O HABAKUK 3
3
O Habakuk ai niata
1Nenanga ma Nabi Habakuk ai niata:
2Ya Jou, toihene mangale Ani manarama,
done tamao o horomati yaomanga ahi hiningaoka.
Tanu o manarama i lamo-amoko gënanga Nö giliooli
deʼ nohi nyata tongomi mia orahoka nënanga.
Kokiani ngomi Ngona nomihininga
ngaroka Ngona ani hininga mahauku.
3Ngona o Jou Madutu Duru no Tebi-tebini noboa o Teman mabereraino,
Ngona noboa o Paran mal̄oku ma buturungino.
O dihanga yakilolitino Ani mulia;
o dunia iomanga deʼ o higiriri Ngonaika.
4Ngona noboa deʼ o cahaya duru kaharahai,
Ani giamino ihupu o dararono kaima hidoleletonguku,
genangoka Ngona nagogono Ani kuaha.
5Nahuloko o panyake itagi Ani himangoka
deʼ o honenge ininïki Ani poretino.
6Nako Ngona nomatogumu, o dunia ihahara
nako Ngona nomä bulo-bulono, o höana deʼ o berera ma ago-agomo yoruaeuku.
Hagala o l̄oku ikokakali ibela-belaka;
hagala o doporono ikokakali ö ima tipoko,
hagala o doporonoka gënanga lä
Ngona no tagi maöraha kahuruoninohi.
7Ta make o Kusyan makawaha yata pal̄u o hawana,
deʼ o Midian manyawa yohaharoka.
8Ya Jou, bote karana o ngöto Ngona ani awunu idoa?
Bote karana hagala o ngairi yadiai Ngona no ngamo?
Ngona nö barene o lobi hokä o kuda deʼ o kereta ihipoparangi,
maöraha Ani umati Nahi döaka o utumu.
9Ani toimi mal̄eha Ngona nohidiaioka,
Ani toimi ma doto i tiaioka mangale nodipidili.
Daha o dunia Nabelaka idadi hagala o ngairi.
10I ni make Ngona, hagala ol̄oku igiwi
o dihanguku iuti o awana hokä hakopoa.
O akere o tonaka matimioka iruruhu mailingi,
ma moku-moku malulu deʼ irato.
11Hagala Ani toimi ma cahaya itagi majapati,
Ani kuama maletongo iloleletongo
done ima togomu o wange deʼ o mede mangïoka.
12De ani dohata Ngona nongika ngino o dunia;
o hoana deʼ o berera ma ago-agomo Ngona napito-pitoko deʼ Ani hininga mahauku.
13Ngona noaguru notagi ani himangiha mangale nahi bebasi Ani umati
deʼ mangale nihihalamati o koano Ni iri-iriki.
Nigohara woruba o nyawa madorou manga tutuda,
Nahehara nä mata-mataka iwinö ninïki.
14Hagala ani toimi madoto iwi totara o lawani manga duduono matutuda
maöraha aitentara yoboa kaimatero makuata o rato,
hupaya ngomi imihi kokabarihi.
Onanga yoiete deʼ ma sanangi
hokä o nyawa deʼ koyoilingua
yätuku o nyawa yokö kura-kuranga.
15De Ani kuda napito-pitoko o ngöto ma ago-agomo
de o ngöto iabo iarehoka.
16To ihene gënanga, ahi hininga yagiwi
deʼ ahi uru makai ihahara.
Ngohi idadi tobole koiwa ahi kuata,
ahi l̄ou imahidodepeleke, okiaika ö ngohi totagi.
Ngohi aha todamä deʼ torïridi ma Jou Madutu
ai hukumanga yopoparangiuku.
17Ngaroka o ara mautu koiwa mahohoko
deʼ angguru ma utu koiwa ma angguru,
ngaroka o zaitun koidadiua yo pagele
deʼ o gandum mahasili o dumuleoka ahi hininga yahuha,
ngaroka hagala o duba ihonenge mata-mata
deʼ o gigini ma kurunga koiwa madol̄a,
18ngohi aha tomorene salalu,
hababu Ngona Jou o Jou Madutu no hï hihohalamati.
19 #
2Sam. 22:34; Mzm. 18:33 Ngona nohihi döaka ngohi o kuata
hokä o maijanga mal̄ou, ahi l̄ou Ngona nakuata.
Ngona nohi tuda ngohi hupaya tosanangi
maöraha totagi ol̄oku mabuturungoka.
Currently Selected:
O HABAKUK 3: TLB
Highlight
Copy
Compare
Share
Want to have your highlights saved across all your devices? Sign up or sign in
