O BILANGAN 27
27
O Zelafehad ai ngoha-ngohaka o ngoheka
1O Zelafehad aingohaka yamotoa, ena gënanga o ngo Mahla, o ngo Noa, o ngo Hogla, o ngo Milka deʼ o ngo Tirza. O Zalafehad ai ama ganga o Hefer, o Hefer ai ama ganga o Gilead. O Gilead ai ama ganga o Makhir, o Makhir ai ama ganga o Manasye, deʼ o Manasye ai ama ganga o Yusuf. 2O Zelafehad ngoi ora yamotoaö gënanga yoiki iwï himanga o Musa, deʼ ma imam Eleazar, inoli o tutuda-tutuda deʼ yongodumu o kawaha magogiriaka imatoomuino imahi tigi-tigika deʼ ma Jou Ai Tau mangorana. Onanga yato, 3”Tongomi mia ama wohonenge o tonaka ikokakahaka, deʼ ünanga koiwa aingohaka o nauru. Unanga winö ninïkua o Korah wolawa-lawani ma Jouika. Tongomi mia ama gënanga wohonemge karana ai baradoha mahirete. 4Mä yadodoa hoʼ kokiani ai romamga ihihanga o Israel ma nyawaka duga-duga karana ünanga koiwa aingohaka deʼ ai danongo o nauru? Nimihidöaka ngomi o tonaka o puhaka kamamoi deʼ mia ama ai roriadodoto.”
5Daha o Musa wohiädono toönanga manga perkara gënanga ma Jouika, 6deʼ ma Jou wïtemo o Musaika, 7#Bil. 36:2 ”Okia yahö heto-hetongo o Zelafehad aingoha-ngohaka gënanga igoungu ipatutu. Hoʼ önanga nahidöaka o tonaka puhaka kamamoi deʼ toönanga manga ama ai roriadodoto. Zelafehad ai puhaka gënanga kokiani iuti aingoha-ngohaka o ngohekauku. 8Nahetongo o Israel ma nyawaika nako womatengo o nauru wohonenge deʼ ünanga aingohaka o nauru koiwa, done ai tonaka puhaka gënanga kokiani ihi puhaka aingohaka o ngohekaika. 9Nako ünanga aingohaka o ngoheka makoiwa, ai tonaka puhaka gënanga ihi puhaka ai dodoto o naurika. 10Nako ünanga ai dodoto o nauru makoiwa, ai tonaka gënanga mangale ai ama ai dodoto o nauru. 11Nako ünanga ai dodoto o nauru makoiwa, deʼ ai ama ai dodoto o nauru ma koiwa, ai gënanga idadi ma dutu o ro riadodoto duru yotigi-tigika deʼ ai ahaluku.” O datoro gënanga kokiani o Israel manyawa ihingounu hokä o tita madatoro ma Jou wohipoparaeta o Musaika.
O Yosua wï iriki hokä o Musa ai dagali
(Ul. 31:1-8)
12 #
Ul. 3:23-27, 32:48-52 Ma Jou wïtemo o Musaika, ”Nodöa o Abarim mal̄okuil̄e, deʼ genangokadau deʼ napulono o berera aha Tahidö döa-döaka o Israel manyawaika. 13Napulono de iböto, ngona aha nohonenge hokä o Harun ani riaka, 14hababu o Zin matonaka ikokakahaka, ngini inï hinoto nia lawanoka Ahi pareta. Maöraha o Meriba madaeraka o kawaha yongodumu ihi ngamo Ngohino, ngini nioluku nihinyata Ahi kuaha toönanga manga himangoka ima dohanga de o akere gënanga.” (Okia naga idö dadadi gënanga idadi o Meriba majobubuoka o mabereraka o Zin matonaka ikokakahaka.)
15-16Daha o Musa womä niata, ”Ya, Jou Ma Jou Madutu, nahidö döa-döaka o wowango mata-mata iwö wango-wangoika, ngohi togahoko, nitumutu womatengo waku-akunu wätuda o hoana de o berera manyawa nënanga; 17#1Kok. 22:17; Yeh. 34:5; Mat. 9:36; Mark. 6:34 womatengo wakunu wodadi o kapita maöraha önanga yoparangi. Uha nohigumal̄a Ani umati nënanga hokä o duba matika koiwa magogoana.”
18 #
Kel. 24:13
Ma Jou wïtemo o Musaika, ”Nï ahoko o Yosua, o Nun aingohaka. Unanga o nyawa moi wososawaro. Nogelenga ani giama ai häekuku. 19Nihuloko ünanga woma okoino ma Imam Eleazar ai himangoka deʼ yongodumu o kawaha. Toönanga manga himangoka mata-mata kokiani ngona nohingahu o Yosua gënanga ani dagali. 20Nihidöaka unangika ani kuaha o hidoku moi, hupaya o Israel manyawa iwihingounu ünanga. 21#Kel. 28:30; 1Sam. 14:41, 28:6 O Yosua kokiani wogahoko o hidumutu ma Imam Eleazarika, deʼ o Eleazar kokiani woleha Ahi mau wapake o Urim deʼ o Tumim. De madodagi gënanga o Eleazar wïtuda o Yosua deʼ yongodumu o Israel manyawa hagala o perokara magoronaka önanga yohima-himanga.” 22O Musa wadiai hokä ma Jou wihipopareta unangika. Unanga wïhuloko o Yosua womaokoino ma Imam Eleazar ai himangoka deʼ yongodumu o umati. 23#Ul. 31:23 Deʼ ünanga wö gelenga ai giama o Yosua ai häekuku deʼ wo hingahu o Yosua ai dagali, hokä ma Jou wahetongoka unangika.
Currently Selected:
O BILANGAN 27: TLB
Highlight
Share
Compare
Copy
Want to have your highlights saved across all your devices? Sign up or sign in
