O AMSAL 8
8
O barija maboaka
1 #
Ams. 1:20-21
Ni ihene! O barija ipoa-poaka
o barija mailingi yagoraka.
2Enanga imaokoino o doporono-doporonoka o ngekomo madatekoka,
deʼ o ngekomo mahago-hagoka.
3O ngorana malago-agomoka, o ngekomika iwohama o kotaika,
genangokadau hoihene mailingi.
4”Hei o umati o nyawa, nginika ngohi topoaka;
moi-moi o nyawa o duniaka, ni ihene nihidodiai ahihigaro!
5Ngini nia nönako-nakouahi, nimädotoko de niadibanga idö doto-doto;
ngini nifuma-fuma, nimädotoko idadi nianako.
6Ni ihene nihidodiai ahidemo-demo,
karana mata-mata duru yakorona deʼ iluku.
7Tahö heto-hetongo, mata-mata itiai,
hababu ngohi tödohata o tengeluku.
8Ahi demo-demo mata-mata irikoto
kamoi makoiwa ipopeleoko ekola ihowono.
9O nyawa yososawaroika, ahidemo itiai,
o nyawa yanö nako-nako, ahidemo duru yakorona.
10Nihibaraguna ahinasihati iholoi deo haaka madutu,
nihilamoko o ganako iholoi deo gurasi madutu.
11Ngohi nanga o barija, ahi ija iholoi de o intan de o folori;
yakunua nohitero de okiadika nonönahihu.
12Ngohi nanga o barija; ngohioka naga o mangarati,
o sawaro deʼ o ganako.
13Niwihoromati ma Jou mamangarati niodohata o dorou;
ngohi toigoua o edenge deo hininga magurutil̄e.
Ngohi tödohata o kalakuanga madorou
deʼ o akali madorou mademo-demo.
14Ngohi nanga tohidoa-döaka o hidumutu.
Deʼ ngohiö tadodiai manyonyata,
ngohi tosawaro deʼ ikali tokuata.
15O kokoano täbatumu ihidagi o popareta,
yokokuaha täriwo ihigogoko o adili.
16Karana ahimanarama maoa, o gikiri yolago-agomo de yomomulia
yopareta deʼ ihidagi o adili.
17Ngohi tädora önanga ihïigo-igo ngohino;
ihilingi-lingiri ngohi, aha ngohi ihimake.
18Ngohioka isadia o kaya
ikali o horomati deʼ okiaua ikuranga.
19Namö make-make ngohino iholoi deo gurasi madutu
iholoi maija deo haaka madutu.
20Ngohi tanïki o adili mangekomo,
ngohi töaguru iröriko-rikoto mangekomika.
21O nyawa wohidora-dora ngohi, tihidadi wokaya;
ai tau tohiomanga deo arata.
22 #
Him. 3:14
Ngohi wohihidadi ma Jou hokä madodihiraka,
ngohi nanga Ai gao-gao mahasili ipaha-pahaika kahuruoninohi.
23Ngohi ihituku kamadodihirakahi,
madodihiraka, o dunia idadiuahi.
24Ngohi tomakil̄au o ngötoilago-agomo idadiuahi,
o akere matiti ipudauahi.
25Ngohi tomakil̄au hagala ol̄oku itubouahi,
hagala o doporono itoporonuahi,
26ma Jou wohidadiuahi o dunia deʼ matonaka ilua-luasi,
maboboloi wohidadiuahi o tonaka mapupuka madodihiraka.
27Ngohi tahakihi maöraha o dihanga ihihohe,
de ogitawa yatauru deyatïngi o ngöto mal̄okuino.
28Maöraha ma Jou wohigogere o lobi o gitawaka,
deʼ wahelenga o ngöto ilago-agomo matiti,
29maöraha Unanga wapareta o ngöto magahi
hupaya uha yatilakuru mabati-batingi.
Ngohi matohimangika dokengoka
maöraha o dunia mahohol̄e Wögelenga.
30Ngohi naga Ai datekoka hokä Aingohaka Wïhaya-hayangi,
o wange higetongo ngohi ganga Ai sanangi;
salalu ngohi toule-ule Ai himangoka.
31Ngohi tomahi sosanangi o dunia mal̄okuoka,
deʼ tamao toutumu o nyawa manga hidogoronaka.
32Karana gënanga, nihihigihene ngohi, hei nigogoduru!
Namoteke ahihidumutu, done ngona aha noutumu.
33Nia tarima yososawaro manga ngaje-ngaje deʼ nidadi nisawaro,
kokiani uha nia haduliua.
34Youtumu o nyawa ihihigihe-gihene ngohi
o wange ihi getongo yogogeruku yotamä ahi tau mangoranoka,
deʼ yogoa-goana ahi ngï mangorana malamo-amokoka.
35O naguna womämake ngohi, wamake o wowango,
ma Jou Ai hininga yadaene unangika.
36O naguna womämakeua ngohi, wohirugi ai diri mahirete;
o nyawa ihï doha-dohata yöigo o honenge.”
