O KORINTUS MADODIHIRAKA 1
1
1-3 #
Kis. 18:1
O Roriadodoto ma Jou Madutu aijemaat o Korintusoka! Roriadodoto ma Jou Madutu winiahokoka mangale nidadi Ai umati karana Roriadodoto nidadi to Kristus Yesus, imakinïki mata-mata o nyawa kiaka dika iwihuba-huba tongone nanga Jou Yesus Kristus, enagënanga toönanga manga Jou deʼ tongoneö nanga Jou. Ngohi, o Paulus, deʼ tongone nanga riadodoto o Sostenes, minganono tanu ma Jou Madutu tongone nanga Ama deʼ o Jou Yesus Kristus winihidöaka o barakati deʼ o lolä nginika. Ngohi totulihi o hurata nënanga hokä o Kristus Yesus ai rasul ma Jou Madutu mahirete wohi goraka deʼ to unangö Ai mau.
O barakati ma Jou Madutuino imamoteke o Yesus Kristus
4Ngohi kahoko genangika totarima kasi ma Jou Madutuika mangale ngini, hababu ngini niatarimaka o hayangi de o dora ioma-omanga ma Jou Madutuino imamoteke o Yesus Kristus. 5Karana ngini nidadioka madutu to Kristus, de niawowango ikaya de hagala o hali magoronaka. Niaganäko mangale hagala moi-moi duru iluku, deʼ ngini nisawaro nidotoko o ganäko gënanga. 6Gënanga ihi dumutu abari mangale o Kristus hoko gënanga yawomoka nia hininga magoronakaika, 7hiädono kamoiö de ngini nikurangua o barakati, maöraha ngini niwi damä tongone nanga Jou Yesus Kristus woböa deʼ iwi mäke mata-mata o nyawa. 8O Kristus mahirete aha wini tagongo ngini hiädono mabahaika; hupaya maöraha Unanga woböali, ngini winimäkeino, koiwa nia kuranga. 9Ma Jou Madutu yakunu niwingaku de magoungu. Unangala ma Jou Madutu wini ahokoka ngini mangale nidadi kamoi de ai Ngohaka, enagënanga o Yesus Kristus, tongone nanga Jou.
Yoregu-reguoka o jemaat magoronaka
10Roriadodoto! De nanga Jou Yesus Kristus ai romanga, ngohi togahoko hupaya ngini mata-mata ni ia de o demo moi; hupaya uha naga niregu-regu niahidogoronaka. Kokiani ngini kamoi, nihininga moi de o dibanga moi. 11Hababu o Kloë aitau manyawa ihingahu ngohino naga nimatekeributu niahidogoronaka. 12#Kis. 18:24 Ngohi ahi dungutu enagënanga naga niahidogoronaka yotemo, ”Ngohi tinïki o Paulus,” nagaö yotemo, ”Ngohi tinïki o Apolos,” mahomoa yotemo, ”Ngohi tinïki o Petrus,” made mahomoaoli yotemo, ”Ngohi ti nïki o Kristus.” 13Nagaka o Kristus woregu-regu? O Paulus wohonengua o saliboka mangale ngini. Nginiö iniohikua mangale nidadi niwi ninïki o Paulus, koigoungua?
14 #
Kis. 18:8, 19:29; Rm. 16:23 Ngohi tosukur tiniohikua o nyawa moiö niahidogoronaka, sowaliua de o Krispus deʼ o Gayus. 15Uha hiädono o nyawa moiö yotemo ngohi tiohikoka ünanga mangale wodadi wohininïki ngohi. (16#1Kor. 16:15 Aa, igoungu, o Stefanus deʼ aitau madol̄a, igoungu ngohi taohiki önanga. Mä mahomoa genangoka deyaino, kato hiningahi ngohi, moiokaua o nyawa mahomoa ngohi taohiki.) 17O Kristus wohi hulokua ngohi mangale taohiki o nyawa, mä mangale tohingahu o Abari ma Oa ma Jou Madutuino; de genangö ngohi kokiani tadiai tapäkeua ahi sawaro totemo-temo hokä o nyawa, hupaya o kuaha o Kristus ai honengino o saliboka idadiua kaparahaja.
Ma Jou Madutu aikuaha deʼ Ai barija igogere o Kristusoka
18Hababu hagala o nyawa mangameta o binahaika, o abari mangale o Kristus aihonenge o saliboka marupa hokä o demo ihi hohomoa. Mä mangale ngone wonahi hohalamatoka ma Jou Madutu, o abari gënanga marupa madodagi ma Jou Madutu wohimatoko Ai kuaha. 19#Yes. 29:14 Hababu Ma Jou Ai Demo ma Buku magoronaka, ma Jou Madutu wotemo,
”Manga barija o nyawa yososawaro aha Taruae,
deʼ manga mangarati o nyawa de manga dodotokoka aha Ta hohihanga.”
20 #
Ayb. 12:17; Yes. 19:12, 33:18, 44:25 Aa, okia mafaidä o nyawa yososawaro gënanga? Okia mafaidä önanga de manga dododotokoka? Okia mafaidä duruyobobarija yatakihiri o dunia nënanga? Ma Jou Madutu wohidumutoka o dunia nënanga mabarija mata-mata ganga kao demo ihihohomoa!
21Karana sarakia dika o nyawa manga sawaro, önanga yakunua iwinäko ma Jou Madutu imamoteke manga sawaro mahirete. Mä hababu karana ma Jou Madutu wobarija, woigo wahihalamati o nyawa iwingaku-ngaku Unangika imoteke o abari ngomi mihingahu, ngaro o dunia yato o demo ihihohomoa. 22O Yahudioka manyawa yogahoko ihëra-hëranga hokä manyonyata, deʼ o Yunanioka manyawa ihilamoko o barija o duniaka nënanga. 23Mä ngone nënanga duga-duga hohi ngahu o Kristus wohonenge o saliboka. O abari nënanga yatohoko manga hininga o Yahudioka manyawa deʼ o Yahudiokaua manyawa yato o demo ihihohomoa. Deʼ o Yahudiokaua manyawa yato gënanga o bodo moi. 24Mä o nyawa wa aho-ahokoka ma Jou Madutu – yaoa o Yahudioka manyawa yaoa o Yahudiokaua manyawa – o abari gënanga marupa madodagi ma Jou Madutu wohi matoko Ai kuaha de Ai barija. 25Hababu yapulo-pulono yobodo ma Jou Madutuoka, ganga iholoi yobarija ngaro de o nyawa manga bobarija; deʼ yapulono yobole ma Jou Madutuoka, ganga iholoi yokuata ngaro de o nyawa yokua-kuata.
Ma Jou Madutu aikuaha deʼ o nyawa manga bole-bole
26O Roriadodoto! Abeika niohininga sarakia niarupa maöraha ma Jou Madutu winiahoko ngini. Duga-duga mahuhutulu dika nia hidogoronaka yobobarija, ekola yokokuaha, ekola manga pangkati magö gurutil̄e imoteke o nyawa malolegaka. 27Hababu hokogënanga ma Jou Madutu hangaja wairiki o dunia nënanga yäpulono yobodo, hupaya o nyawa yososawaro idadi yämal̄eke. Deʼ ma Jou Madutu wairikö o dunia nënanga yäpulono yobole, hupaya o nyawa yopoputurungu deʼ yonau-nauru idadi yämal̄eke. 28Ma Jou Madutu wairiki yapulono yotipokouku, de imahi kokauku, deʼ o dunia nënanga yapulono koiwa mabaraguna, hupaya ma Jou Madutu wawedere kiaka o dunia yapulono duru mal̄okuoka. 29De hokogënanga o nyawa moiö de yakunua manga diri imahikurutil̄e ma Jou Madutu ai himangoka. 30Ma Jou Madutu mahirete wadiai hiädono Roriadodoto nirimoi de o Kristus Yesus. Itilakuru o Kristus, ngone inadiai hobarija. Deʼ imoteke Unanga dika ma Jou Madutu wonadiai ngone homateke oa-oakali de Ai diri, inahidadi ngone Ai umati woma dinga-dingakoka, deʼ wona hilapahioka ngone. 31#Yer. 9:24 Hoʼ, hokä itulihi Ma Jou Ai Demo ma Buku magoronaka, ”O nyawa yomau imahi amo-amoko kiani imahi amoko de okia ma Jou wadodiaioka.”
Currently Selected:
O KORINTUS MADODIHIRAKA 1: TLB
Highlight
Copy
Compare
Share
Want to have your highlights saved across all your devices? Sign up or sign in
