O AMSAL 9
9
O barija deʼ o bodo
1O barija ihigokoka o tau, deʼ ihi belohoka maliate tumido. 2Enanga yatoakoka o aiwani o gigini la yorameanga, yodiaioka o angguru mateongo deʼ yasadiaka o inomo deo hiode. 3O ngongoheka yolöleleani wähuloko yoiki la yopoa-poaka o ngï ikökurutil̄eoka o kotaka. 4”O nagona yanakouahi, togahoko yaino.” Manga akali maoa-oa koiwa-iwaika o barija yätemo. 5”Naino naol̄omo ahi inomo deʼ nataili o angguru tadodiaiukuoka. 6Namal̄aika o bodo, hupaya ngona nowango nosanangi. Nanïki o nyawa yanönako-nako manga ngekomo.”
7Nako o nyawa wolu-oluku nïdotoko nihidumutu ai howono, ünanga aha wonigogiete. Nako o nyawa madorou nïngamo, ünanga aha woni doa-doana. 8Uha nïhohedu o nyawa wolu-oluku nïdotoko, ünanga aha wonï dohata. Mä nako o nyawa wobobarija nohidumutu ai howono, ünanga aha woni horomati. 9Nako o nyawa wobobarija nïnasihati, ünanga aha wodadi iholoi wobarija. Deʼ nako o nyawa wihingou-ngounu ma Jou Madutuika nïdotoko, ai ganako aha idogo.
10 #
Ayb. 28:28; Mzm. 111:10; Ams. 1:7 Mangale yodadi yobarija, madodihiraka o nyawa kokiani de manga horomati deʼ manga modongo ma Jouika. Nako ngona nï nako Duru wotö Tebi-tebini, ngona aha namake o mangarati. 11O barija aha ini hidöaka ngonaika ani umuru ikurutu. 12Nako o barija naga ngonaka, ngona mahirete noutumu. Mä nako o barija ngona natila, ngona mahireteoli norugi. 13O bodo ganga hokä o ngoheka amidemo-demo iwoekokia-kiaua manako deʼ amimaleke koiwa. 14Ami ngï ganga ami tau mangoranoka ekola o kota mangorana malamo-amokoka. 15Genangino de münanga mäboa-boaka o nyawa yakokaino. O nyawa manga hininga itebi-tebini mäbaja, 16”Niaino nitulu, hei ngini kokia-kiauahi nianako!” Deʼ o nyawa manga akali maoa koiwa-iwa münanga mätemo, 17”O dohikino ma akere majame imutiti, deʼ hol̄omo homa ngiu-ngiunu iholoi ihemoro.” 18Onanga yodadi ami inomo koyanakoua o nyawa imïdulu-dulu gënanga kagenangoka deyohonenge; deʼ önanga yowoha-wohamoka amitauika, o oraha nënanga naga o nyawa yohone-honenge manga dunia magoronaka.
