O MAZMUR 78
78
Ma Jou Madutu deʼ Ai umati
1O Asaf ai dodotoko manyanyi.
Niihene ahi dodotoko, hei ahi hoana de ahi berera,
nihidodiai niihene ahi demo-demo.
2 #
Mat. 13:35
Ngohi tomau tahetongo o dolabololo deʼ o hitotero,
deʼ tohitararono o sumu-sumu ihira-hiraino,
3o hali ngomi mï ihe-ihene deʼ ngomi mia totarima,
ihi jojarita tongomi mia ete de mia tohora.
4Ngomi mioluku mia hirahasia tongomi mia ngoha-ngohakika;
ngomi mimau mihingangahu o gogo yoto turu-turuino
mangale ma Jou Ai kuaha deʼ Ai gao-gao ilago-agomo,
inoli hagala Ai manarama ihö hera-heranga.
5O Israel manyawaika wohidöaka Ai tita,
deʼ o Yakubika de aidifauku wohidöaka Ai pareta.
Unanga wähuloko tongone nanga ete de nanga tohora
yädotoko toönanga manga ngoha-ngohakika,
6hupaya manga ngohaka de manga danongo maduruino yanako,
de ihi gila-gila toönanga manga ngoha-ngohakika.
7De hoko gënanga onangö
aha ima hinganono ma Jou Madutuika,
deʼ koyawohangua Ai manara,
mä salalu ihingounu Ai paretaika,
8hupaya önanga hokä toönanga manga ete de manga tohoraua
yöigo-igo yolawani deʼ yohianati;
o ngohaka deo danongo manga ngongaku igiwi,
deʼ yosetiaua ma Jou Madutuika.
9O Efraim aihöana manga dae o toimi deʼ madoto,
ihi oara manga diri maöraha yoparangi.
10Onanga yatilakuru ma Jou Madutu Ai jaji dede önanga,
deʼ yoluku ihingounu Ai titaika.
11Onanga yawohanga hagala Ai manarama,
deʼ o hali-o hali ihera-heranga Wohinyö nyata-nyata onangika.
12 #
Kel. 7:8–12:32
Toönanga manga ete de manga tohora manga himangoka, ma Jou Madutu wodiai ihera-heranga
o Mesir mabereraka o Zoan matonaka irata-rataka.
13 #
Kel. 14:21-22
Unanga wabelaka o ngöto, daha Wahidobongo önanga ma honongaika;
o akere Waokoil̄e hokä o akere mabebeno.
14 #
Kel. 13:21-22
Unanga wä tuda önanga o wangeoka deo lobi,
deʼ o hutu yahaiwatiki deo uku madararono.
15 #
Kel. 17:1-7; Bil. 20:2-13 Unanga wabelaka ol̄oku o helewo o tonaka ikokakahaka,
deʼ Wahidöaka önanga yokere dema boboloi.
16O doporono o helewo wahuloko ihihupu o akere,
daha Wohi hahuru o akere hokä o ngairi.
17Mä önanga ima togu-togumua yobaradoha ma Jou Madutuika,
o tonaka ikokakahaka önanga iwilawani Duru Wokö Kurutil̄eika.
18 #
Kel. 16:2-15; Bil. 11:4-23, 31-35 Onanga yohangaja iwi taili ma Jou Madutu,
de iwi pakisa yogahoko o inomo önanga yonönahihu.
19Onanga iwi lawani ma Jou Madutu de yotemo,
”Mode kawakunu ma Jou Madutu ngone Wonahiol̄omo o tonaka ikokakahaka.
20Igoungu Unanga wagohara ol̄oku o helewo itotogowini,
hiädono o akere ihahuru kahä kuata.
Mä mode kawakunoli Wasadia o roti
deʼ Wahidöaka o hiode ma akeme Ai umatika?”
21Woihene gënanga, ma Jou Madutu wongamo deʼ wängika Ai umati deo uku;
Ai gangamo onangika kaidogo-dogo,
22hababu önanga iwi ngakua ma Jou Madutuika,
Ai kuahaika yaku-akunu yahihalamati önanga.
23Ngaroko hoko gënanga Unanga wohi pareta o dihanga
mangale yahelenga mangora-ngorana.
24 #
Yoh. 6:31
Unanga Wohi guti o gandum o horogauku,
o manna mangale toönanga manga inomo.
25Unanga Wahidöaka önanga o inomo dema boboloi;
önanga yaol̄omo o malaekat maroti.
26Unango Wahuloko o hidal̄oko o wange mahiwariha iwuwu;
mangale Ai kuaha o hidal̄oko o koreharauku italoko.
27Unanga Wohiguti o totaleo-totaleo mangale Ai umati,
mangöe hokä o dowongi yakunua yaetongo.
28Watifa o totaleo-totaleo gënanga manga tau-tau madoomuoka
önanga imä tau-tau mangï magilolitino.
29De önanga yol̄omo hiädono yäpunuhu,
hababu ma Jou Madutu wahidöakoka okianaga önanga yonönahihu.
30Mä toönanga manga nahihu yakihounowahi;
hoʼ magogiriaka önanga kayol̄omohi,
31ma Jou Madutu wongamo deʼ Walawani önanga;
Watoma o Israel manyawa o gömaduru deʼ yopoputurungu.
32Ngaroko hoko gënanga Ai umati kahirahi yobaradoha,
Wadodiai ihöhera-heranga önanga koyongakua.
33Done ma Jou Madutu wohibobaha toönanga manga ngango hokä o ngomaha moi,
toönanga manga taongo imata o modongo magoronaka.
34Toönanga manga hidogoronaka wohi geto-getongo ma Jou Madutu wätoma yamuruono naga,
mahomoa ima toduba deʼ ima kilioro Unangika.
35Onanga ima hininga ma Jou Madutu toönanga manga gogoana,
deʼ duru Wokö Kurutil̄e wahihohalamati önanga.
36Mä önanga iwi eluku Unanga,
toönanga manga demo-demo kai eluku mata-mata.
37 #
Kis. 8:21
Onanga yosetiaua Unangika
deʼ ima hijojoua Ai jajika.
38Mä ma Jou Madutu wädora deʼ wä apongo Ai umati,
deʼ wä binahaua önanga.
Wohi gali-gali Unanga watumungu Ai dohata,
deʼ wohi gila-gilaua Ai muruka.
39Unanga womä hininga önanga duga-duga o dodadi ikokakaliua,
hokä o hidal̄oko yakaino deʼ ima idulokaua.
40Hokokia mamanaro önanga ima lawani Unangika,
deʼ Ai hininga yahiri maöraha o tonaka ikokakahaka.
41Yogogilio önanga iwi taili ma Jou Madutu,
iwi hidadi huha Wotö Tebi-tebini, o Israeloka manga Jou Madutu.
42Onanga imähiningaua Ai kokuaha,
mawange Unanga wahi bebasi önanga manga lawanino.
43Maöraha Unanga wodiai ihöhera-heranga o Mesiroka,
deʼ ihöhera-heranga o Zoan matonaka ikokakahaka.
44 #
Kel. 7:17-21
Toönanga manga ngai-ngairi Wangali idadi o awunu,
hiädono önanga yakunua yaokere ma akere.
45 #
Kel. 8:1-6, 8:20-24 Unanga Wahangihara önanga deo guhuru iwöe-wöe,
deʼ Wodogumal̄aika toönanga manga tonaka o ngotara yabinaha.
46 #
Kel. 10:12-15
Unanga Wödotagao o pipiti deʼ o kahoho,
yamata-mataka o gugutuku mahasili deʼ o dumule mahasili.
47 #
Kel. 9:22-25
Unanga Wabodito manga angguru maröehe deo awana o helewo,
deʼ toönanga manga ara ma röehe deʼ o dumunitara ma dodogowini.
48Unanga Wodogumal̄aika o awana o es yatapal̄u toönanga manga aiwani o gigini,
deʼ o leletongo yautuku toönanga manga aiwani.
49Unanga Wohi gila-gila Ai dohata itötoka-tokara
deʼ Wähuloko o duduono moi
o honenge mamalaekat yadiai toönanga manga nganono itoaka.
50Unanga watumungua Ai dohata ekola Wahayangua toönanga manga ngango,
mä Wäbinaha önanga de o panyake o luti.
51 #
Kel. 12:29
Unanga Wätoma o ngoha-ngohaka o nauru yoria-riaka
o Mesir manyawa manga tau madol̄a yögetongo.
52 #
Kel. 13:17-22
De Unanga Wätuda Ai umati hokä o duba matika,
deʼ Wätuda önanga yanonu o tonaka ikokakaha.
53 #
Kel. 14:26-28
Ai tutuda magoronaka önanga yosanangi deʼ yohawanua,
ena hioko manga haturu yalutu o ngotuku.
54 #
Kel. 15:17; Yos. 3:14-17 De Ai umati wä ao Ai tonaka itebi-tebinika,
ol̄oku mabuturungika Unanga mahirete Waora-oraino.
55 #
Yos. 11:16-23
Ai umati manga himangoka Unanga wäduhu yogogogere genangokadau
daha wahikodoku o berera gënanga
mata-mata o Israel manga hoanika, Ai umati,
hiädono önanga yakunu yögogere manga haturu manga tau-tau.
56 #
Hak. 2:11-15
Mä önanga iwimalawani deʼ iwi taili ma Jou Madutu Duru Wokö Kurutil̄e,
Ai pareta-pareta önanga yoluku ihingounu.
57Onanga yosetiaua hokä toönanga manga ete de manga tohora,
deʼ yakunua yängaku hokä o toimi mal̄eha mabobeleoko.
58Onanga iwi lawani ma Jou Madutu deo gomanga mahuhuba mangï,
deʼ yadiai Unanga Wödohata toönanga manga dulada-dulada.
59Wamake gënanga, ma Jou Madutu duru Wongamo,
deʼ Wä umo önanga kamamoiuku.
60 #
Yos. 18:1; Yer. 7:12-14, 26:6 Unanga Wamal̄aika Ai Tau o Silo mabereraka,
Ai gogere mangï o nyawa nanga hidogoronaka.
61 #
1Sam. 4:4-22
Unanga Wödogumal̄aika Ai jaji ma Peti yaora;
Ai mulia manonako Ai lawani yaoa.
62Unanga wängamo Ai umatika, Ai puhaka madutu,
deʼ wä mal̄aika önanga yätoma deo oworo.
63Toönanga manga gogoduru o uku yäolomo;
moiua yäkawingi toönanga manga momoholehe.
64Toönanga manga imam-imam yätoma deo oworo,
toönanga manga bobobao yakunua yododora.
65De ma Jou Womomiki de Woma okoino hokä o nyawa ima iduoka de yomomiki,
hokä o nyawa yokua-kuata o angguru yokere ibotino.
66Unanga Wä hidodohuku Ai lawani,
deʼ Wahohihanga önanga kahiädo-ädonika.
67Mä Unanga wätila o Yusuf ai difauku
deʼ Wäirikua o Efraim aihöana.
68Wä iriki ganga o Yehuda aihöana,
deʼ o Sion ma Doporono Wöhohininga.
69Unanga Wohi goko Ai Tau hokä Ai gogere o horogaka,
deʼ hokä o dunia, ibitumu kahiädo-ädonika.
70 #
1Sam. 16:11-12; 2Sam. 7:8; 1Taw. 17:7 Unanga wï iriki Ai gilaongo o Daud,
deʼ wil̄e ünanga o aiwani o gigini matikaino,
71wapöpaliara o duba mal̄eha mangï ino,
mangale wägoana o Israeloka Ai umati.
72O Daud wapaliara önanga de ai hininga madebi-debini,
deʼ wätuda önanga de ai sawaro.
Currently Selected:
O MAZMUR 78: TLB
Highlight
Copy
Compare
Share
Want to have your highlights saved across all your devices? Sign up or sign in
