O ROMA 16
16
O Paulus aitabea
1Ngohi töigo tinihikanäko o ngo Febe nanga biranga. Münanga mabatumu o jemaat o Kengkrea mabereraoka. 2Nimi tarima münanga hokä ma Jou aiumati momatëngo. Kokiani hokogënanga hagala o nyawa yongaku-ngaku ma Jou Madutuika kokiani imateketarima. Nimï riwo münanga, nako münanga moparalu o roriwo nginino, karana münanga mahirete mabatumoka o nyawa mangangöe – de ngohiö.
3 #
Kis. 18:2
Nihingahu ahitabea o ngo Priskila de o Akwilaika, ahidodiawo mimakokinïki mimanarama mangale o Kristus Yesus. 4Onanga ngade-ngade yohonenge karana yomau ihihihalamati ngohi. Ngohi totarimakasi onangika – de kangohiua, mä mata-mata o jemaat o Yahudiokauaö yotarimakasi onangika. 5Niahingahuö ahi tabea o jemaatika imatotoomu to önanga manga tauoka.
Ahi tabea o Epenetusika ngohi tïdora-dora. Unanga o nyawa madodihiraka yongaku o Kristusika o Asia madaeraoka. 6Ahi tabea ngohiö o ngo Mariaika. Münanga mokarajangoka kahagiria mangale ngini. 7Nihingahuö ahi tabea o Andronikus deʼ o Yuniasika. Onanga o ahali moi dede ngohi deʼ mamoi iböto ngohi dede önanga miwohama o buika. Ihira de ngohi tïngaku o Kristusika önanga ihiraka iwingaku. Onanga duru yänäko o rasul-rasul manga higoronaka.
8Ahi tabea o Ampliatusika, ngohi tïdora-dora karana ünanga dede ngohi mirimoioka de ma Jou. 9Nihingahu tongohi ahihoromati o Urbanusika, nanga dodiawo womomanarama homakokinïki dede ngone mangale o Kristus. Tongohi ahihoromati o ngo Stakhisika tomïdora-dora. 10Ahitabea o Apelesika. Ai setia o Kristusika inyataka igoungu. Ahitabeaö o Aristobulusika de aitau madol̄a, 11deʼ o Herodionika. Unanga o ahali moi dede ngohi. Ahitabeaö roriadodotika homateke ngongaku moi o Narkisus aitau magoronaka.
12Ahitabea o ngo Trifena deʼ o ngo Trifosaika yomanarama yakaigoungu iwïleleani ma Jou, deʼ o ngo Persisika tomï dora-dora. Munangö momanaramoka makaigoungu mangale ma Jou. 13#Mark. 15:21 Ahi tabea o Rufus deʼ ngoi ayoika, hokä ngohi ayo mahirete. O Rufus ganga ma Jou aingongiriki manyawa iwihigögogiriri. 14Nihingahu ahitabea na o Asinkritusika, o Flegon, o Hermes, o Patrobas, o Hermas, deʼ o riadodoto o ngongaku moi mata-mata imakokinïki dede önanga. 15Ahitabea o Filologus deʼ o ngo Yuliaika; o Nereusika deʼ ngoihirangika; o Olimpasika deʼ mata-mata o nyawa yongaku-ngakuika imakokinïki dede önanga.
16Nimateke tabea de nimahiteke dodiai hokä o riadodoto o Haranioka. O Kristus aijemaat mata-mata ihidingoto manga tabea nginika Roriadodoto.
O nasihati mabobaha
17O Roriadodoto! Ngohi togahoko de magiria: Hagala o nyawa yododiai o gitingaka deʼ yaroruae o nyawa manga ngongaku ma Jouika, geonangika nimahidodiai. O hali gënanga imahowono de okia inïdoto-dotokoka nginika. Nimahitingaka niakökurutika de o nyawa hokogënanga. 18Hababu hagala o nyawa yododiai hokogënanga koigoungua yomanarama mangale o Kristus tongone nanga Jou, duga-duga mangale ihiaiki manga hininga manahihu mahirete. De mangabobaja deʼ o demo mamuti-mutiti, önanga yätipu hagala o nyawa yanönäko-näkoowahi okianaga. 19Mata-mata o nyawa ihiorikoka ngini nisetia o dodotokika mangale o Abari ma Oa ma Jou Madutuino. Imakorona ngini, ngohi tosanangi mangale o hali gënanga. Ngohi töigo hupaya ngini nisawaro mangale o hali maoa-oa, deʼ nibodo mangale o hali itotorou. 20Ma Jou Madutu wohidöa-döaka o lolä o nyawaika, aha itaiti wakelenga o Ibilihi niakuaha matimiuku deʼ wawedere.
Tanu Roriadodoto salalu o Yesus Kristus tongone nanga Jou winihi barakati!
21 #
Kis. 16:1
O Timotius, tongohi ahidodiawo, wohidingoto aitabea nginika. Hokogenangoli o Lukius, o Yason deʼ o Sosipater, önanga mimaka ahali moi de ngohi.
22Yotötuli-tulihi o hurata nënanga ganga ngohi, o Tertius. Ngohi totemo nginika niatabea roriadodoto.
23 #
Kis. 19:29; 1Kor. 1:14; 2Tim. 4:20 O Gayus wohidingoto aitabea nginika. Ngohi tomahidodogumu aitauoka deʼ tongomiö mia jemaat yopuji genangokadau. O Erastus, o berera matiwi majojö mahäeke, wohidingoto ai tabea nginika. Hokogenangö tongone nanga riadodoto o Kwartus.
[24Tanu o Yesus Kristus tongone nanga Jou winihi barakati Riadodoto mata-mata. Amin.]
O hurata mahibobaha
25Ma Jou Madutu iwihigogiriri! Unanga wokuaha wohikuata Riadodoto niangongaku imamoteke de o Abari ma Oa ma Jou Madutuino ngohi tohingahu-ngahu mangale o Yesus Kristus. Ngohi tohingahu o abari gënanga imamoteke de okia ma Jou Madutu wohinyata; enagënanga mangale ma Jou Madutu aidatoro wohidailako madëkana o taongo de maratu-ratuhu o nyawa ihiorikua. 26Maöraha nanga de ma Jou Madutu aipareta ikokakali, o datoro de o hidailako gënanga ihinyataka deʼ ihingahu mata-mata o hoana de o berera manyawaika mangëkomo de madodagi o nabi-nabi manga dulihi, hupaya önanga mata-mata yongaku de iwihimoteke ma Jou Madutuika. 27Unanga ma Jou Madutu womatëngo-tëngo, Unanga duru wosawaro.
Tanu Unanga kahagurutil̄e iwitëde kahiado-adonika mangëkomo de madodagi o Yesus Kristus! Amin.
Tongomi miahoromati, o Paulus, o Kristus Yesus aigilaongo
Currently Selected:
O ROMA 16: TLB
Highlight
Copy
Compare
Share
Want to have your highlights saved across all your devices? Sign up or sign in
