O AMSAL 1
1
O Salomo wososawaro ai ngaje-ngaje maragane
1 #
1Kok. 4:32
Nënanga doka o Salomo o Daud aingohaka, o Israeloka manga koano wososawaro ai ngaje-ngaje. 2Madumutu ena gangala mangale yäriwo o nyawa sarakia idadi yobarija, deʼ ihiöriki o wowango madatoro yaoa-oa inoli yakunu yanako ihi benga-bengail̄e naga demamangarati ilö luku-luku. 3Yososawaro manga ngaje-ngaje yadotoko sarakia o nyawa yakunu yowango de manga barija, yorusi-rusiua, yoadili deʼ yotiai. 4O nyawa manga ganako koiwa-iwa yadotoko hiädono manga dibanga idoto, deʼ o gikiri magö idadi o nyawa yososawaro deʼ yakunu imatibanga hokä o balu-baluhu. 5De yososawaro manga ngaje-ngaje nënanga o nyawa yobobarija ma aha idogo manga ganako, deʼ o nyawa imadoto-dotokoka aha yamake o tutuda. 6De hoko gënanga önanga yakunu yödumunu yososawaro manga ngaje-ngaje magoronaka toënanga mamangarati deʼ yanako o nyawa yobobarija manga demo-demo inoli o loleha ihühuha önanga yo ao-ao.
O nasihati mangale o gikiri magö
7 #
Ayb. 28:28; Mzm. 111:10; Ams. 9:10 Mangale yamake o ganako madutu, madodihiraka o nyawa kokiani de manga mamao o horomati deʼ o modongo ma Jouika. O nyawa bodo yaetongikaua o barija deʼ yoluku yadotoko.
8Kokiani natailako nohidodiai okianaga yaheto-hetongo ngoni ayo de aniama ngona ika, ahingohaka, 9hababu toönanga manga dodotoko yödogo aniakali maoa hokä o poromu anihaekoka deʼ o gule yahailoa anirupa.
10Nako o nyawa baradoha inibaja ngona, ahingohaka, uha nodomoteke toönanga manga bobaja. 11O demo maade önanga yotemo, ”Ika, naino ngone holingiri o nyawa deʼ hïguruhe ünanga. Homa hiliba-liba, naino ngone hängika o nyawa yohowo-howonua. 12Oraha nënanga önanga yowango yosanangi deʼ manga dödumuloa, mä dahaö önanga aha yodadi hoka o nyawa yatoka yohonenge. 13Ngone hal̄ë toönanga manga bara-baranga dema ija-ijaka, hupaya tongone nanga tau iomanga de o baranga haora-oraino. 14Naino nonïki. Dahaö nanga dohiki mahasilino ngone homa hikodoku homa koketero!”
15Kokiani uha nonïki deo nyawa hoko gënanga, ahi ngohaka! Nätingaka önanga noma kökurutika. 16Onanga yakunua imarïdi nako yodiaiowahi o dorou. Onanga yönahihu itai-taiti yotoma. 17Barikua o totaleo maaha koiwohamua o homa magoronaika yatotatauri awa fuma! Hiadono muruonoka ngini nimau kahirahi hoko gënanga? Muruonoka yadono maöraha niolegaikaua o ganako deʼ nia tila o dodotoko, 18mä o nyawa madorou genanga koaholi ihi akana o modoi mangale manga diri mahirete o modoi aha yahibodito onanga. 19Igoungu, o nyawa imalingiri manga baajanga demakuatoka aha ihifangu demanga nyawa mahirete.
Obarija mailingi
20 #
Ams. 8:1-3
Niihene! Obarija iahoko hagala o ngekomoka di imapoaka hagala lapangoku! 21Enanga iahoko hagala o ngorana ma ago-agomoka de hagala ongï irame-rameoka:
22Hei hagala o nyawa nibodo-bodo! Hiadono muruonoka ngini nimau kahirahi hoko genanga? Muruonoka iboa maöraha ngini nimatogumu niolegaikaua o ganako de niatila o dodotoko? 23Ngohi nihihigihene nako ngohi tinï taaere, done nginika aha tohinyata ahi hininga madol̄a deʼ tinihidotoko ahi ganako. 24Ngini tinï ahokoka, ma ngini niatila deʼ nimalegaikaua. 25Mata-mata ahi nasihati ngini niahaduliua deʼ ahi dodaaere ngini niatila. 26Karana gënanga, nako ngini nibodito, ngohi aha tinï gogiete ngini. Nako ngini nihawana, ngohi aha tinïhohedu ngini. 27Ya, ngohi aha tinïhohedu ngini nako ngini niahininga i huha deʼ niamao o hangihara karana o bodito inïtapal̄u iboa hokä o rato. 28O öraha gënanga ngini aha nihiahoko, mä ngohi aha tohaluhua. Ngini aha nihilingiri kiaika honanga mä ngohi aha konihi makeua. 29Ngini aha hokä o nyawa komaiwa yöigo yamake o ganako, deʼ yoluku iwihingounu ma Jou. 30Ngini komaiwa nimau niatarima ahi nasihati ekola niö hohininga nihidodiai ahidodaaere. 31Karana gënanga, ngini aha niamao mahasili hagala nia manaramino deʼ hagala nia datoro itotorou. 32O nyawa koiwa-iwa manga ganako aha yohonenge karana ngohi ihilegaikaua, deʼ o bodo manyawa aha yobinaha karana ihilegaikaua. 33Mä o nyawa ihihigihe-gihene ngohi aha iwipaliara. Unanga wowango wosanangi deʼ iparaluua wohawana.
