiu, anggil᷊a'a lai udde si tou; wuṛṛu amungkangngu darotongngu aṛṛoanna, arie padoronge apia. 31Ola'a su taumata waine ere lai yamiu ma'apulu olaanni mangitou mapia.
32Amungkangngu yamiu tumba'u u'akkannu manga taumata apan mandangngu si yamiu, apa al᷊amannu? Taumata marosa lai u'akkannu manga taumata apan mandangngu si mangitou! 33Wuṛṛu amungkangngu i yamiu pia pallal᷊agu mapia su taumata apan mapia si yamiu, apa al᷊amannu? Taumata marosa lai ma'ola'a aroddi! 34Wuṛṛu amungkangngu i yamiu tumba'u mapawallassu roitta su taumata apan botongnge maawelengngu roitta udde, apa al᷊amanne si yamiu? Taumata marosa lai mapaawallassu roitta su taumata marosa, see doronganna apia roitta udde. 35Ṛinone wal᷊ine aroddi! Ewe'e i yamiu ṛinone umakkannu seetti yamiu wuṛṛu pia pallal᷊agu mapia si mangitou. I yamiu ṛinone mapawallassa wuṛṛu arie mangantimma mawelengnga apia. Amungkangngu aroddi, lal᷊antakku wahewa wuṛṛu i yamiu sarun maola'a al᷊aṛṛana'u Ruata Apan Atanggaṛṛanne. Ana waugu Ruata naungnge mapia su saruannu taumata apan waga ma'aidengkamanna, wuṛṛu su saruannu taumata lal᷊eo lai. 36Ṛinone i yamiu uararangngu ere Iamangngu lai mandangngu si yamiu!”
Maṛṛuungngu taumata
(Mat. 7:1-5)
37“Imbaṛṛangnga maṛṛuungngu taumata waine, tadea'u i yamiu lai sassane tawe iṛṛuungngu Ruata. Imbaṛṛangnga maṛṛuumannu taumata waine, tadea'u i yamiu sassane tawe iṛṛuumannu Ruata. Ampungete taumata waine, tadea'u Ruata lai mangampungnga si yamiu. 38Pangonggolla su taumata waine, tadea'u Ruata lai mangonggolla si yamiu; i yamiu sarun manengkamma aonggolla nangillembo apan suete niuukka masada-sadatta maola'a wageangngu. Ana waugu auuṛṛanna apan ipanguukki yamiu su taumata waine sarun ipanguukku Ruata lai si yamiu.”
39Wua'udde Mawu Yesus nabatti'u sasumandingnga si mangitou ere indi, “Amungkangngu taumata wuta mangehetta taumata wuta waine, itarua sarun manawo sulal᷊ummu loṛṛangnga. 40Tawe ana'a si'ol᷊a nangillembo wuassu hurune. Arawe ana'a si'ol᷊a apan nasuete si'ol᷊ane, sarun maola'a lai massul᷊ungngu hurune.
41Anio i yamiu ma'asilo alu adio'a sulal᷊ummu matan tuṛṛangngu, arawe sal᷊aba'u su matanu sassane tawe asiloannu? 42Ereapa i yamiu wotongnge mabbisara tuṛṛangngu, ‘Wette tuṛṛangnga, i ya'u mapasabangngu alu adio'a su matanu,’ arawe sulal᷊ummu matanu sassane pia sal᷊aba'u apan tawe asiloannu? Ei lilangkamal᷊e'a! Pasabanga'e rorone sal᷊aba'u su matanu sassane, wakkute udde i yamiu wotongnge maasilo ringannu masemakka wuṛṛu wotongnge mapasabangngu alu adio'a wuassu matan tuṛṛangngu.”
Alu wuṛṛu manga wuane
(Mat. 7:16-20, 12:33-35)
43“Aaluanna apan masuwukka tawe mabua wua lal᷊eo. Aroddi lai alu maṛṛissita tawe mabua wua mapia. 44Al᷊awo'u alu a'aillal᷊anna wuassu wuane. Manga ahuranganna ṛoaanna tawe mabua wuan ara, wuṛṛu manga ahuranganna ṛoaanna tawe mabua wuan anggore. 45Taumata mapia mapasabangngu pallal᷊agu mapia ana waugu naungnge napenen apapia. Taumata pallal᷊agune lal᷊eo mapasabangngu inolaanne lal᷊eo ana waugu naungnge napenen al᷊al᷊eo. Ana waugu apa apan suete niwisara moṛṛongnga udde sinabanganne wuassu naungnga.”
Maaola'a wal᷊e apan pande wuṛṛu maaola'a wal᷊e apan woddo
(Mat. 7:24-27)
46“Anio i yamiu mammago si Ya'u, ‘Mawu, Mawu,’ arawe tawe tumuṛṛutta apa iwabbisara-U si yamiu? 47Ringanni sai i ite wotongnge mannul᷊ungngu taumata apan rudanta ringang-Ku, wuṛṛu madaringikka wisara-U, see tumuṛṛutta parenta udde? – mappianne i Ya'u manantiro si yamiu –. 48I tou ere taumata apan napawe mapararisikku wal᷊e naal᷊i malal᷊u-lal᷊umma, see na'ola'a rapappake wuassu watu. Su tempo nammanawangnga wuṛṛu ua'en sal᷊ukka nangelekka su wal᷊e udde, wal᷊e udde tawe naholle, ana waugu suete niapararisikka su wowon rapappake apan matohassa. 49Arawe taumata apan maddaringikka wisara-U wuṛṛu tawe tumuṛṛutta, udde ere sangkatou apan napararisikku wal᷊e tawe rapappake. Napawe nammanawangnga, wal᷊e udde mal᷊iha-l᷊ihakka maṛṛa'a; wuṛṛu ahahohakke wahewalla atonna!”
Currently Selected:
LUKAS 6: LAITLD
Highlight
Share
Copy
Want to have your highlights saved across all your devices? Sign up or sign in