O ZEFANYA 1
1
1 #
2Kok. 22:1–23:30; 2Taw. 34:1–35:27 O Zefanya ganga o Kusyi aingohaka. Ai ahali mabuku madatoro dau deʼ yail̄e ganga o Kusyi, o Gedalya, o Amazia deʼ ma Koano Hizkia. Nenanga ma Jou Ai behehongo o Zefanyaika maöraha ma Koano Yosia o Amon aingohaka wäpareta o Yehuda.
Ma Jou Ai Juru hakimi mawange
2Ma Jou wotemo, ”Ngohi aha tahohihanga hagala moi-moi o duniaoka: 3mata-mata o nyawa deʼ aiwani, idogoika o totaleo deʼ nawoko. O nyawa madorou aha Tabinaha. Mata-mata o umati aha Tabinaha, moiua ö aha Tämal̄aika yowango. Ngohi, o Jou, totemoka.
4Ngohi aha tähukumu o Yerusalem manyawa deʼ Yehuda yamode-modekika. Mahou-hou yahuba-huba o Baal aha Tahohihanga hagala o ngïino gënanga. O Imam-imam yololeleani o Baal aha yawohanga kamamoiuku. 5Ngohi aha tahehara tatebini o nagona dika yodoa o katuil̄e mangale yahuba o wange, o mede deʼ hagala o murumu. Aha Tahohihangoli önanga ihihuba-huba Ngohi deʼ yokoboto yosetia Ngohino, mä yokobotö deʼ o Gikiri o Milkom marömanga. 6Ngohi aha täbinaha önanga yobö boa-boaua Ngohino ekola yogahoko Ahi tutuda deʼ ihimal̄aoka Ngohi deʼ yolukokali ihinïki Ngohi.”
7Ma Jou Ai wange itigioka, mawangeoka gënanga ma Jou Madutu aha wodiai; hababu gënanga, niarïdi nia diri Ai himangoka. Ma Jou magogiria kawomahi dodiai mangale wätoma Ai umati hokä o huhuba ihihuba deʼ Unanga wäahokoka o Yehuda manga haturu-haturu. 8”O doma mawangeoka gënanga,” ma Jou wato, ”Ngohi aha tähukumu o nyawa yolago-agomo, o koano manga ngoha-ngohaka o nauru, deʼ mata-mata o nyawa yanö ninïki o nyawa maporetino hagala manga datoro. 9Ngohi aha tähukumu mata-mata o nyawa yopuji-puji hokä o nyawa ihinako-nakoua Ngohi, deʼ yotohiki ikali yotoma mangale ihiomanga toönanga manga baluhu manga tau deʼ o bara-baranga yaora-oraino.”
10”O wange gënanga,” hoko gënanga ma Jou wotemo, äha ni ihene o gari o Nawoko ma Ngorana ma amo-amokoka. O dodora mailingi aha niihene o kapongo mahungino, ikilianga magiria mailingi aha igiloanga hagala o doporonino. 11Nidodora deʼ nia ari maöraha ngini niihene gënanga, hei o kota manyawa daukuku nidö dadadu, hababu mata-mata imahuku-hukunu deʼ hagala o nyawa yahi bau-bau o tiwi yohonengoka yätoma!
12O öraha gënanga Ngohi aha tal̄e o oboro, deʼ tatol̄okino o Yerusalem makota. Aha, Tahukumu manyawa koimalölegaikauaikali imahi gogihounika deʼ manga diri mahirete, deʼ ima pikiri Ngohi, ma Jou komaiwahi wodiai hoko nënanga ekola hoko gënanga. 13Toönanga manga arata aha yaora deʼ hagala manga tau toönanga yawedere. Onanga aha ihigoko o tau, mä yogogerua. Onanga aha ihi dailako o angguru madumule mä yaokerua ma angguru.”
14Ma Jou Ai juru hakimi mawange i tigioka, iya, duruhë itigioka, ikali aha iböa deʼ majapati. O wange gënanga iomanga o hininga mahiri, hiädono hagala o tentara duru yopoputurungö aha yolau-lau karana manga nganono itoaka! 15O wange gënanga o dohata mawange, o hukaranga deʼ huha, ikilianga deʼ i wedere mawange, o huhutu deʼ ihohonguku mawange, yodödohuhutu deʼ yodödotolobi mawange. 16O wange magurutu gënanga hoihene o torompet deʼ o parangi maulili mailingi yokokogoraino yoparangi hagala o kota mabebeno o mehele deʼ hagala o menara magogurutil̄e.
17Ma Jou wotemo, ”Ngohi aha todotagao o bodito mangöe o umati o nyawauku, hiädono önanga aha imahi hohabal̄anga hokä o nyawa yopilo-piloko. Onanga yobaradohaoka Ngohino, deʼ öraha nënanga toönanga manga awunu aha ikopoa hokä o akere, deʼ toönanga manga maiyeti-maiyeti yomela o tonaka mal̄okuoka.”
18O wange hoboborohono gënanga ma Jou aha wohidumutu Ai dohata, done hagala toönanga manga gurasi deʼ manga haaka yakunua yahihalamati önanga. O dunia yamode-modekika aha yatuhuku iwede-wederuku mangale Ai gangamo mauku. De itodokanino aha warahuku hagala o jiwa o duniaoka nënanga.
Currently Selected:
O ZEFANYA 1: TLB
Highlight
Copy
Compare
Share
Want to have your highlights saved across all your devices? Sign up or sign in
