O HIMATOKO 4
4
O horogaka yohuba
1Ipahaika gënanga ngohi tamäkeoli o lolega. Ngohi tamäke o horogaka o ngorana moi ihelengaika. Ipaha toihenoli o ilingi kama mulaengohi itemoka ngohino hokä o trompet mailingi. O ilingi gënanga itemo, ”Naino nodoa nengil̄e. Ngohi aha tonihimatoko ngonaika damä okia aha idadi.” 2#Yeh. 1:26-28, 10:1 Gila-gila dika ngohi ihi kuaha ma Jou Madutu ai Womaha. Daha ngohi tamäke o horogaka naga moi o kuruhi imomulia, deʼ naga womatëngo o nyawa wogogeruku o kuruhi imomuliaka gënanga. 3O nyawa gënanga aibiono mame letongo hokä o helewo baiduri pandan, deʼ o delima mahelewo. O ngawatoro moi yogöuku o kuruhi imomulia gënanga marupa magoguhurungu. 4De madüku ihululunino o kuruhi imomulia magoronaka yakiloliti gënanga, naga o kuruhi imomulia monaoko de iata mahomoa. Genangoka yogogeruku o tutuda yamonaoko de yaruata manga pakeanga magare-garehe, deʼ imahi tamunuku o makota o gurasi. 5#Kel. 19:16; Yeh. 1:13; Za. 4:2; Him. 1:4, 8:5, 11:19, 16:18 O kuruhi imomuliaino gënanga itararono o leletongo macahaya deʼ ihupu o dotoreke idilo-dilongo mailingi. Deʼ o kuruhi imomulia gënanga mahimangoka naga o oboro o gahumu tumidi itoka-tokara; gënanga ma Jou Madutu ai Womaha o gahumu tumidi. 6#Yeh. 1:22 #Yeh. 1:5-10, 10:14 Tamäkeoli o kuruhi imomulia gënanga mahimangoka okianaga moi hapulo-pulono hokä o ngöto o kahinä mamododono hokä o kahinä maleto-letongo.
O kuruhi imomulia yakilolitino, madatekino yogetongo, naga o dodadi iata, mahimangoka deʼ maporetoka iomanga de malako. 7O dodadi madodihiraka holega-lega hokä o singa. Mahinotoko, hokä o hapi manauru. Mahangeoka toënanga mabiono hokä o nyawa mabiono. Maiatoka, holega-lega hokä o totaleo rajawali magogiria ihoho. 8#Yes. 6:2-3; Yeh. 1:18, 10:12 Ododadi iata gënanga, moi-moi toënanga magahuhu butanga, deʼ yakilolitino deʼ doka magoronaka iomanga dema lako. O hutu de o wange o dodadi-dodadi gënanga imatogu-togumua i nyanyi,
”Notebini, notebini, notebini Jou, ma Jou Madutu noko Kuaha;
nänaga, nagaka, deʼ naga hokogenangika.”
9O dodadi iata gënanga ihinyanyi o puji dema lugo-lugoka, horomati deʼ o sukur Unangika wogögogeruku o kuruhi imomuliaka gënanga, enagënanga mangale Unanga wowango kahiado-adonika. Deʼ maöraha o dodadi-dodadi gënanga inyanyi, 10o tutuda yamonaoko de yaruata gënanga imahitudukuku Ai himangoka o nyawa wogögogeruku o kuruhi imomulia gënanga, daha iwihuba Unanga wowango kahiado-adonika. Ipaha önanga ihikaweli manga makota-makota o kuruhi imomulia mahimangika gënanga de yotemo,
11”Ya Jou, yamia Jou Madutu!
Ngona dika ipatutu natarima o higiriri, o horomati deʼ o kuaha.
Hababu Ngonala hagala moi-moi madodadi,
deʼ tongona Ani mau ö hagala moi-moi gënanga idadioka deʼ i wango.”
Currently Selected:
O HIMATOKO 4: TLB
Highlight
Copy
Compare
Share
Want to have your highlights saved across all your devices? Sign up or sign in
