O AMSAL 2
2
O barija mafaida
1Natarima hagala ahinasihati, ahingohaka, deʼ kokiani nöhohininga salalu hagala ahinasihati ngonaika. 2Kokiani nohidodiai okianaga ibobarija deʼ nohidailako nomangarati. 3Ya, ahingohaka, nomahihuha la de anidibanga idoto-doto deʼ nogahoko o mangarati. 4Kokiani nalingiri gënanga hokä nolingiri o gurasi, deʼ nakinïki gënanga hokä nakinïki o arata igögogonika o tonakoka. 5De hoko gënanga ngona aha nohiöriki okia mamangarati ma Jou himodongo deʼ ngona aha namake o ganako mangale ma Jou Madutu. 6Ma Jou ganga wohidoa-doaka o barija; Unangino ganga o nyawa yamake o ganako deʼ o mangarati. 7O nyawa manga hininga itebi-tebinika deʼ koiwa mahowono, Wahidöaka o roriwo deʼ o gogoana. 8Ma Jou wägoana hagala o nyawa yoadi-adili, deʼ wägoana önanga iwïhohininga Unanga.
9Nako ngona nohihimoteke ngohi, ahingohaka, ngona aha nohiöriki okianaga iadi-adili, o hininga iriko-rikoto deʼ o oa. Ngona aha nohiöriki sarakia madodagi kokiani ngona nowango. 10Ngona aha idadi nosawaro, deʼ aniganako aha yasanangi anihininga. 11Animangarati deʼ anisawaro aha inïgoana, 12inoli initatoko ngona nanïki o wowango itotorou madodagi, deʼ nohitingako nakökurutika anidiri deo nyawa manga uruitotorou. 13Onanga yoluku yanïki o wowango maoa madodagi; önanga yal̄e o ngekomo ihohuhutu deʼ iomanga o baradoha. 14Onanga yamake o sanangi toönanga manga manarama itotorouino. 15Onanga yorusi-rusi deʼ toönanga manga wowango madodagi ipeleoko.
16Ngona, ahingohaka, aha yakunu naoluku o ngoheka monaka-nakali amibobaja mohidailako moninonai de ami demo-demo mamuti-mutiti. 17O ngoheka gënanga mosetiaua amirokatika, deʼ mawohangoka amijaji ma Jou Madutuika. 18Nako ngona noiki ami tauika mamangarati ngona nodumutu o honengika. Noiki dokengika kaimatero dika de noiki yohone-honenge manga duniaika. 19O nyawa yoi-oiki munangika komaiwa naga imakilioro yodumutu o wowango mangekomika. 20Karana gënanga, ahi ngohaka, namoteke ahi kalakuanga maoa-oa, deʼ kokiani nowango namoteke ma Jou Madutu Ai mau. 21Hababu o nyawa yowöwango-wango yamoteke ma Jou Madutu Ai mau, enagënanga manga hininga itebi-tebini, önanga ganga aha yogogere o berera ma Jou wahi jäjaji. 22Mä o nyawa madorou deʼ yoböbaradoha aha ma Jou Madutu wahikaweli yohupu o bereraino gënanga, hokä o momo o tonakoka deyarahuku.
Currently Selected:
O AMSAL 2: TLB
Highlight
Copy
Compare
Share
Want to have your highlights saved across all your devices? Sign up or sign in